Read ბიბლია იესო. 6 Bible Online

იესო. 6 - ბიბლია bible

იესო. 6

¹იერიხო იყო ჩაკეტილი და მოზღუდული ისრაელის ძეთა წინაშე. არავინ იყო არც გამომსვლელი და არც შემსვლელი.

²და უთხრა უფალმა იესოს: „ნახე, ხელში მოგეცი იერიხო და მისი მეფე თავისი მამაცი მებრძოლებით.

³და გარს შემოუარეთ ქალაქს ყველა ბრძოლისუნარიანმა, წრე დაარტყით ქალაქს ერთგზის ასე აკეთეთ ექვსი დღის მანძილზე.

⁴და შვიდმა მღვდელმა ატაროს ვერძის რქის შვიდი საყვირი კიდობნის წინ. და მეშვიდე დღეს გარს შემოუარეთ ქალაქს შვიდგზის და მღვდლებმა დააყვირონ რქის საყვირები.

⁵და როცა დააყვირებენ ვერძის რქას და გაიგონებთ საყვირის ხმას, მთელმა ხალხმა დასცეს დიდი ყიჟინა და ადგილზევე ჩაიქცევა ქალაქის კედელი, და ავა ხალხი მასზე, თითოეული თავისი მხრიდან.“

⁶და მოუხმო იესო ნავეს ძემ, მღვდლებს და უთხრა მათ: „ასწიეთ აღთქმის კიდობანი! და შვიდმა მღვდელმა ატაროს ვერძის რქის შვიდი საყვირი უფლის კიდობნის წინ.“

⁷და უთხრა ხალხს: „გასწიეთ და გარსშემოუარეთ ქალაქს და შეიარაღებულებმა იარონ უფლის კიდობნის წინ“.

⁸და როგორც კი იესომ ხალხს უთხრა, შვიდი მღვდელი, ვერძის რქის საყვირებს რომ დაატარებდა უფლის წინაშე, წავიდა და ჩაჰბერა საყვირებს. და უფლის აღთქმის კიდობანი მოჰყვებოდა მათ უკან.

⁹და შეიარაღებულნი წინ მიუძღოდნენ მღვდლებს, რომელნიც საყვირებს აყვირებდნენ, და უკანანი კიდობანს უკან მიჰყვებოდნენ და საყვირებს აყვირებდნენ.

¹⁰და ხალხს უბრძანა იესომ: „ნუ იყიჟინებთ და ნურავის გააგონებთ თქვენს ხმას, და სიტყვა არ დაგცდეთ ბაგეთაგან იმ დღემდე, ვიდრე მე არ გეტყვით ‘დაეცით ყიჟინა!’ და დასცემთ ყიჟინას.“

¹¹და გარს შემოუარა უფლის კიდობანმა ქალაქს, დაარტყა ერთი წრე; და მივიდნენ ბანაკში, და გაათიეს ბანაკში.

¹²და ადგა იესო დილაადრიანად, და წაიღეს მღვდლებმა კიდობანი უფლისა.

¹³და შვიდი მღვდელი, რომელთაც მიჰქონდათ ვერძის რქის შვიდი საყვირი უფლის კიდობნის წინ, მიდიოდა, და მიმავალი აყვირებდა საყვირებს, და შეიარაღებულნი წინ მიუძღოდნენ მათ, ხოლო უკანანი მიჰყვებოდნენ უფლის კიდობანს უკან, მიდიოდნენ და აყვირებდნენ საყვირებს.

¹⁴და გარს შემოუარეს ქალაქს მეორე დღესაც ერთგზის, და დაბრუნდნენ ბანაკში. და ასე აკეთებდნენ ექვს დღეს.

¹⁵ხოლო მეშვიდე დღეს ადრე ადგნენ, განთიადისას, და გარსშემოუარეს ქალაქს იმავე წესით შვიდგზის.

¹⁶და იყო მეშვიდე ჯერზე, როცა ჩაჰბერეს მღვდლებმა რქის საყვირებს, მაშინ უთხრა იესომ ხალხს: „დაეცით ყიჟინა, რადგან უფალმა ხელში ჩაგიგდოთ ეს ქალაქი!

¹⁷და დარისხებული უნდა იყოს ქალაქი და ყველაფერი, რაც მასშია. მხოლოდ მეძავი რახაბი და ყველა, ვინც მასთანაა სახლში, უნდა დარჩნენ ცოცხალი, რადგან მან დამალა წარგზავნილნი, ჩვენ რომ გავგზავნეთ.

¹⁸ოღონდ ერიდეთ დარისხებულს, რომ თავი არ დაირისხოთ დარისხებულის აღებით, და არ დაარისხოთ ისრაელის ბანაკი, და უბედურება არ დაატეხოთ მას.

¹⁹მთელი ვერცხლი და ოქრო, სპილენძისა და რკინის ჭურჭელი წმიდაა უფლისათვის, უფლის საუნჯეში უნდა შევიდეს იგი.“

²⁰ხალხმა შესძახა და ჩაჰბერეს საყვირებს. და როგორც კი ხალხმა საყვირის ხმა გაიგო, დასცა დიდი ყიჟინა და ადგილზევე ჩაიქცა კედელი, და ავიდა ხალხი ქალაქში, თითოეული თავისი მხრიდან, და აიღეს ქალაქი.

²¹და დაარისხეს ყველაფერი, რაც ქალაქში იყო: კაცი და დედაკაცი, ჭაბუკი და მოხუცებული, ხარი, კრავი და სახედარი.

²²და უთხრა იესომ იმ ორ ჭაბუკს, ქვეყნის დასაზვერად რომ იყვნენ წასული: „მიდით იმ მეძავი ქალის სახლში და გამოიყვანეთ იქიდან ის და ყველა, ვინც მასთანაა, როგორც შეჰფიცეთ მას.“

²³და მივიდნენ ჭაბუკები, ქალაქი რომ დაზვერეს და გამოიყვანეს რახაბი, მისი მამა, მისი დედა, მისი ძმა და ყველა, ვინც მას ჰყავდა და დატოვეს ისინი ისრაელის ბანაკს გარეთ.

²⁴და ცეცხლს მისცეს ქალაქი და ყველაფერი, რაც შიგ იყო. მხოლოდ ვერცხლი და ოქრო, სპილენძისა და რკინის ჭურჭელი შემატეს უფლის სახლის საუნჯეს.

²⁵და მეძავი რახაბი და მამამისის სახლი და ყველა, ვინც მას ჰყავდა, ცოცხალი დატოვა იესომ, და ის დარჩა ისრაელში ამ დღემდე, რადგან დამალა წარგზავნილნი, რომელნიც იესომ გაგზავნა იერიხოს დასაზვერად.

²⁶და იმ დროს დაიფიცა იესომ, ასე: „წყეულიმც იყოს უფლის წინაშე ის კაცი, ვინც ადგება და ააშენებს ამ ქალაქს, იერიხოს! თავის პირმშოზე დააფუძნოს საძირკველი მისი, და თავის უმცროსზე დადგას კარიბჭე მისი.“

²⁷და იყო უფალი იესოსთან, და განითქვა მისი სახელი მთელს ქვეყანაში.