Read ბიბლია მსაჯ. 2 Bible Online

მსაჯ. 2 - ბიბლია bible

მსაჯ. 2

¹და ამოვიდა უფლის ანგელოზი გილგალიდან ბოქიმში და თქვა: „ამოგიყვანეთ თქვენ ეგვიპტიდან და მოგიყვანეთ ამ ქვეყანაში, რომელიც თქვენს მამებს ფიცით შევფიცე და ვთქვი: ‘არ დავარღვევ თქვენთან დადებულ ჩემს აღთქმას უკუნისამდე,

²ოღონდ ნუ შეკრავთ კავშირს ამ ქვეყნის მკვიდრებთან; დაანგრიეთ მათი სამსხვერპლოები’. თქვენ კი არ ისმინეთ ჩემი ხმა. და რა ჩაიდინეთ თქვენ?

³და კიდევ ვთქვი: ‘არ განვდევნი მათ თქვენი პირისაგან, და ისინი თქვენი ფერდებისათვის ნარ-ეკლად იქცევიან და მათი ღმერთები მახედ გექცევიან.’“

⁴და როცა უფლის ანგელოზი ამ სიტყვებს ეუბნებოდა ყველა ისრაელის ძეს, ხალხმა ხმა აღიმაღლა და ატირდა.

⁵და უწოდეს სახელი ამ ადგილს ბოქიმი, და შესწირეს იქ მსხვერპლი უფალს.

⁶და როცა დაითხოვა იესომ ხალხი, და წავიდნენ ისრაელის ძენი თავ-თავიანთ წილხვდომილი ქვეყნის დასამკვიდრებლად,

⁷მაშინ უფალს ემსახურებოდა ხალხი იესოს მთელი სიცოცხლის მანძილზე და უხუცესთა მთელი სიცოცხლის მანძილზე, რომელნიც იესოს მერე ცხოვრობდნენ და რომელთაც ნანახი ჰქონდათ უფლის დიადი საქმე, რაც მან ისრაელისათვის მოიმოქმედა.

⁸მაგრამ როცა მოკვდა იესო ნავეს ძე, უფლის მსახური, ას ათი წლისა,

⁹და დამარხეს იგი თიმნათ-ხერესში, ეფრემის მთაში, გაყაშის მთის ჩრდილოეთით, მისი სამკვიდრებლის მიწაზე;

¹⁰და აგრეთვე მთელი ის თაობა შეეძინა თავის მამებს, და მათ შემდგომ მოვიდა სხვა თაობა, რომელიც არ იცნობდა უფალს და იმ საქმეს, რაც მოიმოქმედა ისრაელისათვის,

¹¹მაშინ ბოროტებას სჩადიოდნენ ისრაელის ძენი უფლის თვალში, და ემსახურებოდნენ ბაყალებს;

¹²მიატოვეს უფალი, თავიანთი მამების ღმერთი, რომელმაც ეგვიპტის ქვეყნიდან გამოიყვანა ისინი, და გაჰყვნენ ისინი სხვა ღმერთებს, იმ ხალხების ღმერთებს, მათ ირგვლივ რომ იყვნენ, და თაყვანს სცემდნენ მათ, და აჯავრებდნენ უფალს;

¹³და მიატოვეს უფალი, და ემსახურებოდნენ ბაყალსა და ყაშთაროთებს.

¹⁴და აღიგზნო რისხვა უფლისა ისრაელზე, და მძარცველთა ხელში ჩაჰყარა ისინი და ძარცვეს ისინი; და შემდეგ მტრების ხელში ჩაჰყარა, გარს რომ ერტყნენ, და წინ ვერ აღუდგნენ თავიანთ მტრებს.

¹⁵ყველგან, სადაც კი გავიდოდნენ, უფლის ხელი წარმართავდა მათ საბოროტოდ, როგორც უთხრა მათ უფალმა და როგორც დაუფიცა მათ უფალმა. და დიდად შევიწროვებულნი იყვნენ ისინი.

¹⁶და აღუდგინა უფალმა მსაჯულნი, და იხსნიდნენ ისინი მათ მძარცველების ხელთაგან.

¹⁷მაგრამ თავიანთი მსაჯულებისაც არ ისმინეს, რადგან მრუშობდნენ სხვა ღმერთების კვალდაკვალ და თაყვანს სცემდნენ მათ; მალევე გადაუხვიეს იმ გზას, რომლითაც დადიოდნენ მათი მამები, უფლის მცნებათა მოსასმენად. და ესინი ასე არ იქცეოდნენ.

¹⁸და როცა უფალი მსაჯულებს აღუდგენდა ხოლმე მათ, უფალი იყო მსაჯულთან, და მათ იხსნიდა მათი მტრების ხელიდან მსაჯულის მთელი სიცოცხლის მანძილზე, რადგან ებრალებოდა ისინი უფალს მათი კვნესის გამო მათი მჩაგვრელებისა და მათი შემაჭირვებლების ხელში.

¹⁹მაგრამ როგორც კი მოკვდებოდა მსაჯული, თავიანთ მამებზე უარესად იქცეოდნენ, მიჰყვებოდნენ სხვა ღმერთების კვალს, ემსახურებოდნენ და თაყვანს სცემდნენ მათ; არ ეშვებოდნენ თავიანთ ბოროტ საქმეებს, თავს არ ანებებდნენ ურჩობის გზას.

²⁰და კვლავ აღიგზნო რისხვა უფლისა ისრაელზე, და თქვა: „რადგან დაარღვია ამ ხალხმა ჩემი აღთქმა, რომელიც ვუბრძანე მათ მამებს და არ ისმინა ჩემი ხმა,

²¹მეც აღარ ავყრი არავის მათი პირისაგან იმ ხალხებიდან, რომლებიც დატოვა იესომ, როცა მოკვდა, —

²²რათა გამოვცადო მათით ისრაელი: დაიცავენ თუ არა ისინი უფლის გზას, და გაჰყვებიან თუ არა მას, როგორც მიჰყვებოდნენ მათი მამები?“

²³და დატოვა უფალმა ეს ხალხები, და აღარ აჰყარა, და არ ჩაუგდო იესოს ხელში.