საპატრიარქო bible online

ფსალმუნები 118

¹ნეტარ არიან გზიანები, რომელნიც დადიან უფლის რჯულზე.

²ნეტარ არიან შემნახველნი მის მცნებათა, მთელი გულით რომ ეძიებენ მას.

³არც სიავკაცე ჩაუდენიათ, მისი გზით დადიან;

⁴შენ დაავალე შენს ბრძანებათა დაცვა. ზედმიწევნით.

⁵ნეტამც წარიმართოს ჩემი გზები შენი წესდების დასაცავად.

⁶მაშინ აღარ შემრცხვებოდა, როს შევხედავდი შენს ყოველ მცნებას.

⁷განგადიდებდი გულის სისწორით, რომ მასწავლიდი სამართალს შენი სიმართლისა.

⁸შენს წესებს დავიცავ, ნუ მიმატოვებ საბოლოოდ,

⁹რით შეინახოს ყმაწვილმა სიწმიდე თავისი გზისა? დაიცვას შენი სიტყვისამებრ.

¹⁰მთელი გულით გეძიებ შენ, ნუ გადამახვევინებ შენთა მცნებათაგან.

¹¹გულში ჩავიმარხე შენი სიტყვები, რათა არ შევცოდო.

¹²კურთხეულ ხარ შენ, უფალო! მასწავლე წესები შენი.

¹³ჩემი ბაგეებით მოვუთხრობდი ყველა სამართალს შენი პირისას.

¹⁴შენთა მცნებათა გზაზე ვხარობდი, ვითარცა მთელ ქონებაზე.

¹⁵შენს მცნებებზე ვილაპარაკებ და დავუკვირდები შენს გზებს.

¹⁶შენი წესებით გავიხარებ, არ დავივიწყებ შენს სიტყვას.

¹⁷კეთილი უქმენ შენს მორჩილს; ვიცოცხლებ და დავიცავ შენს სიტყვას.

¹⁸აღმიხილე თვალნი და ვჭვრეტდე საოცრებებს შენი რჯულისას.

¹⁹მწირი ვარ ქვეყანაზე, ნუ დამიმალავ შენს მცნებებს.

²⁰მოითენთა სული ჩემი შენი სამართლის წადილით ყოველჟამს.

²¹შერისხე ამპარტავანნი, წყეულნი, რომელთაც გადაუხვიეს შენი მცნებებიდან.

²²ამაცილე სირცხვილი და შეურაცხყოფა, რადგან შენს მცნებებს ვიცავდი.

²³დასხდებიან კიდეც თავადნი, ჩემს წინააღმდეგ ითათბირებენ; შენი მორჩილი კი ისაუბრებს შენს წესებზე.

²⁴შენი მცნებებიც სიხარულია ჩემთვის, მრჩეველნი ჩემნი.

²⁵მტვერს მიეკრა სული ჩემი; მაცოცხლე შენი სიტყვისამებრ.

²⁶გზანი ჩემნი განგიცხადე და მიპასუხე; მასწავლე წესები შენი.

²⁷გზა შენთა ბრძანებათა გამაგებინე და ვილაპარაკებ შენს საოცრებებზე.

²⁸დადნა სული ჩემი ნაღვლიანობით; გამამაგრე შენი სიტყვისამებრ.

²⁹გზა სიცრუისა განმაშორე და შენი რჯულით შემიწყალე.

³⁰გზა ჭეშმარიტებისა ამოვირჩიე, შენი სამართალნი წინ დავიყენე.

³¹მიკრული ვარ შენს მცნებებზე; უფალო, ნუ გამაწბილებ.

³²შენთა მცნებათა გზით ვრბოდე, რადგან განავრცობ ჩემს გულს.

³³მიჩვენე, უფალო, გზა შენთა წესთა და დავიცავ ბოლომდე.

³⁴გამაგებინე და დავიცავ შენს რჯულს და შევინახავ მთელი გულით.

³⁵დამაყენე შენთა მცნებათა კვალზე, რადგანაც მწადია იგი.

³⁶განუმტკიცე შენს მორჩილს შენი ნათქვამი შენი მოშიშების გამო.

³⁷ააცილე თვალი ჩემი ამაოების ცქერას, შენი გზით მაცოცხლე.

³⁸დაუყენე შენს მონას შენი ნათქვამი შენგან მოშიშების გამო.

³⁹ამაცილე შერცხვენა, რომლისაც მეშინია, რადგან შენი სამართალნი კეთილია.

⁴⁰აჰა, ვისურვე ფრიად შენი ბრძანებანი; შენი სიმართლით მაცოცხლე მე.

⁴¹მოვიდნენ ჩემთან წყალობანი შენნი, უფალო, ხსნა შენმიერი, შენი სიტყვისამებრ.

