Read საპატრიარქო ფსალმუნები 101 Bible Online

ფსალმუნები 101 - საპატრიარქო bible

ფსალმუნები 101

¹ლოცვა გლახაკისა, ოდეს იტანჯება და უფლის წინაშე გადმოღვრის თავის გულისნადებს. უფალო, ისმინე ჩემი ლოცვა და ჩემი ღაღადისი შენთან მოვიდეს.

²ნუ დაფარავ შენს სახეს ჩემგან, ჩემი გაჭირვების ჟამს მომაპყარ ყური; რომელ დღესაც მოგიხმობ, მსწრაფლ მიპასუხე.

³რადგან გაქრნენ კვამლივით ჩემი დღეები და ჩემი ძვლები დაიბუგა, როგორც კოცონზე.

⁴დაჭკნა ბალახივით და გახმა ჩემი გული, რადგან დამავიწყდა ჩემი პურის ჭამა.

⁵ჩემი კვნესის ხმისაგან მიჰკვრია ჩემი ძვლები ჩემს ხორცს.

⁶ვემსგავსე ვარხვსა უდაბნოსას, გავხდი ვითარცა ბუკიოტი ნანაგრევებში.

⁷უძილო ვიქმენ და ვზივარ, ვითარცა ეული ჩიტი სახურავზე.

⁸ყოველდღე მლანძღავენ ჩემი მტრები, ჩემი განმქიქებელნი ჩემს სახელს საწყევრად აქცევენ.

⁹რადგან ნაცარი პურივით ვჭამე და ჩემი სასმელი ცრემლით შევაზავე;

¹⁰შენი რისხვისა და გულისწყრომის გამო, რომ ამიყვანე და დამანარცხე.

¹¹ჩემი დღეები გადახრილი ჩრდილივითაა და მე ბალახივით ვხმები.

¹²შენ კი უფალო, საუკუნოდ იარსებებ და შენი სახსენებელი თაობიდან თაობამდე იქნება.

¹³შენ კი აღსდექ, შეიწყალე სიონი, რადგან ჟამია მისი შეწყალებისა, რადგან მოვიდა დრო.

¹⁴რადგან ისურვეს შენმა მორჩილებმა მისი ქვები და მისი მტვერი ენანებათ.

¹⁵შეეშინდებათ ხალხებს უფლის სახელისა და ყველა მეფეს ამქვეყნიერს - შენი დიდებისა.

¹⁶რადგან აღაშენებს უფალი სიონს, გამოცხადდება თვისი ღირსებით.

¹⁷მოხედავს ლოცვას გულმოდრეკილთა და არ დაამცირებს მათ ლოცვას.

¹⁸დაიწერება ეს მომავალი თაობისათვის და ხალხი, რომელიც გაჩნდება, ადიდებს უფალს.

¹⁹რადგან გადმოიხედა თავისი წმიდა სიმაღლიდან უფალმა, ციდან ქვეყანა მოიხილა.

²⁰რომ მოესმინა კვნესა პატიმრისა, გაეთავისუფლებინა სიკვდილის ძენი.

²¹რათა აუწყონ სიონზე სახელი უფლისა და ქება მისი - იერუსალიმში.

²²როცა შეგროვდებიან ხალხები ერთად და სამეფონი უფლის სამსახურებლად.

²³გაასავათა გზაში ჩემი ძალა, შეამცირა დღენი ჩემნი.

²⁴ვეტყვი: ღმერთო ჩემო! ნუ მომტაცებ დღეებს ნახევარგზაზე; თაობიდან თაობამდეა შენი წლები;

²⁵უწინ დედამიწა დააფუძნე და შენთა ხელთა ნასაქმარია ზეცა.

²⁶ისინი დაიღუპებიან, შენ კი იარსებებ; ყველანი ტანსაცმელივით დაძველდებიან; სამოსელივით გამოიცვლი მათ და შეიცვლებიან.

²⁷შენ კი იგივე ხარ და შენი წლები არ დაილევიან.

²⁸ძენი მორჩილთა შენთა დამკვიდრდებიან და შთამომავალი მათი შენს წინაშე წარიმართება.