Read ბიბლია 1მეფ. 5 Bible Online

1მეფ. 5 - ბიბლია bible

1მეფ. 5

¹წაიღეს ფილისტიმელებმა ღვთის კიდობანი და ებენ-ყეზერიდან აშდოდში გადაიტანეს.

²აიღეს ფილისტიმელებმა ღვთის კიდობანი და მიიტანეს დაგონის ტაძარში და გვერდით დაუდგეს დაგონს.

³ადგნენ მეორე დღეს ადრიანად აშდოდელები და ხედავენ, უფლის კიდობნის წინ პირქვე გდია დაგონი. აიღეს დაგონი და დააბრუნეს თავის ადგილას.

⁴ადგნენ მეორე დღეს დილით და ხედავენ, პირქვე გდია დაგონი უფლის კიდობნის წინ. დაგონის თავი და ორთავე ხელის მტევანი მოწყვეტილი ყრია ზღურბლთან, მხოლოდ ტანი აქვს შერჩენილი დაგონს.

⁵ამიტომაც ერიდებიან აშდოდში დაგონის ქურუმები და დაგონის სახლად მიმსვლელნი დაგონის ზღურბლის დაბიჯებას დღემდე.

⁶დამძიმდა უფლის ხელი აშდოდელებზე. ანადგურებდა და გვემდა მათ ბუგრებით, მთელს აშდოდს და მის სანახებს.

⁷ხედავდნენ ამას აშდოდელები და ამბობდნენ: „არ უნდა დარჩეს ჩვენთან ისრაელის ღვთის კიდობანი, რადგან მძიმეა მისი ხელი ჩვენზე და დაგონზე, ჩვენს ღმერთზე.“

⁸შეუთვალეს და შეკრიბეს თავისთან ყველა ფილისტიმელი მთავარი და იკითხეს: „რა ვუყოთ ისრაელის ღვთის კიდობანს?“ თქვეს: „გადაიტანეთ ისრაელის ღვთის კიდობანი.“ და გადაიტანეს გათში ისრაელის ღვთის კიდობანი.

⁹მას შემდეგ, რაც მიიტანეს იგი, უფლის ხელი იყო ქალაქზე, შეიქნა დიდი ჩოჩქოლი; გვემა უფალმა ქალაქის მკვიდრნი დიდიან-პატარიანად, და გამოაჩნდათ ბუგრები.

¹⁰გაგზავნეს ღვთის კიდობანი ყეკრონს. როცა მივიდა ყეკრონში ღვთის კიდობანი, აკივლდნენ ყეკრონელები: „მოგვიტანეს ისრაელის ღვთის კიდობანი, რომ ამოგვხოცონ ჩვენცა და ჩვენი ხალხიც!“

¹¹შეუთვალეს და შეკრიბეს ფილისტიმელთა ყველა მთავარი, თქვეს: „გაგზავნეთ ისრაელის ღვთის კიდობანი. დაბრუნდეს თავის ადგილზე, რომ არ ამოგვხოცოს ჩვენ და ჩვენი ხალხი.“ რადგან შიშისზარი იყო მთელს ქალაქში, მეტისმეტად დამძიმდა აქ უფლის ხელი.

¹²და ის, ვინც სიკვდილს გადაურჩა, ბუგრები გამოაჩნდა ყველას. ცას მისწვდა ქალაქის ღაღადი.