Read მცხეთური ხელნაწერი–გ. მთაწმინდელი ფსალმუნები 135 Bible Online

ფსალმუნები 135 - მცხეთური ხელნაწერი–გ. მთაწმინდელი bible

ფსალმუნები 135

¹აუარებდით უფალსა, რამეთუ კეთილ, რამეთუ უკუნისადე არს წყალობაჲ მისი.

²აუარებდით ღმერთსა ღმერთთასა, რამეთუ უკუნისამდე არს წყალობაჲ.

³აუარებდით უფალსა უფალთასა, რამეთუ უკუნისამდე.

⁴რომელმან ქმნა საკჳრველნი დიდ-დიდნი მხოლომან, რამეთუ უკუნისამდე.

⁵რომელმან ქმნა ცანი გულისჴმის-ყოფით რამეთუ უკუნისამდე არს წყალობაჲ მისი;

⁶რომელმან დაამტკიცა ქუეყანა წყალთა ზედა, რამეთუ უკუნისამდე არს წყალობაჲ მისი;

⁷რომელმან ქმნა ნათელნი დიდ-დიდნი მხოლომან,

⁸მზე მფლობელად დღისა, რამეთუ უკუნისამდე არს წყალობაჲ მისი;

⁹მთოვარე და ვარსკულავები ჴელმწიფებად ღამისა, რამეთუ უკუნისამდე არს წყალობაჲ მისი;

¹⁰რომელმან დასცა ეგჳპტე პირმშოთურთ თჳსით, რამეთუ უკუნისამდე არს წყალობაჲ მისი;

¹¹და გამოიყვანა ისრაჱლი შორის მისსა, რამეთუ უკუნისამდე არს წყალობაჲ მისი;

¹²ჴელითა მტკიცითა და მკლავითა მაღლითა, რამეთუ უკუნისამდე არს წყალობაჲ მისი;

¹³რომელმან განაპო ზღუაჲ მეწამული ორად

¹⁴და განიყვანა ისრაჱლი შორის მისა, რამეთუ უკუნისამდე არს წყალობაჲ მისი;

¹⁵და შთასთხია ფარაო და ძალი მისი ზღუასა მას მეწამულსა, რამეთუ უკუნისამდე არს წყალობაჲ მისი;

¹⁶რომელმან განიყვანა ერი თჳსი უდაბნოდ რამეთუ უკუნისამდე არს წყალობაჲ მისი;

¹⁷რომელმან დასცნა მეფენი დიდ-დიდნი, რამეთუ უკუნისამდე არს წყალობაჲ მისი;

¹⁸და მოსწყჳდნა მეფენი ძლიერნი, რამეთუ უკუნისამდე არს წყალობაჲ მისი;

¹⁹სეონ, მეფე ამორეველთა, რამეთუ უკუნისამდე არს წყალობაჲ მისი;

²⁰და ოგ, მეფე ბასანისა, რამეთუ უკუნისამდე არს წყალობაჲ მისი;

²¹და მისცა ქუეყანა მათი სამკჳდრებელად, რამეთუ უკუნისამდე არს წყალობაჲ მისი;

²²სამკჳდრებელად ისრაჱლსა, მონასა თჳსსა,

²³რამეთუ სიმდაბლესა შინა ჩუენსა მომიჴსენნა ჩუენ უფალმან, რამეთუ უკუნისამდე არს წყალობაჲ მისი;

²⁴და მიჴსნა ჩუენ მტერთა ჩუენთაგან, რამეთუ უკუნისამდე არს წყალობაჲ მისი;

²⁵რომელმან მოსცის საზრდელი ყოველსა ჴორციელსა, რამეთუ უკუნისამდე არს წყალობაჲ მისი;

²⁶აუარებდით ღმერთსა ცათასა, რამეთუ უკუნისამდე არს წყალობაჲ მისი;