⁴²და პასუხს გავცემ ჩემს მაგინებლებს, რადგან ვიმედოვნებ შენი სიტყვით.

⁴³ნუ წაართმევ ჩემს პირს ჭეშმარიტების სიტყვას სრულიად, რადგან შენს სამართალს მოველი.

⁴⁴დავიცავ შენს რჯულს მარადის, უკუნითი უკუნისამდე.

⁴⁵ვივლი ხალვათად, რადგან შენს ბრძანებებს ვეძიებდი.

⁴⁶ვილაპარაკებ შენს მცნებებზე მეფეთა წინ და არ შემრცხვება.

⁴⁷გავიხარებ შენი მცნებებით, რომლებიც მიყვარს;

⁴⁸ხელთ აღვაპყრობ შენთა მცნებათა მიმართ, რომლებიც მიყვარს, და ვისაუბრებ შენს წესებზე.

⁴⁹გაუხსენე შენს მორჩილს სიტყვა, რომლითაც დამაიმედე მე.

⁵⁰ეს არის ჩემი ნუგეში გაჭირვებაში, რადგან შენმა ნათქვამმა გამომაცოცხლა.

⁵¹ამპარტავანნი დამცინოდნენ მეტისმეტად; შენი რჯულიდან არ გადამიხვევია.

⁵²ვიხსენიებდი შენს სამართალს ადრიდანვე, უფალო, და დარდს ვიქარვებდი.

⁵³თავზარი მეცემოდა, ცოდვილნი რომ ტოვებდნენ შენს რჯულს.

⁵⁴სიმღერებად იქცა ჩემთვის შენი წესები ჩემს საცხოვრებელ სახლში.

⁵⁵ვიხსენებდი ღამით შენს სახელს, უფალო, და ვიცავდი შენს რჯულს.

⁵⁶ეს იყო ჩემთვის, რადგან შენს ბრძანებას ვიცავდი.

⁵⁷ჩემი ხვედრია, ვთქვი, უფალო, შენთა სიტყვათა დაცვა.

⁵⁸გევედრებოდი მთელი გულით; შემიწყალე შენი სიტყვისამებრ.

⁵⁹ვფიქრობდი ჩემს გზებზე და ვიბრუნებდი ფეხს შენი მცნებებისაკენ.

⁶⁰ვჩქარობდი და არ ვაყოვნებდი შენთა მცნებათა დაცვას.

⁶¹ბოროტეულთა ბორკილები გარს შემომერტყნენ, შენი რჯული არ დავივიწყე.

⁶²შუაღამისას გდგები შენს სადიდებლად, შენს მართალ სამართალთა გამო.

⁶³თანაზიარი ვარ ყველასი, ვინც შენი მოშიშია და იცავს შენს მცნებებს.

⁶⁴შენი წყალობით, უფალო, სავსეა ქვეყნიერება, მასწავლე შენი კანონმდებლობა.

⁶⁵კეთილი ჰქმენი შენი მორჩილისთვის, უფალო, შენი სიტყვისამებრ.

⁶⁶კეთილი აზრი და გაგება მასწავლე, რადგან ვირწმუნე შენი მცნებანი.

⁶⁷ვიდრე დავიტანჯებოდი, შევცდი; ახლა კი შენს სიტყვას ვიცავ.

⁶⁸კეთილი ხარ და კეთილმოქმედი; მასწავლე წესები შენი.

⁶⁹ტყუილს ჩმახავენ ამპარტავანნი ჩემზე, მე მთელი გულით დავიცავ შენს ბრძანებებს.

⁷⁰დამსუყდა ცხიმივით მათი გული, მე შენი რჯულით ვხარობდი.

⁷¹კარგია ჩემთვის, რომ ვეწამე, ვინძლო ვისწავლო წესები შენი.

⁷²უმჯობესია ჩემთვის რჯული შენი ბაგისა, ვიდრე ათასი ოქრო და ვერცხლი.

⁷³შენმა ხელებმა შემქმნა და წარმმართა; შთამაგონე და ვისწავლი შენს მცნებებს.

⁷⁴მოშიშნი შენნი შემხედავენ და გაიხარებენ, რადგან შენს სიტყვებზე ვარ მინდობილი.

⁷⁵ვიცოდი, უფალო, რომ მართალია შენი სამართალი, და სამართლიანად შემაჭირვე.

⁷⁶დაე, იყოს შენი წყალობა შემს სანუგეშებლად, როგორც აღუთქვი შენს მორჩილს.

⁷⁷მოვიდეს ჩემდამი წყალობა შენი და ვიცოცხლებ, რადგან შენი რჯული სიხარულია ჩემი.

⁷⁸შერცხვეთ ამპარტავნებს, რადგან ტყუილად მჩაგრავდნენ; ვისაუბრებ შენს ბრძანებებზე.

