Read ბიბლია იესო. 13 Bible Online

იესო. 13 - ბიბლია bible

იესო. 13

¹და დაბერდა იესო, ხანში შევიდა. და უთხრა მას უფალმა: „დაბერდი შენ და ხანში შეხვედი, და ქვეყანა კი ძალიან ბევრი დარჩა დასამკვიდრებელი.

²აჰა, ქვეყანა, რომელიც დარჩა: ფილისტიმელთა მთელი მხარე და მთელი გეშური:

³შიხორიდან, ეგვიპტის პირდაპირ რომ არის, ყეკრონის საზღვრამდე ჩრდილოეთით, რაც ქანაანს ეკუთვნის. ხუთი ფილისტიმელი მთავარი: ღაზელი, აშდოდელი, აშკელონელი, გეთელი, ყეკრონელი. აგრეთვე ყავიმელი სამხრეთით.

⁴ქანაანელთა მთელი ქვეყანა და ციდონელების მეყარა, აფეკამდე, ამორეველთა საზღვრამდე.

⁵და გიბლელთა ქვეყანა და მთელი ლიბანი მზის აღმოსავლეთით, ბაყალ-გადიდან, ხერმონის მთის ძირიდან, ხამათის მისასვლელამდე.

⁶მთის ყველა მკვიდრი ლიბანონიდან მისრეფოთ-მაიმამდე, ყველა ციდონელს განვდევნი ისრაელის ძეთა წინაშე. ოღონდ წილისყრით გაუნაწილე სამკვიდროდ ისრაელს, როგორც მე გიბრძანე.

⁷და ახლა განაწილე ქვეყანა სამკვიდროდ ცხრა ტომსა და მენაშეს ნახევარ ტომს.“

⁸მასთან ერთად რეუბენის ძეთ და გადის ძეთ მიიღეს თავიანთი სამკვიდრო, რომელიც მისცა მათ მოსემ იორდანეს გაღმა, აღმოსავლეთით, როგორც მისცა მათ მოსემ, უფლის მსახურმა.

⁹ყაროყერიდან, არნონის ხევის პირას რომაა, და ქალაქი, რომელიც შუა ხეობაშია, და მთელი ვაკე მედებადან ვიდრე დიბონამდე,

¹⁰და ყველა ქალაქი სიხონისა, ამორეველთა მეფისა, რომელიც მეფობდა ხეშბონში, ყამონელთა საზღვრამდე.

¹¹და გილყადი და მხარე გეშურელთა, და მაყაქათელთა, და მთელი მთა ხერმონისა და მთელი ბაშანი ვიდრე სალქამდე.

¹²ბაშანში მთელი სამეფო ყოგისა, რომელიც მეფობდა ყაშთაროთში და ედრეყში. ის დარჩა მხოლოდ რეფაიმელთა ნატამალიდან, და მოსრა ისინი მოსემ და განდევნა.

¹³და არ განუდევნიათ ისრაელის ძეთ გეშურელნი და მაყაქათელნი, და დამკვიდრებულია გეშური და მაყაქათი ისრაელის ძეთა შორის დღევანდლამდე.

¹⁴და მხოლოდ ლევის ტომს არ მისცა სამკვიდრო: უფლის, ისრაელის ღმერთის, საცეცხლო მსხვერპლები არის მისი სამკვიდრო, როგორც მან აღუთქვა მას.

¹⁵და მისცა მოსემ რეუბენის ძეთა ტომს საგვარეულოების მიხედვით:

¹⁶მათი მიწა-წყალი იყო ყაროყერიდან, არნონის ხევის პირას რომ არის, და ქალაქი, რომელიც შუა ხეობაშია და მთელი ვაკე მედებაზე.

¹⁷ხეშბონი და ყველა მისი ქალაქი, რომელიც ტაფობზეა: დიბონი, ბამოთ-ბაყალი და ბეთ-ბაყალ-მეყონი,

¹⁸იაჰცა, კედემოთი, მეფაყათი,

¹⁹კირიათაიმი, სიბმა და ცერეთ-შახარი ყემეკის მთაზე,

²⁰და ბეთ-ფეღორი, და ფისგას ფერდობები და ბეთ-იეშიმოთი,

²¹და ვაკის ყველა ქალაქი და მთელი სამეფო სიხონისა, ამორეველი მეფისა, რომელიც მეფობდა ხეშბონში, რომელიც მოსრა მოსემ, ის და მიდიანელი მთავრები: ევი, რეკემი, ცური, ხური და რებაყი, სიხონის მეფის მთავრები, მკვიდრნი ამ ქვეყნისა.

²²და ბალაამი, ძე ბეყორისა, მისანი, მოკლეს ისრაელის ძეთ მახვილით მათგან სხვა მოკლულთა რიცხვში.

²³და რეუბენის ძეთა საზღვრად იყო იორდანე. რეუბენის ძეთა სამკვიდრო იყო მათი საგვარეულოების მიხედვით, ქალაქები და მათი სოფლები.

²⁴და მისცა მოსემ სამკვიდრო გადის ტომს, გადის ძეთ მათი საგვარეულოების მიხედვით.

²⁵და იყო მათი სამკვიდრო იაყზერი, და გილყადის ყველა ქალაქი, და ყამონელთა ნახევარი ქვეყანა ვიდრე ყაროყერამდე, რაბას წინ რომ არის.

²⁶და ხეშბონიდან ვიდრე რამათ-მიცფემდე და ბეტონიმამდე, და მახანაიმიდან დებირის საზღვრამდე,

²⁷და ველზე: ბეთ-არამი, ბეთ-ნიმრა, სუქოთი, ცაფონი და სიხონის, ხეშბონის მეფის, სამეფოს დარჩენილი ნაწილი. იორდანე ესაზღვრებოდა მას ქინეროთის ზღვის კიდემდე, იორდანეს გაღმა, აღმოსავლეთით.

²⁸ეს იყო სამკვიდრო გადის ძეთა მათი საგვარეულოების მიხედვით, ქალაქები და მათი სოფლები.

²⁹და მისცა მოსემ მენაშეს ნახევარ ტომს სამკვიდრო, და ეს იყო მენაშეს ძეთა ნახევარი ტომისა, მათი საგვარეულოების მიხედვით.

³⁰და იყო საზღვარი მათი: მახანაიმიდან მთელი ბაშანი, მთელი სამეფო ყოგისა, ბაშანის მეფისა, და ყველა სოფელი იაირისა, რომელიც ბაშანშია — სამოცი ქალაქი.

³¹და ნახევარი გილყადი, და ყაშთაროთი, და ედრეყი, ყოგის სამეფოს ქალაქები ბაშანში ერგოთ მენაშეს ძის, მაქირის, შთამომავლებს, მაქირის ძეთა ნახევარს, მათი საგვარეულოების მიხედვით.

³²ეს არის, რაც გაანაწილა მოსემ მოაბის ველებზე იორდანეს გაღმა, იერიხოს აღმოსავლეთით.

³³ლევის ტომისთვის არ მიუცია მოსეს სამკვიდრო: თავად უფალი, ისრაელის ღმერთია მათი სამკვიდრო, როგორც უთხრა მათ.