Read საპატრიარქო იობი 27 Bible Online

იობი 27 - საპატრიარქო bible

იობი 27

¹განაგრძო იობმა თავისი იგავების თხრობა და თქვა:

²ღმერთს ვფიცავ, რომელმაც წამართვა სამართალი, და ყოვლად ძლიერს, რომელმაც გამიმწარა სიცოცხლე!

³ვიდრე ვსუნთქავ და ღვთის სული მიდგას ნესტოებში,

⁴თუ ჩემმა ბაგეებმა თქვან სიცრუე, და ჩემს ენას დასცდეს ტყუილი,

⁵შორს ჩემგან, თუ გაგამართლოთ, სიკვდილამდე თუ გავწირო ჩემი უმწიკვლოება!

⁶ჩემს სიმართლეზე ვდგავარ მტკიცედ და არ მოვეშვები; არ დავუგმივარ ჩემს გულს ჩემი დღე და მოსწრება!

⁷შეირაცხოს ჩემი მტერი როგორც ბოროტეული და ჩემი წინააღმდგომი - როგორც უკეთური!

⁸რადგან რისი იმედი ექნება უღვთოს, როცა გაჰკვეთს, როცა ამოართმევს სულს ღმერთი?

⁹განა მის ჩივილს შეისმენს ღმერთი, როცა გასაჭირი დაადგება თავზე?

¹⁰ყოვლადძლიერის სასოება ექნება, ღვთის ხსენებაში იქნება გამუდმებით?

¹¹მე გასწავლით თქვენ, რა არის ღვთის ხელი, და რაც ყოვლადძლიერთან არის, არ დავმალავ.

¹²თქვენ თვითონ გინახავთ ყველას და რად გინდათ ფუჭი ლაპარაკი?

¹³ასეთია ბოროტი კაცის წილი ღმერთთან და მჩაგვრელთა ხვედრი, ყოვლადძლიერისგან რომ ერგებათ.

¹⁴თუ შვილები გაუმრავლდება, მხოლოდ მახვილისთვის, და მისი შთამომავლობა პურით ვერ გაძღება.

¹⁵მისი დანარჩომნი სიკვდილში დაიმარხებიან და მათი ქვრივები არ დაიტირებენ მათ;

¹⁶თუ ქვიშასავით დააგროვებს ოქროს და ზვინებად დაყრის შესამოსელს,

¹⁷დაყრის, მაგრამ მართალი შეიმოსება და ვერცხლი უდანაშაულოს შეხვდება წილად;

¹⁸ჩრჩილივით აშენებს თავის სახლს და დარაჯის ხულასავით აკეთებს.

¹⁹მდიდარი წვება დასაძინებლად, მაგრამ როდემდის? გაახელს თვალს და გამქრალია ყოველივე.

²⁰ნიაღვარივით დაატყდება საშინელებანი, ღამით მოიტაცებს მას ქარიშხალი.

²¹წაიღებს აღმოსავლეთის ქარი და წავა, ადგილიდან ახვეტავს მას.

²²მოისვრის მას და არ შეიწყალებს; ამაოდ ეცდება, დაუსხლტეს მის ხელს.

²³ხელს ხელზე შემოჰკრავს მის გამო და სტვენას დაუწყებს მისი ადგილიდან.