Read ბიბლია 1მეფ. 8 Bible Online

1მეფ. 8 - ბიბლია bible

1მეფ. 8

¹როცა მოხუცდა სამუელი, ისრაელის მსაჯულებად თავისი შვილები გაამწესა.

²მის პირმშოს სახელად ერქვა იოელი, ხოლო უმცროსს — აბია. ბეერ-შებაყში იყვნენ მსაჯულებად.

³არ გაჰყვნენ შვილები მამის გზას, ანგარებას მისდევდნენ, ქრთამს იღებდნენ და სამართალს ამრუდებდნენ.

⁴შეიკრიბა ისრაელის ყველა უხუცესი და მივიდა სამუელთან რამაში.

⁵უთხრეს: „შენ მოხუცდი, შენი შვილები კი არ მიჰყვებიან შენს გზას; დაგვისვი ახლა მეფე, რომ განგვსჯიდეს, როგორც სხვა ხალხებშია.“

⁶არ მოეწონა ეს საქმე სამუელს, როცა თქვეს, მეფე მოგვეციო მსაჯულად, მაშინ ილოცა სამუელმა უფლის მიმართ.

⁷უთხრა უფალმა სამუელს: „გაუგონე ხალხს ყველაფერი, რასაც გეტყვიან, რადგან შენ კი არ უარგყვეს, არამედ მე უარმყვეს თავიანთ მეფედ.

⁸როგორც იქცეოდნენ იმ დღიდან, როცა ეგვიპტიდან გამოვიყვანე, დღემდე, როცა დამივიწყეს და უცხო ღმერთებს დაემონნენ, ასევე გექცევიან შენც.

⁹ახლა გაუგონე მათ, ოღონდ გააფრთხილე და აუხსენი უფლებები მეფისა, რომელმაც მათზე უნდა იმეფოს.“

¹⁰უთხრა სამუელმა უფლის სიტყვები ხალხს, მეფეს რომ მოითხოვდნენ მისგან.

¹¹უთხრა: „ეს უფლებები ექნება მეფეს, რომელიც იმეფებს თქვენზე: წაიყვანს თქვენს შვილებს და თავის ეტლებთან და ცხენებთან დაიყენებს, და ირბენენ მისი ეტლის წინ.

¹²დააყენებს მათ ათასისთავებად და ორმოცდაათისთავებად, თავისი მინდვრების მხვნელებად და თავისი სამკალის მომკელებად, თავისი საბრძოლო საჭურველისა და ეტლების მკეთებლებად.

¹³აიყვანს თქვენს ასულებს მენელსაცხებლეებად, მზარეულებად და ხაბაზებად.

¹⁴წაიღებს თქვენს საუკეთესო მინდვრებს, ვენახებსა და ზეთისხილის ბაღებს და თავის მსახურებს დაურიგებს.

¹⁵მეათედს აიღებს თქვენი ნათესებიდან და ვენახებიდან და თავის საჭურისებს და მსახურებს დაურიგებს.

¹⁶წაგართმევთ საუკეთესო ყმებს, მხევლებს, მსახურ ბიჭებს, სახედრებს და თავის საქმეზე ამსახურებს.

¹⁷წაიღებს მეათედს თქვენი ფარებიდან და თქვენც მისი მონები გახდებით.

¹⁸და გმინვას დაიწყებთ მაშინ თქვენი არჩეული მეფისაგან, მაგრამ პასუხს აღარ გაგცემთ მაშინ უფალი.“

¹⁹არ დაუჯერა ხალხმა სამუელს, თქვეს: „არა და არა, მეფე უნდა გვეჯდეს.

²⁰ჩვენც ისეთები უნდა ვიყოთ, როგორც სხვა ხალხები არიან, ჩვენი მეფე განგვსჯის ჩვენ, წინ წაგვიძღვება და ჩვენს ომებს წარმართავს.“

²¹მოისმინა სამუელმა ხალხის ნათქვამი და შეატყობინა უფალს.

²²უთხრა უფალმა სამუელს: „შეიწყნარე მათი სიტყვა და დაუდგინე მეფე.“ და უთხრა სამუელმა ისრაელის კაცებს: „წადით თქვენ-თქვენს ქალაქებში.“