Read მცხეთური ხელნაწერი–გ. მთაწმინდელი იგავნი სოლომონისა 24 Bible Online

იგავნი სოლომონისა 24 - მცხეთური ხელნაწერი–გ. მთაწმინდელი bible

იგავნი სოლომონისა 24

¹შვილო, ნუ ჰბაძავ კაცთა უგუნურთა, ნუცა გული გითქუამნ ყოფად მათ თანა,

²რამეთუ სიცრუვესა იწურთის ენაჲ მათი, და სალმობასა იტყჳან ბაგენი მათნი.

³სიბრძნით იშენების სახლი და გულისჴმის-ყოფით აღემართების.

⁴და მეცნიერებით აღივსებიან საუნჯენი ყოვლითა სიმდიდრითა პატიოსნითა და კეთილითა.

⁵უმჯობეს არს ბრძენი ძლიერისა და კაცი, რომელსა გონიერებაჲ აქუნდეს, ქუეყანისმოქმედისა დიდისა.

⁶განგებულებით იქმნების ბრძოლაჲ, ხოლო შეწევნაჲ გულისაგან განმზრახველისა.

⁷სიბრძნჱ და გონიერებაჲ კეთილი ბჭეთა ზედა ბრძენთასა. ბრძენთა არა გარდააქციონ პირისაგან ღმრთისაჲსა.

⁸არამედ ზრახევდ კრებულსა შოვრის: უსწავლელთა შეემთხჳოს სიკუდილი.

⁹და მოკუდეს უგუნური ცოდვასა შინა. არაწმიდებითა კაცი ბილწებით შეიგინოს.

¹⁰დღესა ბოროტსა და დღესა ბრძოლისასა მოუკლებელად

¹¹იჴსენ სიკუდილდ რომელ მიცემულ იყვნენ... ნუ სწყალობ.

¹²უკუეთუ სთქუა ვითარმედ: არა ვიცნი ესე, არამედ იცნის უფალმან გულნი ყოველთანი და რომელმან დაჰბადნა სულნი, მან იცის ყოველი, რომელმან მიაგოს კაცად-კაცადსა საქმეთა მათთაებრ.

¹³ჭამე თაფლი, შვილო, რამეთუ კეთილ არს გოლი, რაჲთა დატკბნეს სასაჲ შენი.

¹⁴და ეგრჱთ სცნა სიბრძნჱ სულისა შენისა. უკუეთუ ჰპოვო, იყოს კეთილ აღსასრული შენი და სასოებამან არა დაგიტეოს შენ.

¹⁵ნუ მოიყვანებ უღმრთოსა საყოფლად მართლისაჲ, ნუ სცთები მაძღრობითა გულისათა,

¹⁶შჳდგზის ღათუ დაეცეს მართალი, აღ-ვე-დგეს, ხოლო უღმრთონი მოუძლურდნენ ბოროტსა შინა.

¹⁷უკუეთუ დაეცეს მტერი შენი, ნუ მოგცხრებინ და შებრკოლებასა მისსა ნუ აჰმაღლდები.

¹⁸ნუუკუე იხილოს იგი უფალმან და არა სთნდეს და გარეწარიქციოს გულისწყრომაჲ თჳსი მისგან.

¹⁹ნუ გიხარინ ბოროტისმოქმედთა ზედა, ნუცა ჰბრძავ ცოდვილთა ზედა,

²⁰რამეთუ არა ესუას ნაშობი უკეთურთა და ბრწყინვალებაჲ უღმრთოთა დაშრტეს.

²¹გეშინოდენ, შვილო, ღმრთისა და მეფისა და ნუ ურჩ ექმნები ორთავე მათ,

²²რამეთუ მეყსეულად იჴმინიან უღმრთონი, ხოლო ტანჯვაჲ ორთავე ამათ ვინმე ცნას.

²³ამას გეტყჳ თქუენ: გონიერთა ცნობად სამართლისა ნუ გრცხუენინ, თუალთ-ღებაჲ სასჯელსა შინა არა კეთილ არს.

²⁴რომელმან ჰრქუას უღმრთოსა მართალ, წყეულ იყავნ ერისაგან და საძაგელ ნათესავთა შორის.

²⁵ხოლო რომელთა შეატყვან იგინი, უმჯობესად გამოჩნდენ და მათ ზედა მივიდეს კურთხევაჲ.

²⁶ბაგითა ამბორს-უყოფენ მიგებასა კეთილთა სიტყუათა,

²⁷აერთა ქუეშე განჰმზადენ განსავალად საქმენი შენნი და აღემზადე ველად და ვიდოდე შემდგომად ჩემსა და აღეშენოს სახლი შენი

²⁸ნუ იყოფი ცრუმოწამე მოქალაქისა შენისათჳს, ნუცა განჰვრცნები ბაგითა შენითა.

²⁹ნუ იტყჳ ვითარმედ: ვითარცა მიყო, უყო მეცა. და მივაგო მას, რაოდენი მავნო მე.

³⁰ქუეყანაჲ საქმარი არს კაცი უგუნური და, ვითარცა ვენაჴი, კაცი ნაკლული გონებითა.

³¹უკეთუ დაუტეო იგი, მოოჴრდეს და თივაჲ აღმოცენებულ იქმნეს და ყოვლადვე მოოჴრდეს. და ზღუდენი ქვათა მისთანი დაირღუენ.

³²უკუანასკნელ სთქუა: მე შევინანე და მოვიხილე გამორჩევად სწავლულებისა.

³³მცირედ დავიძინო და მცირედ დავისხნე ჴელნი მკერდსა ჩემსა. უკეთუ ესე ჰყო,

³⁴მოიწიოს, ვითარცა წინამორბედი სიგლახაკე შენი და ნაკლულევანებაჲ შენი, ვითარცა კეთილმსრბოლი.