Read საპატრიარქო იობი 28 Bible Online

იობი 28 - საპატრიარქო bible

იობი 28

¹ხომ აქვს ვერცხლს საბადო და ოქროს - ადგილი, სადაც წმედენ მას;

²რკინას მიწიდან იღებენ და სპილენძი გადამდნარი ქვაა.

³ადამიანმა საზღვარი მიუჩინა სიბნელეს და ქვეყნის კიდემდე ეძებს ბნელეთისა და წყვდიადის ქვას;

⁴მაღაროს თხრის უკაცრიელში, კაცის ფეხთაგან მივიწყებულ ადგილებში;

⁵მიწაა, პურს რომ აღმოაცენებს, მისი ქვეშეთი კი თითქოს ცეცხლისგან არის სახეცვლილი;

⁶საფირონის საბადოა მისი ქვები და მასთან ოქროს ქვიშა იპოვება!

⁷მისი ბილიკი არ იცის ონავარმა ფრინველმა და ქორის თვალსაც არ დაუნახავს;

⁸ამაყ მხეცებს იქ ფეხი არ დაუდგამთ, ლომს არ გაუვლია;

⁹კაჟისკენ გაიშვერს ხელს, ფესვებიანად აყირავებს მთებს;

¹⁰კლდეებში არხები გაჰყავს და ყოველივე ძვირფასს ჭვრეტს მისი თვალი.

¹¹მდინარეთა ნიაღვარს აკავებს და დაფარული სინათლეზე გამოაქვს.

¹²სად იპოვება სიბრძნე და სად არის შემეცნების ადგილი?

¹³მისი გზა არ იცის ადამიანმა და ცოცხალთა ქვეყნად ის არ იპოვება.

¹⁴უფსკრული ამბობს: ჩემში არ არისო; ზღვა ამბობს: ჩემთან არ არისო.

¹⁵არ გაიცვლება ოქროს ზოდში და ვერ აიწონება ვერცხლი მის ფასად;

¹⁶არ შეფასდება ოფირის ოქროდ, არც ძვირფასი ონიქსით და არც საფირონით;

¹⁷ვერ გაუსწორდება მას ოქრო და ბროლი; წმიდა ოქროს ჭურჭელი მისი საღირალი არ არის;

¹⁸არ არის სახსენებელი მარჯანი და ბროლი; მარგალიტზე ძვირფასია სიბრძნე.

¹⁹ვერ გაუსწორდება მას ქუშის ტოპაზი, წმიდა ოქროთი არ აიწონება.

²⁰საიდან მოდის სიბრძნე და სად არის შემეცნების ადგილი?

²¹უხილავია ყოველი ცოცხალის თვალისათვის და დაფარულია ცის ფრინველთათვის;

²²ქვესკნელი და სიკვდილი ამბობენ: ყური კი მოგვიკრავსო მისთვის.

²³ღმერთმა იცის მისი გზა და მან უწყის მისი ადგილი;

²⁴რადგან ის თვალს ავლებს ქვეყნის კიდეებს, მთელს ცისქვეშეთს ხედავს.

²⁵როდესაც ქარს წონას უწესებდა და წყალს დონეს უსაზღვრავდა,

²⁶როდესაც წვიმას წესი დაუდგინა და მეხის გვრგვინვას გზა გაუკაფა,

²⁷მაშინ იხილა ის და გამოაცხადა, დააფუძნა და კიდეც გამოსცადა.

²⁸უთხრა ადამიანს: აჰა, უფლის შიშია სიბრძნე და ბოროტისგან განდგომაა შემეცნება.