Read მცხეთური ხელნაწერი–გ. მთაწმინდელი ეკლესიასტე 12 Bible Online

ეკლესიასტე 12 - მცხეთური ხელნაწერი–გ. მთაწმინდელი bible

ეკლესიასტე 12

¹და მოგეჴსენედ დამბადებელი შენი დღეთა სიჭაბუკისა შენისათა, ვიდრემდის არა მოიწინენ დღენი ბოროტისა შენისანი და წარმოგიდგენ წელნი, რომელთა შინა სთქუა: «არა არს მათ შინა ნება ჩემი».

²ვიდრემდე არა დაბნელდეს მზე და ნათელი და მთოვარე და ვარსკულავნი, და მიიქცენ ღრუბელნი უკუანაგან წჳმათა.

³დღესა შინა, რომელსა შინა შეირყინენ მცველნი სახლისანი და იცვალნენ მამაკაცნი ძლიერებისანი და უქმ იქმნენ მფქველნი, რამეთუ შემცირდეს და დაბნელდეს მხედველნი ნაპრალთა შინა.

⁴და დაეჴშნენ კარნი უბანთა ზედა უძლურებათა შინა ჴმისა მფქველთასა და აღდგენ ჴმათა ზედა სირისათა, და დამდაბლდენ ასულნი ჴმანელობისანი.

⁵და მაღალთა ზედა გამოიხედენ და საკჳრველებათა გზასა ზედა, და აღყვავნეს ნუში და განსხუნეს მკალი და დაირღვეს კაპარი, რამეთუ წარვიდა კაცი სახლსა შინა საუკუნისა თჳსისა და მოიცვეს უბანთა ზედა მტყებართა.

⁶ვიდრემდის არა შესცვალოს საბელი ვეცხლისა, და არა შეიმუსროს გამოცდა ოქროსა, და და შეიმუსროს სარწყული წყაროსა თანა, და შეიმუსროს ბორბალი მღჳმესა ზედა.

⁷და მიიქცეს მიწაჲ ქუეყანასა შინა, ვითარცა იყო, და სული მიიქცეს ღმრთისა მიმართ, რომელმან მოსცა იგი.

⁸ამაოებაჲ ამაოთაჲ, - თქუა ეკლესიასტე, - ყოველნივე ამაო.

⁹და უმეტესად, რამეთუ იქმნა ეკლესიასტე ბრძენ და ასწავა მეცნიერებაჲ კაცთა არაგამოკულევად შემკობასა იგავთასა.

¹⁰ფრიად იძია ეკლესიასტე პოვნად სიტყუათა ნებისათა და დაწერილთა სიწრფოებისა სიტყუათა ჭეშმარიტებისა.

¹¹სიტყუანი ბრძენთანი, ვითარცა ჴარისსაკუჱთელნი, და ვითარცა სამსჭუალნი განმსჭვალულნი, რომელნი შეწყობილებისაგან მოეცნენ მწყემსისა ერთისაგან და მრავალნი მათგან.

¹²შვილო ჩემო, განეკრძალე ქმნად წიგნთა მრავალთა, რამეთუ არა არს დასრულება, და სწავლაჲ მრავალი შრომა არს ჴორცთაჲ.

¹³დასასრული სიტყჳსა ყოველი ისმინე, ღმრთისა გეშინოდენ და მცნებანი მისნი დაიცვენ, მრავალი ესე ყოველსა კაცსა,

¹⁴რამეთუ ყოველი ქმნილი მიიყვანოს ღმერთმან სასჯელსა ზედა და ყოველთათჳს შეცოდებისა, უკუეთუ კეთილი და უკუეთუ ბოროტი.