Read ბიბლია 1მეფ. 10 Bible Online

1მეფ. 10 - ბიბლია bible

1მეფ. 10

¹და აიღო სამუელმა ზეთის ჭურჭელი, თავზე დაასხა, აკოცა და უთხრა: „აჰა, გცხო უფალმა თავისი სამკვიდროს მთავრად.

²დღესვე, როცა ჩემგან წახვალ, ორ კაცს შეხვდები რახელის საფლავთან, ბენიამინის საზღვარზე, ცელცახში. გეტყვიან: „ნაპოვნია ვირები, რომელთა საძებრადაც წამოხვედი. აჰა, დაავიწყდა მამაშენს თავისი ვირები და თქვენზე დარდობს: რა ვიღონო ჩემი შვილისთვისო?

³და გასცდები ამ ადგილს და მიხვალ თაბორის მუხნართან, და შეხვდები ბეთელისკენ სალოცავად მიმავალ სამ კაცს. ერთს სამი თიკანი მიჰყავს, მეორეს სამი პური მიაქვს, მესამეს ტიკით ღვინო.

⁴მშვიდობით მოგიკითხავენ და ორ პურს მოგცემენ, და შენც გამოართმევ ხელიდან.

⁵შემდგომ ამისა ღვთის ბორცვზე ახვალ, სადაც ფილისტიმელთა სადარაჯოებია. ქალაქში შესვლისას შეხვდები გორაკიდან ჩამომავალ წინასწარმეტყველთა გუნდს, რომელთაც წინ მოუძღვებიან ქნარით, დაფდაფით, სტვირითა და ებნით, თავად კი წინასწარმეტყველებენ.

⁶ღვთის სული გადმოვა შენზე და მათთან ერთად აწინასწარმეტყველდები, სხვა კაცად გარდაიქმნები.

⁷როცა ყოველივე ეს აგიცხადდება, როგორც მოგიხდეს, ისე მოიქეცი, რადგან ღმერთი იქნება შენთან.

⁸ჩემზე წინ ჩახვალ გილგალში და მეც მალე მოვალ შენთან, რათა შევწირო სრულადდასაწველი და სამშვიდობო მსხვერპლი. შვიდ დღეს მელოდე, ვიდრე არ მოვალ შენთან და არ გასწავლი, რა უნდა გააკეთო.“

⁹როგორც კი გატრიალდა საული სამუელისაგან წასასვლელად, სხვა გული ჩაუდო მას ღმერთმა და ყველა ნიშანი აუცხადდა იმ დღეს.

¹⁰ავიდნენ ბორცვზე და აჰა, მოდის მისკენ წინასწარმეტყველთა გუნდი. გადმოვიდა მასზე ღვთის სული და ისიც მათთან ერთად აწინასწარმეტყველდა.

¹¹ყველანი, ვინც გუშინ და გუშინწინ იცნობდნენ მას, ხედავდნენ წინასწარმეტყველებთან ერთად გაწინასწარმეტყველებულს, და ლაპარაკობდნენ ერთმანეთში: „რა დაემართა კიშის ძეს? ნუთუ საულიც გაწინასწარმეტყველდა?“

¹²თქვა პასუხად ერთმა იქაურმა კაცმა: „ვინ არის მათი მამა?“ ასე წარმოიშვა ანდაზა: „ნუთუ საულიც გაწინასწარმეტყველდა?“

¹³მორჩა ქადაგობას და ავიდა გორაკზე.

¹⁴უთხრა საულის ბიძამ საულსა და მის მსახურს: „სად იარეთ?“ მიუგო: „ვირებს ვეძებდით და როცა ვერსად ვიპოვეთ, სამუელთან წავედით.“

¹⁵უთხრა საულს ბიძამ: „მომიყევი, რა გითხრათ სამუელმა.“

¹⁶უთხრა საულმა ბიძას: „გამოგვიცხადა, ნაპოვნიაო ვირები.“ ხოლო მეფობის ამბავი, რაც სამუელმა უთხრა, არ გაუმხელია მისთვის.

¹⁷მოუხმო სამუელმა ხალხს უფალთან მიცფაში.

¹⁸უთხრა ისრაელის ძეთ: „ასე ამბობს უფალი, ღმერთი ისრაელისა: „მე გამოვიყვანე ისრაელი ეგვიპტიდან, მე გიხსენით თქვენ ეგვიპტელთა ხელიდან და ყველა სამეფოს ხელიდან, რომელიც კი გჩაგრავდათ.’

¹⁹დღეს თქვენ უარყოფთ თქვენს ღმერთს, რომელმაც გიხსნათ ძნელბედობასა და გასაჭირში, რადგან ეუბნებით: მეფე დაგვისვიო. აბა, დადექით უფლის წინაშე თქვენ — თქვენი ტომისა და საგვარეულოების მიხედვით.“

²⁰სათითაოდ მიიყვანა სამუელმა ისრაელის ყველა ტომი და ბენიამინის ტომს ხვდა წილი.

²¹მიიყვანა ბენიამინის ტომი საგვარეულოების მიხედვით და მატრის საგვარეულოს ხვდა წილი; მერე საულს, კიშის ძეს, ხვდა წილი. დაუწყეს ძებნა და ვერ იპოვეს.

²²კვლავ შეეკითხნენ უფალს: „თუ კიდევ მოვა ის?“ თქვა უფალმა: „აჰა, აღალს ეფარება.“

²³გაიქცნენ და გამოიყვანეს იქიდან. ჩადგა ხალხში და ერთი თავით მაღალი იყო.

²⁴უთხრა სამუელმა მთელ ხალხს: „ხომ ხედავთ, ვინ აირჩია უფალმა? რადგან მთელს ხალხში არავინაა მისი მსგავსი“, შესძახა ხალხმა და თქვა: „დღეგრძელი იყოს მეფე!“

²⁵გამოუცხადა სამუელმა ერს მეფობის უფლებანი. წიგნში ჩაწერა და უფლის წინაშე დადო. მერე დაითხოვა სამუელმა ხალხი, და წავიდ-წამოვიდნენ თავ-თავის სახლებში.

²⁶საულიც წავიდა თავისი სახლისაკენ, გიბყაში. თან გაჰყვა მამაცი ხალხი, რომელთა გულებს ღმერთი შეეხო.

²⁷უღირსი ხალხი ამბობდა: „ეგ ჩვენ როგორ გვიხსნის?“ და შეიძულეს იგი და ძღვენი არ მიართვეს. ის კი თითქოს ვერ ამჩნევდა ამას.