Read მცხეთური ხელნაწერი–გ. მთაწმინდელი იგავნი სოლომონისა 26 Bible Online

იგავნი სოლომონისა 26 - მცხეთური ხელნაწერი–გ. მთაწმინდელი bible

იგავნი სოლომონისა 26

¹ვითარცა ცუარი ლეწვასა და წჳმაჲ მკასა, ეგრეცა არა არს უგუნურისა პატივი.

²ვითარცა მფრინველი რაჲ აღფრინდის და სირი, ეგრეცა წყევაჲ ამავოჲ არავის მიუჴდეს.

³ტანჯვაჲ ცხენსა და დეზი ვირსა, ხოლო კუერთხი ნათესავსა უგუნურსა.

⁴ნუ მიუგებ უგუნურსა მისისაებრ უგუნურებისა, რაჲთა არა მსგავს მისა შჱნდე.

⁵ნუ მიუგებ უგუნურსა მისისაებრ უგუნურებისა, რაჲთა არა ეგონოს ბრძენ თავი თჳსი.

⁶გზათაგან თჳსთა საყუედრელ იქმნის, რომელმან მიავლინის უგუნური მოციქულად სიტყჳსა.

⁷მოსპე სლვაჲ ფერჴთაჲ და იგავნი პირისაგან უგუნურისა.

⁸ვითარცა იგი, ვინ შთადვის ქვაჲ შურდულსა, ეგრევე მსგავს არს, რომელმან მიჰსცეს დიდებაჲ უგუნურსა.

⁹ეკალი ცენდებინ ჴელსა მომთრვალეთასა, ხოლო მონებაჲ - ჴელთა უგუნურთასა

¹⁰..... რამეთუ შეიმუსრის განკჳრვებაჲ მათი.

¹¹ვითარცა ძაღლი, რაჲ მიიქცის ნათხევსა თჳსსა და საძულელ იქმნის, ეგრეცა - უგუნური თჳსითა უკეთურებითა მი-რაჲ-იქცეს ცოდვასა.

¹²ვიხილე კაცი, რომელსა ეგონა თავი თჳსი ბრძენ, ხოლო სასოებაჲ აქუნდა... უგუნურსა, ვიდრე მას.

¹³თქჳს მცონარმან, წარ-რაჲ-ავლინებედ გზად: ლომი - გზათა ზედა და კაცის მკლველები - უბანთა ზედა.

¹⁴ვითარცა კარი, რაჲ იქცევინ კორტიმლსა ზედა, ეგრეცა მცონარი ცხედარსა.

¹⁵დაიმალნა ჴელნი მცონარმან წიაღთა შიდა და პირად ვერ უძლავს მიყოფად.

¹⁶უბრძნჱს უჩნნ თავი თჳსი მცონარსა, ვიდრე იგი, რომელსა მაძღრივ მიაქუნ ხარებაჲ.

¹⁷ვითარცა იგი, ვინ უპყრის ძაღლსა კუდი, ეგრეცა, რომელი წარუდგეს სხჳსა საშჯელსა.

¹⁸ვითარცა იგი, რომელნი-იგი ულხინებედ, წარმოიხუნიან სიტყუანი წინაშე კაცთა, ხოლო რომელმან მიაგოს სიტყუაჲ, პირველადვე უბრკუმეს

¹⁹ეგრეცა რომელნი უმზირიედ მეგობართა თჳსთა, რაჟამს ემხილის, თქჳან, ვითარმედ: «სიმღერით ვქმენით ესე.»

²⁰მრავალსა ზედა შეშასა აღატყდებინ ცეცხლი და სადა არნ გულ-მწყრალი, არა დაშრტის ლალვაჲ; ხოლო სადა არა არნ გულმწყრალი, დაყუდებულ არნ ლალვაჲ მარადის.

²¹ლანძჳ ნაკუერცხალსა და შეშაჲ ცეცხლსა და კაცი მაგინებელი შფოთებად და ლალვად.

²²სიტყუა კუდკუეთილ ჩუკენი, ესენი ჰგუემედ საუნჯეთა მუცლისათა.

²³ვეცხლი ზაკუვით მიცემული ვითარცა კეცი შერაცხილ არს და ბაგეთა წრფელთა გულისა მწუხარებაჲ დაფარიან.

²⁴ბაგითა წამს-უყოფნ ყოველთა ტირილით მტერი, ხოლო გულსა თჳსსა ზაკუავნ სიტყუათა ბოროტთა.

²⁵რავდენვე გევედრებოდის მტერი ქენებით დიდითა ჴმითა, ნუ გრწამნ მისი, რამეთუ შჳდნი უკეთურებანი არიან გულსა მისსა.

²⁶რომელი იმალვიდეს მტერობასა, შეჰკრებს იგი ზაკუვასა. დაიფარნის ცოდვანი თჳსნი განცხადებულად კრებულსა შორის.

²⁷რომელი უთხრიდეს მღჳმესა მოყუასსა, იგივე შთავარდეს მას. და რომელი აგორვებდეს ლოდსა, თავსა ზედა თჳსსა აგორვებს.

²⁸ენასა მტყუვარსა ჰძულს ჭეშმარიტებაჲ, ხოლო პირმან უთმინოჲსამან აღადგინის შფოთი.