Read საპატრიარქო იობი 33 Bible Online

იობი 33 - საპატრიარქო bible

იობი 33

¹აბა, მოისმინე, იობ, ჩემი სიტყვები და ჩემს ყოველ სიტყვას მიუგდე ყური.

²აჰა, დავძარი ბაგე, ალაპარაკდა ჩემი ენა ჩემს სასაში.

³გულწრფელია ჩემი სიტყვები და ჩემი ბაგე ნათლად გამოაცხადებს ცოდნას;

⁴ღვთის სულმა შემქმნა მე და ყოვლადძლიერის სუნთქვამ მომანიჭა სიცოცხლე.

⁵თუ შეგიძლია, მიპასუხე! მოემზადე, დაიცავი თავი!

⁶აჰა, მეც შენი მსგავსი ვყავარ ღმერთს, მეც თიხისგან ვარ მოზელილი.

⁷ჩემი შიში შენ არ გაშინებს და ჩემი ხელი შენ არ გამძიმებს.

⁸ჩემს გასაგონად ლაპარაკობდი და მე მესმოდა შენი სიტყვების ხმა:

⁹სუფთა ვარ, უცოდველიო, არა მაქვსო ბრალი;

¹⁰ჯავრი აქვს ჩემი, თავის მტრად შევურაცხივარო;

¹¹ხუნდებში გამაყრევინა ფეხები, ჩემს ყოველ ნაბიჯს უთვალთვალებსო.

¹²აი, ამაში არა ხარ მართალი. მე გეუბნები, რადგან ადამიანზე დიდია ღმერთი.

¹³რატომ ედავები? ის ხომ პასუხს არ აგებს თავის ნამოქმედარზე.

¹⁴ღმერთი ხომ ასეც ლაპარაკობს და ისეც, ვერავინ მიუხვდება.

¹⁵სიზმარში, ღამეულ ჩვენებაში, როცა ძილი წაიღებს ადამიანს, როცა თვლემს თავის საწოლზე,

¹⁶მაშინ ხსნის ღმერთი ადამიანთა ყურებს და თავისი შეგონებებით ბეჭდავს,

¹⁷რომ აარიდოს კაცი ავ საქმეს და დაიცვას ამპარტავნობისგან;

¹⁸რომ იხსნას მისი სული წარწყმედისგან და მისი სიცოცხლე - მახვილით დაღუპვისგან;

¹⁹სატკივარით ისჯება საწოლზე და ეწამება მისი ძვლები;

²⁰მის სიცოცხლეს შესძაგდება პური და მის სულს - გემრიელი საჭმელი;

²¹დადნება ხორცი მისი, უხილავი გახდება; გამოჩნდებიან მისი ძვლები, უხილავნი რომ იყვნენ;

²²მიაწევს საფლავამდე მისი სული და მისი სიცოცხლე - სიკვდილის წლებამდე;

²³თუ აღმოჩნდა ათასში მისი მეოხე ერთი ანგელოზი, რომ ადამიანის სიწრფელე გამოაცხადოს,

²⁴შეიბრალოს და თქვას: ნუ გასწირავ საფლავად ჩასვლისთვის, ნაპოვნი მაქვსო გამოსასყიდი,

²⁵განუახლდება ხორცი ადრინდელზე უფრო და სიყმაწვილის ხანას დაუბრუნდება.

²⁶ის ლოცვას აღუვლენს ღმერთს, ღმერთი კი შეიწყალებს მას და სიხარულით შეხედავს მის სახეს, დაუბრუნებს მის სიმართლეს;

²⁷ის იმღერებს კაცთა წინაშე და ეტყვის: ვცოდე მე, სწორი გავამრუდე, მაგრამ არ მომაგო საკადრისადო.

²⁸იხსნა ჩემი სული საფლავში ჩასვლისაგან და, აჰა, ჩემი სიცოცხლე ნათლის ჭვრეტაშიაო.

²⁹აჰა, ყველაფერს ამას ორგზის, სამგზის უკეთებს ღმერთი ადამიანს,

³⁰რომ გამოაბრუნოს მისი სული საფლავიდან და სიცოცხლის ნათლით გაანათლოს.

³¹ყური დამიგდე, იობ, მომისმინე, დადუმდი და მე ვილაპარაკებ.

³²თუ სათქმელი გექნება, მიპასუხე, რადგან მწადია შენი გამართლება.

³³თუ არა და, მე მისმინე, დადუმდი, მე გასწავლი სიბრძნეს.