Read საპატრიარქო იობი 13 Bible Online

იობი 13 - საპატრიარქო bible

იობი 13

¹ეს ყველაფერი იხილეს ჩემმა თვალებმა, ისმინდა ყურმა და მიხვდა.

²რაც თქვენ იცით, მეც ვიცი, არც მე ვარ თქვენზე ნაკლები.

³მაინც მინდა ველაპარაკო ყოვლადძლიერს და მსურს მოვახსენო ჩემი სამხილი.

⁴თქვენ კი სიცრუის მთხზველები ხართ, უვარგისი მკურნალნი ხართ ყველანი.

⁵დადუმდებოდეთ მაინც! ეს იქნებოდა თქვენი სიბრძნე.

⁶ისმინეთ ჩემი სამხილი და ჩემი ბაგეების საჩივარი გაიგონეთ!

⁷ღვთის გამო ლაპარაკობთ ტყუილს, მის გამო ლაპარკობთ სიცრუეს?

⁸უნდა მიკერძოებოდით მას, ღმერთს უნდა გამოსარჩლებოდით?

⁹მოგეწონებათ, რომ გამოგჩხრიკოთ? ისე მოატყუებთ, როგორც ადამიანები ტყუვდებიან?

¹⁰ის მაინც გამხილებთ, მალულადაც რომ პირმოთნეობდეთ.

¹¹ნუთუ მისი სიდიადე არ გაშინებთ და მისი შიშისზარი არ დაგცემიათ თავზე?

¹²თქვენი შეგონებები ნაცრის არაკებია, თქვენი საყრდენი თიხის საყრდენია;

¹³დადუმდით და მე მალაპარაკეთ, მერე რაც მომივა, მომივიდეს!

¹⁴რისთვის უნდა ვზიდო ჩემი ხორცი ჩემივე კბილებით, რისთვის მეჭიროს ჩემი სული ჩემივე ხელებით?

¹⁵კიდეც რომ მომკლას, მასზე ვარ დანდობილი - მაინც დავიცავ ჩემს გზებს მის წინაშე.

¹⁶ისიც ხსნა იქნება ჩემთვის, რომ უღვთო კაცი არ მივა მის წინაშე.

¹⁷გაიგონეთ ჩემი სიტყვა და ყური უგდეთ ჩემს ნათქვამს;

¹⁸აჰა, განმიცხადებია, ჩემი სარჩელი: ვიცი, რომ გავმართლდები.

¹⁹ვინ არის ჩემი მოდავე? რადგან მაშინ დავდუმდებოდი და გავთავდებოდი.

²⁰ოღონდ ამ ორს ნუ მიზამ და შენს სახეს არ დავემალები:

²¹შენი ხელი მომარიდე და შენი ზარი ნუ შემაძრწუნებს.

²²მიხმე და მოგიგებ, ან მე ვილაპარაკებ და შენ მიპასუხე.

²³რამდენი დანაშაული და ცოდვა მაწევს? მაცოდინე ჩემი ბრალი და ცოდვა!

²⁴რისთვის მიმალავ სახეს და რისთვის შეგირაცხივარ შენს მტრად?

²⁵მოფარფატე ფოთოლს აფრთხობ და გამხმარ ჩალას სდევნი?

²⁶რადგან მწარე ამბებს მაწერ თავზე და სიყმაწვილის დროინდელ ცოდვებს მითვლი;

²⁷ხუნდებში გამაყოფიე ფეხები და ჩემს გზა-სავალს ყარაულობ;

²⁸ის კი იხრწნება, როგორც მძორი, როგორც ჩრჩილისაგან შეჭმული სამოსელი.