Read საპატრიარქო იობი 34 Bible Online

იობი 34 - საპატრიარქო bible

იობი 34

¹კვლავ მიუგო ელიჰუმ და უთხრა:

²ისმინეთ, ბრძენებო, ჩემი სიტყვები! ყური მომაპყარით, გაგებულნო!

³რადგან ყური გამოსცდის სიტყვებს და სასა გემოს უგებს საჭმელს:

⁴ავირჩიოთ, რაც სამართლიანია და ვიცოდეთ ჩვენს შორის, რა არის უკეთესი.

⁵კი თქვა იობმა, მართალი ვარო და ღმერთმა წამართვაო სამართალი;

⁶მართალი გავმტყუნდი, უდანაშაულოდ მჭირსო ეს წყლული.

⁷თუ არის ვინმე იობის მსგავსი, წყალივით რომ სვამდეს გმობას?

⁸ავისმქნელებთან შეთქმულებას ესწრაფოდეს, რომ ბოროტეულ ხალხთან იაროს?

⁹რადგან ამბობს: რას არგებს კაცს ღვთისმოსავობაო?

¹⁰ამიტომ მისმინეთ, გულისხმიერნო! შორს იყოს ღმერთი ბოროტებისგან და ყოვლადძლიერი უსამართლობისგან!

¹¹რადგან საქმისამებრ მიუზღავს ადამიანს და მისი საქციელისამებრ შეამთხვევს კაცს.

¹²ჭეშმარიტად, არ ბოროტობს ღმერთი და არ ამრუდებს სამართალს ყოვლადძლიერი!

¹³ვინ ჩააბარა მას მიწა და ვინ მიანდო მას მთელი სამყარო?

¹⁴თუ თავისკენ მიაბრუნა თავისი სული და უკანვე წაიღო თავისი სუნთქვა,

¹⁵ერთიანად გაწყდება ყოველი ხორციელი და მიწად მიიქცევა ადამიანი;

¹⁶თუ გაგება გაქვს, მოისმინე ეს, ყური უგდე ჩემს სიტყვებს:

¹⁷იხელმწიფებს განა სამართლის მოძულე? ბრალს დასდებ განა მართალს, ძალმოსილს?

¹⁸ვინც ეუბნება მეფეს: არამზადავ! და დიდებულებს: ბოროტეულო!

¹⁹ვინც მთავრებს არ მიჰკერძავს და ვინც არ განარჩევს მდიდარს და ღარიბს, რადგან ყველანი მისი ხელით არიან შექმნილნი.

²⁰წამში იხოცებიან, შუაღამისას შებარბაცდება კაცი და იღუპება; ძლიერი წარიტაცებს მას არა კაცის ხელით;

²¹რადგან მისი თვალი კაცის გზებს დაჰყურებს და ხედავს მის ყოველ ნაბიჯს;

²²ვერც ბნელში, ვერც შავეთში ვერ დაიმალება ბოროტმოქმედი;

²³რადგან კაცისთვის არ დაუწესებია ჟამი ღმერთთან მისასვლელ სამსჯავროზე.

²⁴ის მუსრავს ძლიერებს განუკითხავად და სხვებს წამოსწევს მათ ადგილზე.

²⁵რადგან მან უწყის მათი ნამოქმედარი, ღამით დაამხობს მათ და შეიმუსრებიან,

²⁶როგორც ბოროტეულთ შემოჰკრავს ყველას დასანახად;

²⁷რადგან ზურგი შეაქციეს მას და არ შეიმეცნეს მისი გზები;

²⁸რადგან მის ყურამდე მიიტანეს ბედშავთა კვნესა და დაჩაგრულთა კვნესა ესმის მას.

²⁹როცა დუმს ის, ვინ არის მისი მბრალმდებელი? როცა იფარავს სახეს, ვინ არის მისი მხილველი? ხალხი იქნება თუ ერთი კაცი?

³⁰რომ არ იხელმწიფოს უღვთომ, რომ მახე არ დაუგოს ხალხს.

³¹რადგან ღმერთს უნდა ეუბნებოდეს კაცი: დავაშავე, აღარ შევცოდავო.

³²შენ მასწავლე, რასაც მე ვერ ვხედავ: თუ ცოდვა მაქვს ჩადენილი, აღარ ჩავიდენო.

³³შენგნით მიუზღავს ის სამართალს? როგორც შენ დაგიგმია, როგორც შენ აგირჩევია და არა როგორც მე? ილაპარაკე, რაც იცი!

³⁴გაგებული ხალხი ჩემსავით იფიქრებს და ბრძენი კაცები დამეთანხმებიან.

³⁵იობი უგუნურად ლაპარაკობს და სიბრძნე აკლია მის სიტყვებს.

³⁶ოჰ, ერთი გამოიცდებოდეს იობი საბოლოოდ, უკეთურთა მსგავსად რომ პასუხობს!

³⁷რადგან თავის ცოდვას ახალი დანაშაული მიუსართა: ხელი ხელს შემოჰკრა ჩვენს შორის და გაამრავლა სიტყვები ღვთის წინააღმდეგ.