Read მცხეთური ხელნაწერი–გ. მთაწმინდელი ეკლესიასტე 6 Bible Online

ეკლესიასტე 6 - მცხეთური ხელნაწერი–გ. მთაწმინდელი bible

ეკლესიასტე 6

¹არს სიბოროტე, რომელი ვიხილე მზესა ქუჱშე და მრავალი არს კაცთა შორის.

²კაცსა, რომელსა მისცეს ღმერთმან სიმდიდრე და საქონელნი და დიდებაჲ, და არა ნაკლულევან არს სული მისი ყოველთაგან, რომელთა გულმან უთქუა, და არა მისცემს მას ღმერთი ფლობად მისგან ჭამად, რამეთუ კაცმან უცხომან ჭამოს მისგან. და ესე ამაოება და სნეულება ბოროტი არს.

³უკუეთუ შუნეს კაცმან ასი შჳლნი და მრავალთა წელთა ცხოვნდეს და ფრიად იყოს დღენი წელიწადთა მისთანი, და სული მისი არა განიძღოს კეთილთაგან, და დაფლვა არა იქმნა მისი, ვსთქვა: «კეთილ უფროჲს მისა განგდება.

⁴რამეთუ ამაოებასა შინა მოვიდა, და ბნელსა შინა დაიფაროს სახელი მისი.

⁵და მზე არა იხილა და არცა ცნა განსუჱნებაჲ მისი უფროჲს ამისსა.

⁶და ცხომდა ათას წელ ყოვლისაებრ და კეთილობა არა იხილა, ნუ თუ არაერთსა ადგილსა თუ მივლენ ყოველნი?

⁷ყოველი შრომაჲ კაცისაჲ პირსა შინა მისსა, და სული არა აღივსოს.

⁸რამეთუ რაჲ უმეტესობა ბრძენთაჲ უფროჲს უგუნურთაჲსა მით, რამეთუ გლახაკმან სცნა სლვაჲ წინაშე ცხოვრებისა.

⁹კეთილ არს ხედვა თვალთა უფროს მსლველისა სულითა, და, აჰა, ამავოება და აღრჩევა სულისა.

¹⁰უკუეთუ რა იქმნა, ეგერა, წოდებულ არს სახელი მისი და, იცნობა, რომელი არს კაცი, და ვერშემძლებელ არს განსჯად უძლიერესისა თანა უფროს თავისა თჳსისა.

¹¹რამეთუ არიან სიტყვანი მრავალნი, განმამრავლებელნი ამაოებისა.

¹²რაჲ უმეტეს კაცისა, რამეთუ ვინ უწყის კეთილი კაცისაჲ ცხორებასა მისსა შინა, რიცხუსა დღეთა ცხორებისა ამაოებისა მისისათასა. და ყვნა იგინი აჩრდილსა შინა, რამეთუ ვინ მიუთხრას კაცსა, რაჲ იყოს შემდგომად მისსა მზესა ქუჱშე?