Read საპატრიარქო ფსალმუნები 103 Bible Online

ფსალმუნები 103 - საპატრიარქო bible

ფსალმუნები 103

¹აკურთხე, სულო ჩემო, უფალი; უფალო, ღმერთო ჩემო, დიდი ხარ ფრიად, სიმშვენიერით და ბრწყინვალებით ხარ შემოსილი.

²გაკრავს სინათლე სამოსელივით, განგიფენია ცა ფარდასავით.

³წყლებზე ააგო ზესართულები, მისი ღრუბლები გაიხადა ეტლად თავისთვის, მიმოდიოდა ქარის ფრთებზე.

⁴რომელმან შეჰქმნა ანგელოზნი თვისნი ქარებად, მსახურნი თვისნი - ალად ცეცხლისა.

⁵დააფუძნა დედამიწა თავის საძირკვლებზე, არ მოირყევა უკუნისამდე.

⁶უფსკრულით, როგორც სამოსელით, დაფარე იგი; მთებზე დგას წყლები.

⁷შენი შერისხვით მიიქცევიან, შენი ქუხილის ხმაზე ილტვიან.

⁸ადიან მთებზე, ჩადიან ველებზე, იმ ადგილას, სადაც დაუფუძნე.

⁹საზღვარი დადე - ვერ გადალახავენ, ვერც დაბრუდებიან დედამიწის დასაფარავად.

¹⁰გაუშვი წყაროები ხევებში, რომ მთებს შორის იდინონ.

¹¹დალიოს ყოველმა მხეცმა ველისამ, მოიკლან კანჯრებმა წყურვილი.

¹²მათზე ცის ფრინველნი დამკვიდრებულან, რტოთა შიგნიდან გამოსცემენ ხმას.

¹³რწყავს მთებს თვისი ზესართულებიდან, შენთა საქმეთა ნაყოფით ძღება ქვეყანა.

¹⁴აღმოაცენებ ბალახს პირუტყვისათვის და მცენარეულობას - ადამიანის სამსახურებლად, რათა გამოიღოს პური მიწისაგან.

¹⁵და ღვინომ გაამხიარულოს გული კაცისა, გააბრწყინოს სახე საცხებელზე მეტად და პურმა შეამტკიცოს გული კაცისა.

¹⁶გაძღნენ ხენი უფლისა და კედრები ლიბანისა, მან რომ დანერგა.

¹⁷რომ იქ ჩიტებმა დაიდონ ბუდე: კვიპაროსები ყარყატის სახლია.

¹⁸მთანი მაღალნი - ქურციკთათვის, კლდენი - კურდღელთა თავშესაფარი.

¹⁹შეჰქმნა მთვარე ჟამთათვის, მზემ იცის თავისი დასავალი.

²⁰განავრცობ ბნელს და იქნება ღამე, მაშინ ამოძრავდებიან ყოველნი ნადირნი ტყისა.

²¹ბოკვერნი ლომისა ბრდღვინავენ ნადავლისათვის და მოითხოვენ ღმერთისაგან თავიანთ საჭმელს.

²²ამობრწყინდება მზე - შეგროვდებიან და თავიანთ ბუნაგებში დაწვებიან.

²³გავა ადამიანი, რათა იშრომოს და იმუშაკოს მწუხრის ჟამამდე.

²⁴რაოდენ მრავალია საქმენი შენი, უფალო! ყოველივე სიბრძნით შეგიქმნია, სავსეა დედამიწა შენი მონაგარით.

²⁵ეს ზღვაა, დიდი და უკიდეგანო, იქ ქვეწარმავალია ურიცხვი, მხეცნი - მცირენი დიდებთან ერთად.

²⁶იქ ხომალდები დადიან, ლევიათანი - ეს შენ შეჰქმენი მასში გასართობად.

²⁷ყველა მათგანი შენგან მოელის საზრდოს მიცემას თავ-თავის დროზე.

²⁸მისცემ მათ - აიღებენ, გახსნი შენს ხელს - გაძღებიან სიკეთით.

²⁹დაფარავ შენს სახეს - შეძრწუნდებიან, სულს წაართმევ - დაიხოცებაან და თავიანთი მტვერს დაუბრუნდებიან.

³⁰გაუშვებ შენს სულს - წარმოიქმნებიან და განაახლებ პირს მიწისას.

³¹იყოს დიდება უფლისა უკუნისამდე, იხარებდეს უფალი თავისი ნამოქმედარით.

³²დახედავს დედამიწას და ის აცახცახდება, შეეხება მთებს და აკვამლდებიან.

³³ვუგალობებ უფალს ჩემი სიცოცხლის მანძილზე, ვუგალობებ ჩემს ღმერთს, ვიდრე ვარსებობ.

³⁴ეამოს მას ჩემი გალობა; მე გავიხარებ უფალში.

³⁵გაქრებიან ცოდვილნი ქვეყნიერებიდან და ბოროტნი აღარ იქნებიან; აკურთხე, სულო ჩემო, უფალი! ადიდეთ უფალი!