Read საპატრიარქო ფსალმუნები 113 Bible Online

ფსალმუნები 113 - საპატრიარქო bible

ფსალმუნები 113

¹როდესაც გამოვიდა ისრაელი ეგვიპტიდან, სახლი იაკობისა უცხოენოვან ხალხისაგან,

²გახდა იუდა მისი სიწმიდე, ისრაელი - მისი სამფლობელო.

³ზღვამ დაინახა და გაიქცა, იორდანე უკან გაბრუნდა.

⁴მთები აცეკვდნენ ერკემლებივით, ბორცვნი - კრავებივით.

⁵რა დაგემართა, ზღვაო, რომ გაიქეცი, და იორდანევ, უკან რომ გაბრუნდი?

⁶მთებო, რას ცეკვავთ ერკემლებივით და ბორცვებო, კრავებივით?

⁷უფლის წინაშე ძრწოდე, დედამიწავ, იაკობის ღმერთის წინაშე,

⁸რომელმაც გადააქცია კლდე წყალსატევად, კაჟი - წყაროს წყლად.

⁹ჩვენ არა, უფალო, ჩვენ არა, არამედ შენს სახელს მიაგე დიდება შენი წყალობით, შენი ჭეშმარიტეაით.

¹⁰რატომ თქვან წარმართებმა: სად არის ღმერთი მათი?

¹¹ხოლო ჩვენი ღმერთი ზეცაშია; ყოველივე, რაც სურდა, მოიმოქმედა.

¹²მათი კერპები ვერცხლი და ოქროა, ადამიანთა ხელით შექმნილი.

¹³პირი აქვთ და ვერ ლაპარაკობენ, თვალები აქვთ და ვერ ხედავენ.

¹⁴ყურები აქვთ და არ ესმით, ცხვირი აქვთ და ვერ იყნოსავენ.

¹⁵ხელები აქვთ და ვერაფერს ეხებიან, ფეხები აქვთ და ვერ დადიან, ხმას ვერ გამოსცემენ თავიანთი ხორხიდან.

¹⁶მათ დაემსგავსებიან მათი გამკეთებლები, ყველა, ვინც მათზეა მინდობილი.

¹⁷ისრაელო, მიენდე უფალს - შემწე და ფარია ის.

¹⁸აარონის სახლო, მიენდე უფალს - შემწე და ფარია ის.

¹⁹მოშიშნო უფლისა, მიენდეთ უფალს - შემწე და ფარია ის.

²⁰უფალს ვახსოვართ - გვაკურთხებს; აკურთხებს ისრაელის სახლს, აკურთხებს აარონის სახლს.

²¹აკურთხებს უფლის მოშიშებს - პატარებს დიდებთან ერთად.

²²დაე, შეგმატოთ უფალმა თქვენ, თქვენ და თქვენს შვილებს.

²³კურთხეული ხართ უფლის მიერ, ცისა და ქვეყნის შემოქმედის მიერ,

²⁴ცა-ცად უფლისათვის, ხოლო ქვეყანა მისცა ადამის ძეთ.

²⁵არათუ მკვდრები აქებენ უფალს და ან ყოველი ქვესკნელს შთასული,

²⁶არამედ ჩვენ ვადიდებთ უფალს ამიერიდან უკუნისამდე. ადიდეთ უფალი!