Read ბიბლია მსაჯ. 10 Bible Online

მსაჯ. 10 - ბიბლია bible

მსაჯ. 10

¹აბიმელექის შემდგომ აღდგა თოლაყი, ძე ფუყასი, ძისა დოდოსი, ისაქარის კაცი, ისრაელის სახსნელად. და ცხოვრობდა იგი შამირში, ეფრემის მთაზე.

²და განსჯიდა ისრაელს ოცდასამი წელი, და მოკვდა და დაიმარხა შამირში.

³და მის შემდგომ დადგა იაირ გილყადელი და განსჯიდა ისრაელს ოცდაორი წელი.

⁴და ჰყავდა მას ოცდაათი ვაჟი, ოცდაათ ჩოჩორზე ამხედრებული, და ოცდაათი ქალაქი ჰქონდათ მათ, დღემდე ხავოთ-იაირად წოდებული. გილყადის ქვეყანაში რომ არის.

⁵და მოკვდა იაირი და დაიმარხა კამონში.

⁶და განაგრძეს ისრაელის ძეთ ბოროტის კეთება უფლის თვალში, და ემსახურებდნენ ბაყალებს და ყაშთაროთებს, და არამის ღმერთებს, და ციდონის ღმერთებს, და მოაბის ღმერთებს, და ყამონელთა ღმერთებს, და ფილისტიმელთა ღმერთებს; და მიატოვეს უფალი, და აღარ ემსახურებოდნენ მას.

⁷და აღიგზნო რისხვა უფლისა ისრაელზე და ჩაყარა ისინი ფილისტიმელთა და ყამონის ძეთა ხელში.

⁸და იმ წლიდან მოკიდებული ავიწროებდნენ და ჩაგრავდნენ ისრაელის ძეთ თვრამეტი წელი, ყოველ ისრაელის ძეს, ვინც იორდანეს გაღმა იყო ამორეველების ქვეყანაში, გილყადში.

⁹და გადალახეს ყამონის ძეთ იორდანე, რომ იუდას, ბენიამინისა და ეფრემის სახლს შებრძოლებოდნენ, და გაუჭირდა ისრაელს ფრიად.

¹⁰და შეჰღაღადეს ისრაელის ძეთ უფალს და უთხრეს: „შეგცოდეთ შენ, რადგან მივატოვეთ ჩვენი ღმერთი და ვემსახურებოდით ბაყალებს!“

¹¹და უთხრა უფალმა ისრაელის ძეთ: „ხომ დაგიხსენით ეგვიპტელთაგან, ამორეველთაგან, ყამონელთაგან, ფილისტიმელთაგან,

¹²და ციდონელები, ყამალეკი, და მაყონი, გავიწროებდნენ თქვენ; და როცა კი შემოგიღაღადებიათ ჩემთვის, ხომ მიხსნიხართ მათ ხელთაგან?

¹³მაგრამ თქვენ მიმატოვეთ და ემსახურებოდით სხვა ღმერთებს, ამიტომ მეტს აღარ გიხსნით თქვენ.

¹⁴წადით და შეჰღაღადეთ თქვენს მიერ არჩეულ ღმერთებს, მათ გიხსნან თქვენს გასაჭირში!“

¹⁵და უთხრეს ისრაელის ძეთ უფალს: „შევცოდეთ ჩვენ! და გვიყავი, რაც გენებოს, ოღონდ დღეს გვიხსენი.“

¹⁶და განიშორეს უცხო ღმერთები და ემსახურებოდნენ უფალს. და მეტი ვეღარ აიტანა მისმა სულმა ისრაელის ტანჯვა-წამება.

¹⁷და შეიყარნენ ყამონელები და გილყადში დაბანაკდნენ. შეიყარნენ და დაბანაკდნენ ისრაელის ძენიც მიცფაში.

¹⁸და გილყადის ხალხმა და მთავრებმა უთხრეს ერთმანეთს: „ვინც პირველი შეებრძოლება ყამონელებს, ის იყოს გილყადის მკვიდრთა წინამძღოლი.“