Read ბიბლია 1მეფ. 7 Bible Online

1მეფ. 7 - ბიბლია bible

1მეფ. 7

¹მოვიდნენ კირიათ-იეყარიმელნი, წაიღეს უფლის კიდობანი და მიიტანეს აბინადაბის სახლში, გორაკზე, და განაწესეს მისი შვილი, ელეაზარი უფლის კიდობნის მცველად.

²გამოხდა მრავალი ხანი, ოცი წელი, კიდობნის დასვენებიდან კირიათ-იეყარიმში, და მოენატრა უფალი მთელს ისრაელის სახლს.

³ასე უთხრა სამუელმა მთელს ისრაელის სახლს: „თუ მთელი გულით მოიქცევით უფლისაკენ, მოიშორეთ უცხო ღმერთები და ყაშთაროთები. მიმართეთ გულები უფლისაკენ და მხოლოდ მას ერთს ემსახურეთ და მაშინ გიხსნით იგი ფილისტიმელთაგან.“

⁴მოიშორეს ისრაელის ძეთ ბაყალები და ყაშთაროთები და მხოლოდ უფალს ემსახურებოდნენ.

⁵თქვა სამუელმა: „შეკრიბეთ მთელი ისრაელი მიცფაში და შევევედრები თქვენთვის უფალს.“

⁶შეიკრიბნენ მიცფაში, და ხაპავდნენ წყალს და ღვრიდნენ უფლის წინაშე, და მარხულობდნენ იმ დღეს. თქვეს იქ: „შევცოდეთ უფალს.“ და განსჯიდა სამუელი ისრაელის ძეთ მიცფაში.

⁷შეიტყვეს ფილისტიმელებმა, მიცფაში რომ იყვნენ შეკრებილნი ისრაელის ძენი, და დაიძრნენ ფილისტიმელთა მთავრები ისრაელის წინააღმდეგ. გაიგეს ისრაელის ძეთ და შეუშინდნენ ფილისტიმელებს.

⁸უთხრეს ისრაელის ძეთ სამუელს: „ნუ შეგვიწყვეტ უფლისადმი, ჩვენი ღვთისადმი, ღაღადს, იქნებ გვიხსნას ფილისტიმელთა ხელიდან.“

⁹აიყვანა სამუელმა ძუძუთა კრავი და მთლიანად შესწირა სრულადდასაწველად უფალს, და შეჰღაღადა სამუელმა უფალს ისრაელისათვის და უსმინა მას უფალმა.

¹⁰როდესაც სამუელი სწირავდა სრულადდასაწველს უფალს და ფილისტიმელებიც მოდგნენ ისრაელთან საბრძოლველად, და იგრგვინა ძლიერი ხმით იმ დღეს უფალმა ფილისტიმელებზე, და შეაძრწუნა, და იძლივნენ ისინი ისრაელის ძეთაგან.

¹¹გამოვიდნენ ისრაელის კაცები მიცფადან, და დაედევნენ ფილისტიმელებს და მუსრი გაავლეს მათ ბეთ-ქორის ქვემოთ.

¹²და აიღო სამუელმა ერთი ლოდი და დადო იგი მიცფასა და კლდის შვერილს შორის, და უწოდა იმ ადგილს სახელად ებენ-ყეზერი, და თქვა: „აქამდე შეგვეწია უფალი“.

¹³დაცხრნენ ფილისტიმელები და აღარ შედიოდნენ ისრაელის საზღვრებში. და უფლის ხელი იყო ფილისტიმელებზე სამუელის სიცოცხლეში.

¹⁴დაუბრუნდა ისრაელს ფილისტიმელთაგან წაღებული ქალაქები ყეკრონიდან გათამდე. გამოგლიჯა ისრაელმა მათი საზღვრები ფილისტიმელებს. და იყო ზავი ისრაელსა და ამორეველთა შორის.

¹⁵და განსჯიდა ისრაელს სამუელი მთელი თავისი სიცოცხლე.

¹⁶და დადიოდა წლიდან წლამდე, მიმოივლიდა ბეთელს, გილგალს და მიცფას, და განსჯიდა ისრაელს ყველა ამ ადგილას.

¹⁷ბრუნდებოდა რამას, რადგან იქ იყო მისი სახლი, და აქაც განსჯიდა ისრაელს. იქ აუგო მან სამსხვერპლო უფალს.