Read საპატრიარქო იობი 39 Bible Online

იობი 39 - საპატრიარქო bible

იობი 39

¹თუ იცი ჯიხვთა დაბადების ჟამი? ფურირმის მყვირალობა თუ შეგინიშნავს?

²თუ დაგითვლია მისი მაკეობის თვეები? ან თუ იცი ჟამი მოგებისა?

³ჩაიმუხლებენ, გამოაგდებენ ნაშიერთ, უამდებათ შობის ტკივილები.

⁴მაგრდებიან მათი შვილები, იზრდებიან ტრიალ მინდორზე, იფანტებიან და უკან აღარ უბრუნდებიან.

⁵ვინ გაუშვა ნებაზე კანჯარი და ველურ ვირს საბელი ვინ გაუხსნა,

⁶რომელსაც უდაბნო მივეცი სახლად და სამყოფლად - მლაშობი?

⁷ქალაქის ხმაურს არად აგდებს და გამრეკის შეძახილებს არ უსმენს.

⁸მთებზე საძოვრად დაეხეტება და ყოველგვარ სიმწვანეს დაეძებს.

⁹თუ ისურვებს მარტორქა შენს სამსახურს? შენს ბაგებთან თუ დაიღამებს?

¹⁰ბაწრით თუ დააკავებ მარტორქას ხნულთან? თუ დაგიფარცხავს ნახნავებს შენს უკან?

¹¹თუ დაენდობი მის ძლიერებას და შენს საშრომელს თუ მიანდობ?

¹²თუ გექნება იმედი, რომ თესლს დაგიბრუნებს და კალოზე დაგიხვავებს?

¹³ხალისობენ სირაქლემას ფრთები, მაგრამ სიყვარულის ნაკრეტენი და ბუმბულია ისინი?

¹⁴რადგან მიწაზე დებს თავის კვერცხებს და ქვიშაში ათბობს მათ;

¹⁵ავიწყდება, რომ ფეხით გაიჭეჭყება და ველის მხეცი გათელავს მას.

¹⁶სასტიკად ექცევა თავის ბარტყებს, თითქოს მისები არ ყოფილიყვნენ; ამაოა მისი გარჯა სიფრთხილის გარეშე;

¹⁷რადგან ღმერთმა დაუკავა მას ჭკუა და წილად არ არგუნა გონება;

¹⁸რაჟამს შეიმართება გასაფრენად, დასცინის ცხენსა და მხედარს.

¹⁹შენ მიეცი ცხენს ძლიერება? შენ შემოსე ფაფრით მისი კისერი?

²⁰შენ ახტუნებ მას კალიასავით? მისი მჭახე ჭიხვინი ზარდამცემია!

²¹მიწას თხრის ველზე და ხარობს, ძლიერი ჭენებით მახვილს ეგებება.

²²შიშს დასცინის, არ ფრთხება და მახვილისგან პირს არ აბრუნებს;

²³მის თავზე ჟღრიალებს კაპარჭი, ელავს შუბისწვერი და ჰოროლი.

²⁴გრიალ-დგანდგარში ყლაპავს მიწას და ბუკის ხმა ვერ აკავებს;

²⁵ბუკის ცემაზე, იტყვის: აჰა! და შორითვე იყნოსავს ბრძოლას, სარდლის შეძახილებს და ყიჟინას.

²⁶შენს ჭკუაზე ნავარდობს ქორი და სამხრეთისკენ მიფრინავს ფრთაგაშლილი?

²⁷შენს ბრძანებაზე აღმაფრენს არწივი და იკეთებს მაღლა თავის ბუდეს?

²⁸კლდეზე სახლობს და ათევს ღამეს, კლდის ქიმია მისი ციხე-სიმაგრე;

²⁹იქიდან ეძებს საკვებს, შორიდანვე ჭვრეტს მისი თვალი;

³⁰მისი მართვენი სისხლს ხვრეპენ და სადაც ლეშია, იქ გაჩნდება.