Read საპატრიარქო იობი 22 Bible Online

იობი 22 - საპატრიარქო bible

იობი 22

¹მიუგო ელიფაზ თემანელმა და უთხრა:

²რას არგებს ღმერთს კაცი, როცა ბრძენიც კი თავისი თავისთვის არის სასარგებლო.

³რაში სჭირდება ყოვლადძლიერს შენი სიმართლე? ან რა გამორჩენა ექნება, თუ შენ წრფელი გზებით ივლი?

⁴განა შენი მოშიშების გამო დაგიწყებს მხილებას და წავა შენთან ერთად სამსჯავროზე?

⁵განა დიდი არ არის შენი სიბორეტე? განა აქვს ბოლო შენს შეცოდებებს?

⁶რადგან ტყუილუბრალოდ იხუთავდი შენი მოძმისაგან და ტანისამოსს ხდიდი შიშველ-ტიტველს;

⁷მწყურვალს წყალს არ ასმევდი და მშიერს პურს უკავებდი;

⁸მძლავრისაა ეს ქვეყანა და აღზევებული მკვიდრობს იქ;

⁹ქვრივები ხელცარიელი გაგისტუმრებია და ობლებს მკლავები მოსწყვეტია.

¹⁰ამიტომ არის შენს ირგვლივ ხაფანგები და ანაზდეული შიში გაძრწუნებს;

¹¹წყვდიადი გიშლის ხედვას თუ წყლის ნიაღვარმა გადაგფარა?

¹²განა ღმერთი ცაზე მაღლა არ არის? შეხედე ვარსკვლავთა თავანს, რა მაღალია!

¹³შენ ამბობ, რა უნდა იცოდეს ღმერთმა, ბურუსიდან რა უნდა განსაჯოსო?

¹⁴ღრუბელი აქვს საფარველად და ვერ იხედება, ცარგვალს უვლისო გარშემო.

¹⁵ნუთუ ძველ გზას ადგახარ, ავკაცები რომ დადიოდნენ?

¹⁶რომლებიც უდროოდ წარიტაცნენ, ღვარმა გადარეცხა მათი საძირკველი.

¹⁷ღმერთს ეუბნებოდნენ: გაგვეცალე! რას გვარგებსო ყოვლადძლიერი?

¹⁸მან კი სახლები აღვსო დოვლათით. შორს იყოს ჩემგან ბოროტეულთა რჩევა!

¹⁹უყურებდნენ მართალნი და ხარობდნენ, დასცინოდა მათ უმწიკვლო კაცი.

²⁰ხომ გაცამტვერდა ჩვენი მტერი და მათი ნატამალი ხომ ცეცხლმა შეჭამა!

²¹შეეთვისე მას და მშვიდობით იქნები, ამით მოვა შენთან ნეტარება;

²²მიიღე მისი ბაგიდან რჯული და გულში ჩაიდევი მისი სიტყვები;

²³თუ მიიქცევი ყოვლადძლიერისკენ, აშენდები; მოაშორე უკეთურება შენს კარვებს;

²⁴მტვერში დაფანტე ოქრო და რიყის ქვებში გაურიე ოფირის ბაჯაღლო;

²⁵ყოვლადძლიერი იყოს შენი ოქრო და ელვარე ვერცხლი შენთვის.

²⁶რადგან მაშინ ყოვლადძლიერში ჰპოვებ ნეტარებას და ღვთისკენ აღმართავ სახეს;

²⁷ილოცებ მის მიმართ და მოგისმენს, და შეასრულებ შენს აღთქმებს;

²⁸რასაც ჩაიფიქრებ, აგიხდება და შენს გზებზე ნათელი იბრწყინებს.

²⁹თუ დაამცირეს, შენ მის აღზევებას იტყვი; თვალდახრილს იხსნის იგი.

³⁰ბრალიანსაც კი გადაარჩენს, შენი უმწიკვლო ხელით გადარჩება.