Read მცხეთური ხელნაწერი–გ. მთაწმინდელი ფსალმუნები 115 Bible Online

ფსალმუნები 115 - მცხეთური ხელნაწერი–გ. მთაწმინდელი bible

ფსალმუნები 115

¹მრწმენა მე, რომლისათჳსცა ვიტყოდე; ხოლო მე დავმდაბლდი ფრიად.

²და ვთქუ განკჳრვებასა ჩემსა, რამეთუ: ყოველი კაცი ცრუ არს.

³რაჲ მივაგო უფალსა ყოვლისავეთჳს, რომელი მომაგო მე?

⁴სასუმელი ცხორებისა მოვიღო და სახელსა უფლისასა ვხადო.

⁵ლოცვანი ჩემნი უფალსა მივსცნე წინაშე ყოვლისა ერისა მისისა.

⁶პატიოსან არს წინაშე უფლისა სიკუდილი წმიდათა მისთა.

⁷ჵ, უფალო, მე მონა შენი, მე მონა შენი და ძე მჴევლისა შენისა;

⁸განჰხეთქენ საკრველნი ჩემნი, შენდა შევწირო მსხუერპლი ქებისა და სახელსა უფლისასა ვხადო.

⁹ლოცვანი ჩემნი უფალსა მივსცნე წინაშე ყოვლისა ერისა მისისა

¹⁰ეზოთა სახლისა უფლისათა, შორის შენსა, იერუსალჱმ!