Read საპატრიარქო იობი 5 Bible Online

იობი 5 - საპატრიარქო bible

იობი 5

¹შეჰღაღადე, ვინ გიპასუხებს? წმიდათაგანს ვის მიმართავ?

²უგუნურს ღუპავს ბრაზი, ბრიყვს შური კლავს.

³მე ვნახე ფესვგადგმული უგუნური და მეყსეულად შევაჩვენე მისი ბინა.

⁴შორს არიან მისი შვილები ხსნისაგან, კარიბჭესთან სცემეს მათ და არავინ იყო მშველელი.

⁵რასაც მოიმკის, მშიერი შეუჭამს, ეკლებიდანაც კი ააცლიან. მწყურვალი კაცი შთანთქავს მათ დოვლათს.

⁶რადგან სატკივარი მტვერიდან არ ამოდის და მიწიდან არ აღმოცენდება სატანჯველი.

⁷ადამიანი სატანჯველად იბადება და ნაბერწკლებივით მაღლა მიისწრაფის.

⁸ისევ ღმერთს დავეკითხები და ღმერთს მივანდობ ჩემს საქმეს,

⁹შემოქმედს სიდიადეთა და გამოუკვლეველ საკვირველებათა, რომელთაც არა აქვს რიცხვი,

¹⁰მაწვიმებელს მიწის პირზე და წყლის გამომგზვნელს ყანების პირზე,

¹¹რათა მდაბალნი აამაღლოს და დამწუხრებულნი ხსნად აღზევდნენ.

¹²ის ფუშავს ცბიერთა ზრახვებს და მათი ხელები ვეღარ ასრულებენ ჩანაფიქრს.

¹³ის იჭერს ბრძენკაცებს მათივე ცბიერებით და ხრიკიანთა თათბირი ფუჭი ხდება.

¹⁴დღისით უკუნეთს აწყდებიან და ხელისცეცებით დადიან შუადღისას, როგორც ღამეში.

¹⁵ის იხსნის ღატაკს მახვალისგან, მათი პირიდან და მაგარი ხელიდან.

¹⁶ბეჩავი კაცი იმედით ცოცხლობს, უკეთურება კი პირს მუწავს.

¹⁷აჰა, ნეტარია კაცი, რომელსაც ამხილებს ღმერთი! ყოვლადძლიერის შეგონებას ნუ უკუაგდებ!

¹⁸ის წყლავს და ისევ უხვევს ჭრილობებს, ის ჰგვემს, მაგრამ კურნავს თავისივე ხელით.

¹⁹ექვს განსაცდელში დაგიჭარავს და მეშვიდეგზის ბოროტება არ შეგემთხვევა.

²⁰შიმშილობის დროს სიკვდილისგან გიხსნის და ომში - მახვილისგან,

²¹ენის შოლტს დაემალები და არ შეგეშინდება განადგურებისა, როცა კი მოვა.

²²განადგურებაზე და შიმშილზე გაგეცინება და მიწის მხეცებისა არ შეგეშინდება.

²³რადგან ყანის ქვებთან აღთქმა გექნება და ველის მხეცებთან მშვიდობაში იქნები.

²⁴დაინახავ, რომ მშვიდობაა შენს კარავში, თვალს მოავლებ შენს საცხოვრებელს და დანაკლისი არ გექნება.

²⁵დაინახავ, რომ გამრავლდა შენი მოდგმა და მიწის ბალახივითაა შენი ნაშიერი.

²⁶სისრულით ჩახვალ სამარეში, როგორც პურის ძნა შემოდის თავის დროზე.

²⁷აი, ეს არის, რაც გამოვიკვლიეთ, ეს ჭეშმარიტებაა! შეისმინე და იცოდე შენთვის!