Read მცხეთური ხელნაწერი–გ. მთაწმინდელი ეკლესიასტე 10 Bible Online

ეკლესიასტე 10 - მცხეთური ხელნაწერი–გ. მთაწმინდელი bible

ეკლესიასტე 10

¹მწერნი მწყდარნი ჰყოფენ ზეთისა სიტკბოსა, პატიოსან არს მცირედ ბრძნისა უფროს დიდებასა მას უგუნურებისასა.

²გული ბრძნისაჲ მარჯუენით მისა და გული უგუნურისაჲ მარცხენით მისა.

³და გზასა შინა რაჟამს ვიდოდის უგუნური, ნაკლულევან იქმნების გული მისი, და რომელთაცა განიზრახეს, ყოველივე უგუნურებანი არიან.

⁴უკუჱთუ სული ჴელმწიფებისაჲ აღვიდეს შენ ზედა, ადგილსა შენსა ნუ მიუტევებ, რამეთუ კურნებაჲ დააცხრობს ცოდვათა დიდთა.

⁵არს სიბოროტე, რომელი ვიხილე მე მზესა ქუჱშე, ვითარცა უნებელად გამოვიდა პირისაგან ჴელმწიფეთაჲსა.

⁶მიეცა უგუნური სიმაღლეთა შინა დიდთა, და მდიდარნი სიმდაბლითა დასხდეს.

⁷ვიხილენ მონანი ცხენთა ზედა, და მთავარნი მავალად, ვითარცა მონანი, ქუეყანათა ზედა.

⁸აღმომთხრელი მთხრებლისაჲ შთავარდეს მას შინა, და დამარღუეველსა ღობისასა უკბინოს მას გუჱლმან.

⁹მიმღებელი ქუათა ტკივნეულებს მათგან, მკოდელი შეშათა ჭირსა მიეცეს მათ შინა.

¹⁰უკუეთუ განვარდეს მოკვეთილი და თჳთ პირითა შეაძრწუნის და ძალსა განაძლიერებს და აღმატება კაცისა სიბრძნე.

¹¹უკუეთუ უკბინოს გუჱლმან არა ჩურჩნით, და არა არს ნაკლულევანება მსახრვალისა.

¹²სიტყუათა პირისა ბრძნისასა მადლი, და ბაგენი უგუნურთანი დაანთქმენ მას.

¹³დასაბამი სიტყუათა პირისა მისთასა უგუნურებაჲ, და უკანასკნელი პირისა მისისაჲ საცთური ბოროტი.

¹⁴და უგუნური განამრავლებს სიტყუათა; ვერ ცნა კაცმან, რაჲ არს ქმნილი და რაჲ ყოფადი, რა შემდგომი მისი, და ვინ მიუთხრას მას?

¹⁵შრომამან უგუნურთამან განაბოროტის იგი, რომელმან ვერა სცნა მისლუვად ქალაქად.

¹⁶ვაჲ შენ, ქალაქო, რომელსა შინა მეფე ჭაბუკ, და მთავარნი შენნი ადრე ჭამენ.

¹⁷ნეტარ ხარ შენ, ქუეყანაო, რომლისა მეფე შენი, ძე აზნაურისა და მთავარნი შენნი ჟამიერად ჭამენ ძლიერებასა შინა და არა ჰრცხუენეს.

¹⁸მცონარებათა შინა დამდაბლდეს კრძალვაჲ და უქმობასა შინა ჴელთაჲთა წთოლად იწყებს სახლი.

¹⁹სიცილსა ჰყოფენ პური და ღჳნოჲ და ზეთი, რომელი შვებულ-ჰყოფს ცოცხალთა, და ვეცხლსა თანა სიმდაბლით დაემორჩილონ ყოველსა.

²⁰და სჳნდისსა შინა უკუჱ შენსა ნუ სწყევ მეფესა და საუნჯესა შინა საწოლისა შენისათა ნუ სწყევ მდიდარსა, რამეთუ მფრინველმან ცისამან წარიღოს ჴმაჲ შენი და მქონებელმან ფრთისამან მიუთხრას სიტყვა შენი.