Read საპატრიარქო იობი 4 Bible Online

იობი 4 - საპატრიარქო bible

იობი 4

¹მიუგო ელიფაზ თემანელმა და უთხრა:

²რომ ვცადოთ შენთან ლაპარაკი, ვაითუ დაგიმძიმდეს სატკივარი. მაგრამ ვის ძალუძს დადუმება?

³შენ ხომ ბევრს არიგებდი ჭკუას და დაუძლურებულ მკლავებს განამტკიცებდი,

⁴წაქცეულს ფეხზე აყენებდი შენი სიტყვით და ჩაკეცილ მუხლებს აღონიერებდი.

⁵ახლა შენ დაგიდგა ჯერი და ილაჯი გაგიწყდა; შენ გეწია და შეძრწუნდი!

⁶განა მოშიშება არ გქონდა სასოდ? განა შენი სიალალის იმედი არ გქონდა?

⁷გაიხსენე, თუ ვინმე დაღუპულა უდანაშაულო, მართალნი თუ ამომწყდარან?

⁸როგორც მინახავს, სიავის მხვნელნი და სიცრუის მთესველნი მასვე მოიმკიან.

⁹უფლის სუნთქვაზე დაიღუპებიან და მისი რისხვის ქარზე გაწყდებიან.

¹⁰ლომის ღრიალი მიწყდება და მხეცის კბილები შეიმუსრება;

¹¹ლომი უნადავლოდ დაიღუპება, ძუ ლომის ბოკვერნი გაიფანტებიან;

¹²იდუმალ მომეპარა სიტყვა და ჩურჩული ჩამესმა ყურში;

¹³ღამეულ ჩვენებებში ფიქრების დროს, როცა ძილბურანს მიაქვს კაცი,

¹⁴შიშმა შემიპყრო და ყოველი ძვალი ჩემი შეაძრწუნა;

¹⁵წინ ჩამიქროლა სულმა და ტანზე თმები ამებურძგლა.

¹⁶შედგა, მაგრამ ვერ გავარჩიე მისი სახე, რაღაც ხატება იყო ჩემ თვალწინ, დუმილი და, აჰა, მერე ხმა გავიგონე:

¹⁷ღმერთზე მართალია ადამიანი? თავის შემქმნელზე წმიდაა კაცი?

¹⁸აჰა, თავის ყმებში შეაქვს ეჭვი და თავის ანგელოზებშიც კი პოულობს ნაკლს!

¹⁹რაღა ითქმის თიხის სახლებში მცხოვრებლებზე, მტვერში რომ უდგათ საფუძველი? მღილებზე უმალ რომ იჭყლიტებიან?

²⁰დილასა და მწუხრს შორის რომ იღუპებიან, სამარადისოდ ქრებიან უსახელოდ?

²¹აჰა, გაწყდება მათი სიცოცხლის ძაფი და უაზროდ დაიხოცებიან.