Read საპატრიარქო ფსალმუნები 107 Bible Online

ფსალმუნები 107 - საპატრიარქო bible

ფსალმუნები 107

¹გალობა.ფსალმუნი დავითისა. მზად არის ჩემი გული, ღმერთო, გაქებ და გიგალობებ ჩემი ღირსებით.

²გამომაღვიძე, ჩანგო და ქნარო, გამოვაღვიძებ ცისკარს.

³გადიდებ შენ, უფალო, ხალხებს შორის და გიგალობებ ერებს შორის.

⁴რადგან ზეცაზე დიდია წყალობა შენი და ღრუბლებამდეა ჭეშმარიტება შენი.

⁵ამაღლდი ცათა ზემოთ, ღმერთო, და მთელ ქვეყნიერებას გასწვდეს დიდება შენი.

⁶რათა გადარჩნენ საყვარელნი შენნი; მიხსენი შენი მარჯვენით და მიპასუხე.

⁷ღმერთმა თქვა თავის წმიდაში; ვიზეიმებ, გავანაწილებ შექემს და სუქოთის დაბლობს გავზომავ.

⁸ჩემია გალაადი, ჩემია მენაშე და ეფრემი ჩაჩქანია ჩემი თავისა, იუდა - კანონმდებელი ჩემი.

⁹მოაბი ავზია, ჩემი განსაბანელი, ედომზე ფეხსაცმელს გავიშვერ, ფილისტიმელს დავკივლებ.

¹⁰ვინ შემიყვანს გამაგრებულ ქალაქში? ვინ წამიძღვება ედომისაკენ?

¹¹ნუთუ შენ არა, ღმერთო, მიგვატოვე და აღარ გამოხვალ ჩვენს მხედრობასთან?

¹²მოგვეც შეწევნა გაჭირვებაში, რადგან ამაოა შველა კაცისმიერი.

¹³ღმერთით შევქმნით ლაშქარს და ის დათრგუნავს ჩვენს მტრებს.