Read საპატრიარქო იობი 3 Bible Online

იობი 3 - საპატრიარქო bible

იობი 3

¹მაშინ გახსნა იობმა ბაგე და დასწყევლა თავისი დღე.

²ალაპარაკდა იობი და თქვა:

³დაიქცეს ის დღე, როცა მე გავჩნდი, და ღამე, როცა ითქვა, კაცი ჩაისახაო!

⁴დაბნელდეს ის დღე, აღარ მოხედოს მას უფალმა ზეგრდამო, აღარ ინათოს მასზე ნათელმა.

⁵მოიცვას წყვდიადმა და აჩრდილმა სიკვდილისა, ღრუბელი გადაეფაროს, თავზე და დღის სიშავემ შეაძრწუნოს!

⁶ბნელმა წაიღოს ის ღამე! არ გაიხაროს წლის დღეთა შორის! თვეთა რიცხვში აღარ ითვლებოდეს!

⁷აჰა, გაბერწდეს ის ღამე, აღარ ეღირსოს სიხარული!

⁸შეაჩვენონ დღის მაწყევართა, ლევიათანის გამღვიძებელთა!

⁹დაბნელდნენ მისი განთიადის ვარსკვლავები, ელოდოს ნათელს და არ ჩანდეს, ვერ იხილოს ცისკრის წამწამები!

¹⁰რომ საშოშივე არ ჩამიკეტა კარი და არ განმარიდა ამ სატანჯველს!

¹¹რატომ არ მოვკვდი დედის მუცელშივე? რატომ არ გავთავდი გამოსვლისთანავე?

¹²რისთვის ამიქვეს მე მუხლებმა, რა იყო ის ძუძუ, რომელსაც ვწოვდი?

¹³ახლაც ვიწვებოდი დამშვიდებული, ძილში ვიქნებოდი მოსვენებით!

¹⁴მეფეებთან და ქვეყნის მრჩევლებთან, აკლდამებს რომ იშენებენ თავისთვის.

¹⁵ან მთავრებთან, რომელთაც ოქრო აქვთ, ვერცხლით რომ ივსებენ სახლებს.

¹⁶რატომ არ ვარ მკვდრადნაშობივით გადამალული, ჩვილივით, რომელსაც სინათლე არ უნახავს!

¹⁷ბოროტეულნი იქ აღარ მძვინვარებენ, დამაშვრალნი იქ განისვენებენ;

¹⁸იქ მშვიდად არიან ტყვეები, მჩაგვრელთა ყვირილი მათ არ ესმით;

¹⁹იქ არიან დიდნი და მცირენი, იქ მონა ბატონისგან თავისუფალია.

²⁰რისთვის ეძლევა სინათლე ტანჯულს და სულგამწარებულს - სიცოცხლე,

²¹სიკვდილის მონატრულთ და ვერმპოვნელთ, დამარხულ განძზე მეტად რომ ეძებენ;

²²უზომოდ გახარებულს, აღტაცებულს, საფლავის პოვნით,

²³კაცს, გზაგადაკეტილს, ღვთისაგან ალყაში მოქცეულს?

²⁴რადგან ოხვრა მაქვს საზრდოდ და წყალივით იღვრება ჩემი ქვითინი!

²⁵რადგან მეწია შიშისზარი, მე რომ მზარავდა; რასაც ვუფრთხოდი, თავს დამატყდა!

²⁶აღარც სიმშვიდე, აღარც შვება, არც მოსვენება; მოვიდა ვაება.