Read საპატრიარქო იობი 8 Bible Online

იობი 8 - საპატრიარქო bible

იობი 8

¹მიუგო ბილდად შუხელმა და უთხრა:

²როდემდე უნდა ლაპარაკობდე ასე? ამოვარდნილი ქარია შენი ბაგის სიტყვები.

³შეცვლის ღმერთი სამართალს? შეცვლის ყოვლადძლიერი სიმართლეს?

⁴შენმა შვილებმა შესცოდეს მას და მანაც ხელში ჩაუგდო ისინი მათსავე დანაშაულს.

⁵თუ შენ ღმერთისკენ მიისწრაფი და შეწყალებას ევედრები ყოვლადძლიერს,

⁶თუ სუფთა და წრფელი ხარ, ის ახლავე იფხიზლებს შენთვის და შენს უმწიკვლო საცხოვრებელს აღგიდგენს.

⁷და თუ შენი დასაბამი მცირე იყო, შენი საბოლოო დიდად გაიზრდება.

⁸ერთი შეეკითხე გარდასულ თაობებს და ყურად იღე მამა-პაპის სიბრძნე.

⁹(რადგან გუშინდელნი ვართ ჩვენ და არაფერი ვიცით, რადგან ჩრდილია ჩვენი დღეები ამ ქვეყანაზე).

¹⁰განა არ დაგმოძღვრავენ და არ გეტყვიან, და გულიდან არ აღმოუტევებენ სიტყვებს?

¹¹თუ იზრდება ლერწამი უჭაობოდ? თუ ამოდის შამბნარი უწყლოდ?

¹²ვიდრე ნედლია, არ ჭრიან და ყველა ბალახზე ადრე ჭკნება.

¹³ასეთი ბოლო აქვს ყველას, ღვთის დამვიწყებელს, და უკეთურის მოლოდინი გაქარწყლდება,

¹⁴მისი სასო წარიკვეთება და მისი იმედი ობობას სახლია;

¹⁵დაენდობა თავის სახლს და ვერ გაუძლებს, მოეჭიდება და ვერ დაიჭერს;

¹⁶ამწვანებულია მზის გულზე და მთელს ბაღზე გადმოშლილი აქვს ტოტები;

¹⁷ქვების გროვაში იხლართება მისი ფესვები, ლოდებს შორის დაუდევს ბინა;

¹⁸თუ ამოგლიჯეს თავისი ადგილიდან, უარყოფს მას, არასოდეს მინახიხარო.

¹⁹აჰა, წარხდა სიხარული მის გზაზე! მიწიდან კი სხვა აღმოცენდება.

²⁰იცოდე, ღმერთი არ შეიძულებს უმწიკვლოს და ხელს არ აღუპყრობს ბოროტისმოქმედთ!

²¹კიდევ აგივსებს პირს ღიმილით და ბაგეებს მხიარული ყიჟინით.

²²შენი მოძულენი სირცხვილს შეიმოსენ და უკეთურთა კარავი განქარდება.