Read საპატრიარქო იობი 41 Bible Online

იობი 41 - საპატრიარქო bible

იობი 41

¹თუ ამოათრევ ანკესით ლევიათანს და ბაწრით თუ დაუბამ ენას?

²ცხვირში თუ გაუყრი კაუჭს და ყბაში ჩანგალს თუ მოსდებ?

³თუ დაგიწყებს ბევრ ვედრებას ანთუ ტკბილი სიტყვით დაგეუბნება?

⁴თუ დაგიდებს აღთქმას ანთუ სამუდამო ყმად გაიხდი?

⁵თუ დაუწყებ თამაშს, როგორც ჩიტს რასმე, თუ დააბამ შენი გოგონებისთვის?

⁶თუ მოივაჭრებენ მას მოვაჭრენი, თუ დაანაწილებენ ქანაანელთა შორის?

⁷თუ დაუფარავ კანს ჰოროლებით და თავს - ბარჯებით?

⁸შეახე მას ხელი და გახსოვდეს ბრძოლა, მეტს აღარ ეცდები.

⁹აჰა, უმტყუნებს მას იმედი, მის ერთ შეხედვაზე დაეცემა.

¹⁰მის აღძვრას ვერავინ ბედავს თუ მე ვინღა დამიდგება წინ?

¹¹ვისი რა მმართებს, რომ გადავუხადო? ყველაფერი ჩემია ცისქვეშეთში.

¹²არ შევწყვეტ სიტყვას მისი სხეულის ასოებზე, მის ძლიერებაზე და მისი აღნაგობის სილამაზეზე.

¹³ვინ გახდის მას ზედა სამოსელს? მის ორ ყბას შუა ვინ შეაღწევს?

¹⁴მისი პირისახის კარს ვინ გააღებს? მის კბილთა ირგვლივ საშინელებაა!

¹⁵მისი ზურგი დელამფართა წყებაა, მჭიდრო ბეჭდებით შეკრული;

¹⁶ერთი მეორეზეა მიჯრილი და ქარი არ ატანს მათ შორის;

¹⁷ერთმანეთს შეეწებნენ, შედუღდნენ და აღარ სცილდებიან;

¹⁸მისი დამცხიკვება შუქს აფრქვევს, მისი თვალები განთიადის წამწამებია;

¹⁹მისი პირიდან მაშხალები გამოდის, ცეცხლის ნაკვერჩხლები ცვივიან;

²⁰ნესტოებიდან კვამლს უტევებს, როგორც მდუღარე ქვაბი, როგორც ნახანძრალი ლერწამი;

²¹მისი სუნთქვა მუგუზლებს აღვივებს და მისი პირიდან ალი გამოდის;

²²მის ქედზე ძალაა დავანებული და მის წინაშე როკავს შიში;

²³ხორცის ნაკვთები მისი შენივთულია ერთმანეთთან, მკვრივად აფენია, შეუძვრელად;

²⁴ქვასავით მკვრივია მისი გული, მკვრივია ქვედა დოლაბივით.

²⁵წამოიმართება და ფრთხებიან ძლიერნი, თავზარდაცემისგან გონს კარგავენ;

²⁶მახვილი ვერ უძლებს მას, ვერც შუბი, ვერც ჰოროლი, ვერც ჯავშანი;

²⁷რკინა ჩალად უჩანს და ფუტურო ხედ - რვალი;

²⁸ვერ გააქცევს მას მშვილდის ნასხლეტი, თივის ბულულია მისთვის შურდულის ქვები;

²⁹ბზედ უჩანს ლახტი და ლახვრის შხუილზე ეღიმება;

³⁰წამახული ქვები აქვს მუცლის ქვეშ, განრთხმულია კევრივით ჭონჭყოში;

³¹ქვაბივით ადუღებს უფსკრულს, ზღვას საცხებლის კოჭობად აქცევს;

³²თავის უკან ასხივებს ბილიკს, ჭაღარად ჩნდება ზღვის მორევი;

³³არ არის მიწაზე მისი მსგავსი, უშიშრად არის გაჩენილი;

³⁴ყოველი მაღლის მჭვრეტელია, მეფობს ყოველ ამპარტავანზე.