Read საპატრიარქო იობი 36 Bible Online

იობი 36 - საპატრიარქო bible

იობი 36

¹განაგრძო ელიჰუმ და თქვა:

²ცოტა მაცალე და გაგიცხადებ, რომ კიდევ არის სიტყვები ღვთის გასამართლებლად:

³შორიდან წამოვიღებ ჩემს აზრს და ჩემს შემქმნელს მივაგებ სიმართლეს.

⁴რადგან, ჭეშმარიტად, არ არის სიცრუე ჩემს სიტყვებში, წრფელია ჩემი ფიქრები შენს წინაშე.

⁵აჰა, ძლიერია ღმერთი, მაგრამ არავინ სძულს, ის სიბრძნის ძალით არის ძლიერი;

⁶ის არ აცოცხლებს ბოროტეულს და დაჩაგრულებს სამართალს აძლევს;

⁷მართალს თვალს არ არიდებს, მეფეებთან ერთად ტახტზე სვამს სამარადისოდ და აღზევდებიან ისინი;

⁸თუ ვინმეს ადევს ბორკილები და სივაგლახის საკვრელებით არის შეკრული,

⁹გამოუცხადებს მათსავე ნამოქმედარს და ცოდვებს. თუ რაოდენ დამძიმდნენ ისინი;

¹⁰გაუხსნის ყურებს შეგონებისთვის და ეტყვის, რომ განერიდონ უკეთურებას;

¹¹თუ გაუგონებენ და დაემორჩილებიან, დღეებს სიკეთეში დაასრულებენ და წლებს - ნეტარებაში;

¹²თუ არ გაუგონებენ, მახვილით დაიღუპებიან და უგუნურად დაიხოცებიან;

¹³გულხენეშნი რისხვით არიან ატანილნი, შველას არ ითხოვენ, როცა ბორკავს მათ;

¹⁴სიყრმეშივე კვდება მათი სული და გარყვნილებაში გადის მათი სიცოცხლე;

¹⁵ის იხსნის გაჭირვებულს გასაჭირითვე და სატანჯელით ყურს უხსნის მათ.

¹⁶შენც გამოგიყვანდა სივიწროვიდან სიფართოვეში, გაშლილ ადგილზე და შენი სუფრა სავსე იქნებოდა ნუგბარი საჭმელებით;

¹⁷შენ კი სავსე ხარ ბოროტეულის ბრალით, ხოლო ბრალი და სასჯელი კი ერთმანეთს არიან მოჭიდებულნი.

¹⁸ბრაზმა სასაცილოდ არ გაგხადოს, დიდმა გასამრჯელომ არ გადაგხაროს.

¹⁹თუ გიშველის ყვირილი გასაჭირში ან მთელი შენი ძალისხმევა?

²⁰ნუ ესწრაფი ღამეს, როცა ხალხები აიყრებიან თავიანთი ადგილებიდან;

²¹ფრთხილად იყავი, არ მიიქცე ბოროტისკენ, რადგან ამით სატანჯველს ირჩევ.

²²აჰა, ღმერთი ზეობს თავისი ძლიერებით, ვინ არის მისი მსგავსი მოძღვარი?

²³ვის დაუწესებია მისთვის გზები? ვის უთქვამს, ბოროტება გაქვსო ჩადენილი?

²⁴გახსოვდეს, რომ ადიდო მისი საქმენი, რომელთაც უგალობენ ადამიანები.

²⁵მთელი კაცთა მოდგმა ხედავს მათ და შორადანვე ამჩნევს კაცი.

²⁶აჰა, მაღალია ღმერთი და ვერ შეგვიცვნია; აღურაცხელია მისი დროჟამი.

²⁷შემოიკრებს წყლის წვეთებს და წვიმად და ორთქლად აფრქვევს მათ;

²⁸რაც ღრუბლებიდან იღვრება, ხალხთა სიმრავლეს ესხურება;

²⁹თუ მიხვდება ვინმე ღრუბელთა ხლეჩას, ჭექა-ქუხილს მისი კარვიდან?

³⁰აჰა, გამოუტევებს ნათელს თავის გარშემო და ჩამალავს ზღვის უფსკრულებში;

³¹რადგან მით განსჯის ხალხებს და უხვად იძლევა საზრდოს;

³²ელვა ფარავს მის ხელებს და გზავნის მას მტრების წინააღმდეგ;

³³თავისი გრგვინვით აცხადებს თავს, ჯოგი წინათგრძნობს მის მოახლოებას.