Read საპატრიარქო იობი 18 Bible Online

იობი 18 - საპატრიარქო bible

იობი 18

¹მიუგო ბილდად ხუშელმა და უთხრა:

²როდისღა დაუდებთ სამანს თქვენს სიტყვებს? იფიქრეთ და მერე ვილაპარაკოთ.

³რატომ შევირაცხენით პირუტყვებად და გავუწმიდურდით თქვენს თვალში?

⁴ო, თავის მტანჯველო საკუთარი ბოღმით! შენს გამო ხომ არ უნდა გაუკაცრიელდეს მიწა და ადგილიდან დაიძრას კლდე?

⁵ბოროტეულთა ნათელიც ჩაქრება და აღარ იელვებს მისი ცეცხლის ნაპერწკალი;

⁶სინათლე დაბნელდება მის კარავში და სანათური ჩაქრება მის თავზე;

⁷დამოკლდება მისი ძლიერი ნაბიჯები და დაამხობს საკუთარი რჩევა;

⁸რადგან ჩავარდნილი აქვს ფეხი ბადეში და ხლართებში დაიარება;

⁹ხაფანგს ქუსლით ჰყავს დაჭერილი, მოჭერილი აქვს საკვრელები;

¹⁰იდუმალ დაგებულია მახეები მიწაზე და ხაფანგები ბილიკებზე;

¹¹საშინელებები აფრთხობენ ირგვლივ და ფეხდაფეხ ედევნებიან;

¹²დაიმშევა მისი ძალა და დაღუპვა მზად არის მისი ფერდებისთვის;

¹³ნაწილ-ნაწილ შეუჭამს კანს, ასოებს შეუჭამს სიკვდილის პირმშო;

¹⁴ამოიძირკვება მისი საიმედო კარვიდან და წაათრევენ მას საშინელებათა მეუფესთან;

¹⁵მისიანი არავინ დასახლდება მის კარავში, გოგირდი გადაეყრება მის საცხოვრებელს;

¹⁶ძირს ფესვები გაუხმება და მაღლა ტოტები დაუჭკნება;

¹⁷მისი სახსენებელი გაქრება ქვეყნად და სახელი აღარ ექნება მოედანზე;

¹⁸განდევნიან ნათლიდან ბნელში და ქვეყნიერებას მოაშორებენ;

¹⁹არც ნაშიერი ეყოლება, არც შთამომავალი თავის ხალხში და არც ნატამალი დარჩება საცხოვრებელზე.

²⁰მისი დღის გამო გაოგნდებიან დასავლელნი და აღმოსავლელებს შეიპყრობს ძრწოლა.

²¹ნამდვილად, ასე დაემართება უკუღმართთა საცხოვრებელს და იმათ ადგილს, ღმერთს რომ არ სცნობენ!