Read საპატრიარქო ფსალმუნები 104 Bible Online

ფსალმუნები 104 - საპატრიარქო bible

ფსალმუნები 104

¹ადიდეთ უფალი, მოუხმეთ მის სახელს, აუწყეთ ხალხებს საქმენი მისნი.

²აქეთ იგი, უგალობეთ მას, ილაპარაკეთ ყველა მის სასწაულზე.

³განდიდდით მისი წმიდა სახელით, გამხიარულდეს გული უფლის მაძიებელთა.

⁴ეძიეთ უფალი და ძლიერება მისი, ეძიეთ პირი მისი მარადის.

⁵გაიხსენეთ მისი ნამოქმედარი სასწაულები, საოცრებანი და სამართალნი მისთა ბაგეთა.

⁶შთამომავალო აბრაამისა, მისი მორჩილისა, ძენო იაკობისა, რჩეულნო მისნო.

⁷ის არის უფალი ღმერთი ჩვენი, მთელ ქვეყნიერებაზეა სამართალნი მისნი.

⁸ახსოვს მარადის აღთქმა თავისი, სიტყვა, რომ დაადგინა ათას თაობამდე,

⁹რომელიც დაუდო აბრაამს, და თავისი ფიცი ისაკთან.

¹⁰დაუდგინა იაკობს იგი წესად და ისრაელს - სამარადჟამო აღთქმად.

¹¹უთხრა: შენ მოგცემ ქანაანის ქვეყანას წილად თქვენი მემკვიდრეობისა.

¹²როცა ისინი თითზე ჩამოსათვლელნი იყვნენ, ცოტანი შეხიზნულები იქ,

¹³იარებოდნენ ერთი ხალხიდან მეორესთან, სამეფოდან - სხვა ერთან.

¹⁴არავის ანებებდა მათს დაჩაგვრას და ამუნათებდა მათთვის მეფეებს:

¹⁵არ შეეხოთ ჩემს ცხებულებს და ჩემს წინასწარმეტყველებს არ უბოროტოთ.

¹⁶და მოუხმო შიმშილს დედამიწაზე და ყოველი სახსარი პურისა შემუსრა.

¹⁷გაგზავნა მათ წინ კაცი; მონად გაიყიდა იოსები.

¹⁸გატანჯეს ბორკილებით ფეხნი მისნი, რკინა მისწვდა მის სულს.

¹⁹ვიდრე ასრულდებოდა ნათქვამი მისი, უფლის სიტყვამ გამობრძმედა იგი.

²⁰გაგზავნა მეფემ და გაათავისუფლა იგი - გამგებელი ხალხებისა - და გამოიხსნა იგი.

²¹დააყენა თავისი სახლის ბატონად და გამგებელად მთელი თავისი მონაგარისა.

²²რათა მოქცეოდა მის თავადებს თავისი სურვილისამებრ და განებრძნო მოხუცებულნი მისნი.

²³და მოვიდა ისრაელი ეგვიპტეში, და გადასახლდა იაკობი ქამის ქვეყანაში.

²⁴და გაამრავლა ღმერთმა, მისი ხალხი ფრიად და გააძლიერა მის მტრებზე მეტად.

²⁵შეცვალა მათი გული მისი ხალხის შესაძულებლად, მის მორჩილთა მიმართ სივერაგის განსაზრახველად.

²⁶გაგზავნა მოსე, მსახური თვისი, აარონი, რომელიც ამოირჩია.

²⁷დაამკვიდრეს მათში სიტყვები მისი სასწაულებისა, და საოცრებანი ქამის ქვეყანაში.

²⁸მიავლინა წყვდიადი და დააბნელა, და არ გაურჩებულან მის სიტყვაზე,

²⁹გადააქცია მათი წყლები სისხლად და დახოცა მათი თევზები.

³⁰აავსო მათი ქვეყანა ბაყაყებით, მეფეთა პალატებიც კი.

³¹თქვა და მოვიდნენ მწერები, ტილი მთელ მათ საზღვრებში.

³²წვიმის მაგიერ სეტყვა წარმოუგზავნა მათ, ალმოდებული ცეცხლი - მათ ქვეყანას.

³³მოსრა ვაზი მათი და ლეღვი მათი და დალეწა ხეები მათ საზღვრებში.

³⁴თქვა და მოვიდა კალია და მგრაგნელი აურაცხელი,

³⁵და გადაჭიმეს მთელი ბალახი მათ ქვეყანაში, და გადაჭიმეს მთელი ნაყოფი მათი მიწისა.

³⁶და მოსრა ყოველი პირმშო მათ ქვეყანაში, დასაბამი მთელი მათი ძალისა.

³⁷და გამოიყვანა ისინი ვერცხლით და ოქროთი, და მათ ტომებში არავინ იყო უძლური.

³⁸გაუხარდა ეგვიპტეს მათი გამოსვლა, რადგან თავს დაატყდათ მათ შიში.

³⁹გადააფარა ღრუბელი საფრად და ცეცხლი - ღამის გასანათებლად.

⁴⁰ითხოვეს და გაუგზავნა მწყერი და ზეციური პურით გააძღო ისინი.

⁴¹გაკვეთა კლდე და გადმოდინდა წყალი, წავიდა უდაბნოში მდინარედ.

⁴²რადგან გაიხსენა თავისი წმიდა სიტყვა თავისი მორჩილის აბრაამის მიმართ.

⁴³გამოიყვანა თავისი ხალხი სიხარულით, რჩეულნი თვისნი ზარ-ზეიმით.

⁴⁴მისცა მათ წარმართთა ქვეყნები და ნაჯაფი ერებისა დაიმკვიდრეს მათ.

⁴⁵რათა დაიცვან წესები მისი და მის კანონებს გაუფრთხილდნენ. ადიდეთ უფალი!