Read საპატრიარქო იობი 6 Bible Online

იობი 6 - საპატრიარქო bible

იობი 6

¹მიუგო იობმა და უთხრა:

²რომ აწონილიყო ჩემი წუხილი და ჩემი ტანჯვა ერთბაშად დადებულიყო სასწორზე,

³ახლა ზღვის ქვიშაზე უფრო მძიმე იქნებოდა; ამიტომაც სიმწრით არის სავსე ჩემი სიტყვები.

⁴რადგან ჩარჭობილი მაქვს ყოვლადძლიერის ისრები და შხამს წოვს ჩემი სული. ღვთის საშინელებებმა შემომიტიეს.

⁵ყროყინებს გარეული ვირი საბალახოზე? თუ ბღავის ხარი თავის თივის წინ?

⁶თუ ჭამენ უგემურს, უმარილოს? თუ არის რაიმე გემო კვერცხის ცილაში?

⁷გული არ მიმდის, ისეთი საძაგელია ჩემი პური.

⁸ნეტავ ახდებოდეს ჩემი ნატვრა და გამიმართლებდეს იმედს ღმერთი!

⁹ნეტავ ინებებდეს ღმერთი და დამლეწავდეს, აუშვებდეს ხელს და გამკვეთავდეს!

¹⁰იქნებოდა კიდევ ნუგეში და უწყალო სატანჯველში ვინეტარებდი, რადგან არ უარმიყვია წმიდის სიტყვები.

¹¹რა არის ჩემი ძალა, რომ დავენდო? რა არის ჩემი ბოლო, რომ დავითმინო?

¹²განა ქვის ძალაა ჩემი ძალა, განა სპილენძია ჩემი ხორცი?

¹³აღარ არის იმედი ჩემში, წარკვეთილი მაქვს გადარჩენის სასო.

¹⁴გაწამებულს მეგობრისგან აქვს წყალობა, თუნდაც დაივიწყოს ყოვლადძლიერის შიში.

¹⁵ჩემი მოძმენი მუხანათობენ ხევებივით, ხევების ღვარივით მიედინებიან.

¹⁶ყინულისგან ჩაშავებულნი, მათ ქვეშ თოვლი იმალება.

¹⁷გადნებიან და გაქრებიან; დააცხუნებს და ადგილზევე აორთქლდებიან,

¹⁸იცვლიან კალაპოტებს, გადიან უდაბნოში და იკარგებიან,

¹⁹თემას გზებს გაჰყურებენ, შებას სავალნი ელოდება მათ;

²⁰შერცხვებიან, იმედი რომ ჰქონდათ, მივლენ იქ და გაფითრდებიან.

²¹რადგან ახლა არარაობა ხართ, იხილეთ საშინელება და შეძრწუნდით,

²²ხომ გითხარით, მომიტანეთ-მეთქი, თქვენი დოვლათიდან გაიღეთ-მეთქი ჩემი გულისთვის,

²³დამიხსენით მტრის ხელიდან და მძლავრთა ხელიდან გამომისყიდეთ,

²⁴მასწავლეთ და დავდუმდები, გამაგებინეთ ჩემი ბრალი-მეთქი.

²⁵როგორ ჭრის მართალი სიტყვა! მაგრამ რა ძალა აქვს თქვენს საყვედურებს?

²⁶როგორ შეთხზავთ სასაყვედურო სიტყვებს! ქარს მიაქვს სასოწარკვეთილის ნათქვამი.

²⁷ობოლზეც კი წილსა ყრით და ძირს უთხრით თქვენს მეგობარს.

²⁸ახლა კი მომხედეთ მე, თუ ვიცრუო თქვენს წინაშე.

²⁹მობრუნდით, არ იქნება ტყუილი! ჰო, მობრუნდით, ჩემი სიმართლეა აქ!

³⁰აბა თუ არის ჩემს ენაზე ტყუილი? თუ ვერ ხვდება ჩემი სასა ბოროტებას?