Read მცხეთური ხელნაწერი–გ. მთაწმინდელი იგავნი სოლომონისა 25 Bible Online

იგავნი სოლომონისა 25 - მცხეთური ხელნაწერი–გ. მთაწმინდელი bible

იგავნი სოლომონისა 25

¹იგავნი სოლომონისნი, მეფისა ისრაჱლისანი, გამოუკულეველნი, რომელ აღწერნეს მეგობართა ეზეკია მეფისა ურიასტანისათა.

²დიდებაჲ ღმრთისა ჰფარავს სიტყუათა, ხოლო დიდებაჲ მეფისა პატივ-სცემს მეფესა.

³ცაჲ მაღალ არს და ქუეყანაჲ ღრმა, ხოლო გული მეფისა გამოუკუველ.

⁴განჭედე გამოუცდელი ვეცხლი და განწმიდნეს ყოვლად წმიდად.

⁵და მოისპნენ წარმართნი პირისაგან მეუფისა და წარემართოს სიმართლით საყდარი მისი.

⁶ნუ ლაღად იქცევი წინაშე მეფისა, ნუცა ადგილსა ძლიერსა დასჯდები.

⁷უმჯობეს არს შენდა, რათა გრქუან: აღმორე ზემო, ვიდრე დამდაბლებასა შენსა წინაშე ძლიერისა.

⁸რაჲ-იგი იხილეს თუალთა შენთა, თქუ: ნუ წარმდებ იქმნები ლალვასა, რათა არა ინანდე უკუანასკნელ, რაჟამს გაყუედროს მეგობარმან.

⁹ნუუკვე გაყუედროს მეგობარმან და ლალვა და მტერობაჲ არა განგეროს შენ, არამედ იყოს სწორ სიკუდილისა; მადლი და მეგობრობაჲ განგააზნაურებს. დაიმარხე თავისა შენისა, რათა არა საყუედრელ იქმნე, არამედ დაიმარხენ გზანი შენნი კეთილად,

¹⁰გარემიიქცევ მისგან, ნუუკვე შეურაცხ-გყოს.

¹¹ბირთჳ ოქროჲსა მძივსა სარდიონისასა თქუმად სიტყუაჲ;

¹²საყურსა ოქროჲსასა და ანთრაკითა პატიოსნითა შემკული არს სიტყუაჲ სიბრძნისა ყურთა მორჩილთასა.

¹³ვითარცა გამოსლვაჲ თოვლისა მკათა ზედა სიცხესა საგრილობელ, ეგრევე მოციქული სარწმუნოჲ, რომელთა წარავლინონ იგი, რამეთუ გულთა, რომელთა იჴსენონ იგი - სარგებელ არს იგი.

¹⁴ვითარცა ქარნი და წჳმანი და ღრუბელნი სასტიკნი, ეგრეთვე რომელნი იქადიან საცემელსა ტყუელვით.

¹⁵სულგრძელებაჲ გზათა მეფისათა წარმართებად, ხოლო ენამან ლბილმან შემუსრნის ძუალნი.

¹⁶თაფლი ჰპოვე? ჭამე რავდენ წეს არს, ნუუკუე განსძღე და წარმოსთხიო.

¹⁷იშჳთ შედგი ფერჴი შენი მეგობრისა, ნუუკე მოეწყინო და მოგიძულოს შენ.

¹⁸ვითარცა ვაზრი და მახჳლი და ისარი პირედი, ეგრეცა კაცი, რომელი შესწამებდეს მეგობარსა თჳსსა წამებასა ცილსა.

¹⁹გზაჲ უკეთურისაჲ და ფერჴი უშჯულოჲსაჲ მოისპოს დღესა ბოროტსა.

²⁰ვითარცა მღილი სამოსელსა და მატლი ძელსა, ეგრეცა მწუხარებამან კაცისამან ავნის გულსა.

²¹ჰშიოდის მტერსა შენსა, გამოზარდე იგი, უკუეთუ ჰსწყუროდის, - ასუ მას.

²²ესე რაჲ ჰყო, ნაკუერცხალი ცეცხლისაჲ შეჰკრიბო თავსა მისსა, ხოლო უფალმან მოგაგოს შენ კეთილი.

²³ქარმან ზეშთამომან აღადგინის ღრუბელი და პირმან ურცხჳნომან ენაჲ აღიბაძვის.

²⁴უმჯობეს არს ყოფაჲ ყორესა ერდოჲსასა, ვიდრეღა დედაკაცისა მაგინებელისა სახლსა შინა ზოგადსა.

²⁵ვითარცა წყალი სულსა წყურიელსა, ეგრეცა სახარებაჲ კეთილი ქუეყანით შორით.

²⁶ვითარცა იგი, ვინ წყაროჲ დაყო და გამოსავალი წყლისაჲ განრყუნა, ეგრე შეუგვანებელ არს მართალი დაცემად წინაშე უღმრთოჲსასა.

²⁷ჭამად თაფლი ფრიად არაკეთილ არს, ხოლო პატივის-ცემაჲ სიტყუთა დიდებულთაჲ - ღირს.

²⁸ვითარცა ქალაქი ზღუდე დარღუეული და უზღუდოჲ, ეგრეცა კაცი, რომელი არა ზრახვით რასმე იქმნ.