Read საპატრიარქო იობი 40 Bible Online

იობი 40 - საპატრიარქო bible

იობი 40

¹მიუგო უფალმა იობს და უთხრა:

²რას ედავება ყოვლადძლიერს შარიანი კაცი? ღვთის მამხილებელი ამაზე პასუხს აგებს.

³მიუგო იობმა უფალს და უთხრა:

⁴აჰა, ნამცეცი ვარ, რა გიპასუხო? პირზე მაქვს ხელი მიდებული.

⁵ერთხელ ვთქვი და მეტს აღარ ვიტყვი, მეორეჯერაც და - დავდუმდები.

⁶მიუგო უფალმა იობს გრიგალიდან და უთხრა:

⁷შემოისარტყლე წელი მამაკაცურად, შეგეკითხები და გამაგებინე:

⁸გინდა გააუქმო ჩემი სამართალი, გამამტყუნო, რომ თავად გამართლდე?

⁹იქნებ ღვთისდარი მკლავი გაქვს და მისი ხმით გრგვინვა შეგიძლია?

¹⁰აბა, შეიმკე დიდებით და სიდიადით! აბა, შეიმოსე ნათელი და შარავანდი!

¹¹აბა, გადმოაფრქვიე შენი რისხვის ცეცხლი! დახედე განდიდებულს და დააკნინე!

¹²დახედე განდიდებულს და დაამდაბლე, ადგილზევე გააცამტვერე ბოროტეულნი!

¹³მტვერში ჩამარხე ერთიანად და შავეთში მობურე მათი პირისახე.

¹⁴მაშინ მეც დაგიჯერებ, რომ შენს მარჯვენას ძალუძს შენი გადარჩენა.

¹⁵აჰა, ბეჰემოთი, შენთან ერთად რომ შევქმენი, ჭამს ხარივით ბალახს.

¹⁶აჰა, ძალა მისი მის წელშია, მისი სიმაგრე - მუცლის კუნთებშია;

¹⁷ნაძვივით დრეკს თავის კუდს, თეძოების ძარღვები გადაგრეხილი აქვს;

¹⁸მისი ძვლები სპილენძის მილებია, მისი სახსრები - რკინის წნელები;

¹⁹ის პირველია ღვთის ქმნილებებში, მხოლოდ მისი გამჩენი თუ დაჰკრავს მახვილს;

²⁰მთები აძლევს მას საზრდოს და ველის ყოველი მხეცი იქ ერთობა.

²¹ლაქაშებში წვება, ლერწმის საფარში და ჭაობებში;

²²ლაქაშები ჩრდილს აფენს მას, ღელის ძეწნები გარს ახვევია;

²³აჰა, ბობოქრობს მდინარე, ის კი არ ფრთხება, მშვიდად არის, თუნდაც იორდანე მიეღვაროს პირში.

²⁴თვალით ვინ დაიჭერს მას, მახით ვინ გაუხვრეტს ცხვირს?