⁷⁹დაბრუნდნენ ჩემთან მოშიშნი შენნი და მცოდნენი შენი მცნებებისა.

⁸⁰იყოს ჩემი გული უბიწო შენს წინაშე, რათა არ შევრცხვე.

⁸¹დადნა შენი შეწევნის მოლოდინში ჩემი სული, შენს სიტყვაზე ვარ დაიმედებული.

⁸²დადნენ თვალნი ჩემნი შენი სიტყვის მოლოდინში, ვთქვი: როდის მანუგეშებ მე?

⁸³ვიყავი, ვითარცა ტიკი ორთქლში, შენი წესები არ დავივიწყე.

⁸⁴რაოდენია დღენი შენი მორჩილისა? როდის გაასამართლებ ჩემს მდევნელებს?

⁸⁵გამითხარეს ამპარტავნებმა ორმო, ოღონდ არა შენი რჯულისამებრ.

⁸⁶ყველა მცნება შენი ჭეშმარიტებაა; უმიზეზოდ მდევნიან, მიშველე.

⁸⁷ლამის გამანადგურეს მიწაზე და მაინც არ მივაგოვე შენი ბრძანებანი.

⁸⁸შენი წყალობით მაცოცხლე და დავიცავ მცნებებს შენი პირისას.

⁸⁹უკუნისამდე, უფალო, შენი სიტყვა დაფუძნებულია ზეცაში.

⁹⁰თაობიდან თაობამდეა ჭეშმარიტება შენი; დაამყარე ქვეყანა და დგას.

⁹¹შენი მსჯავრით დგანან დღესაც, რადგან ყოველნი გმსახურებენ.

⁹²რჯული შენი რომ არ ყოფილიყო ჩემდა ნუგეშად, დავიღუპებოდი ჩემს ტანჯვაში.

⁹³უკუნისამდე არ დავივიწყებ ბრძანებებს შენსას, რადგანაც მათით მასულდგმულებდი.

⁹⁴შენი ვარ - მიხსენი, რადგან შენს ბრძანებებს ვეძიებდი.

⁹⁵მიდარაჯდებიან ბოროტნი, რომ დამღუპონ; შენს მცნებებს ღრმად ვუკვირდები.

⁹⁶ყოველნაირი სრულქმნილების მინახავს ბოლო; ვრცელია შენი მცნებანი ფრიად.

⁹⁷რარიგად მიყვარს რჯული შენი, ის არის ჩემი საფიქრალი დღენიადაგ.

⁹⁸ჩემს მტრებზე მეტად დამაბრძენე შენი მცნებით; რადგან მარადის ჩემია იგი.

⁹⁹ყველა ჩემს მოძღვარზე გონიერი გავხდი, რადგან შენი მცნებანი სააზროვნიაა ჩემი.

¹⁰⁰მოხუცებზე მეტად საზრიანი ვარ, რადგან შენს ბრძანებებს ვიცავ.

¹⁰¹ყოველგვარ ბოროტ გზას მოვარიდე ფეხი, რათა დავიცვა შენი სიტყვა.

¹⁰²შენთა სამართალთაგან არ გადამიხვევია, რადგანაც შენ მასწავლიდი.

¹⁰³რარიგ ატკბობს ჩემს სასას შენი სიტყვები, თაფლზე ტკბილია ჩემი პირისთვის.

¹⁰⁴შენი ბრძანებით საზრიანი გავხდი, ამიტომ მოვიძულე ყთველი გზა სიცრუისა.

¹⁰⁵ლამპარია ჩემი ფეხისთვის სიტყვა შენი და სინათლე - ჩემი ბილიკისათვის.

¹⁰⁶დავიფიცავ და ავასრულებ, დავიცავ შენს მართალ სამართალს.

¹⁰⁷დავიტანჯე მეტისმეტად; უფალო, მაცოცხლე შენი სიტყვისამებრ.

¹⁰⁸აღთქმანი ჩემი პირისა ისურვე - გთხოვ, უფალო, და სამართალნი შენნი მასწავლე.

¹⁰⁹სული ჩემი ხელისგულზეა მუდამ და შენს რჯულს არ ვივიწყებ.

¹¹⁰დამიგეს ბოროტებმა მახე, მაგრამ შენი ბრძანებებისთვის არ გადამიხვევია.

¹¹¹დავიმკვიდრე მცნებანი შენი საუკუნოდ, რადგან ისინი ჩემი გულის სიხარულია.

¹¹²მოვდრიკე გული ჩემი წესთა შენთა შესასრულებლად. უკუნითი უკუნისამდე.

¹¹³ბოროტგანმზრახველნი შევიძულე და შენი რჯული შევიყვარე.

¹¹⁴თავშესაფარი და ფარი ხარ ჩემი, შენს სიტყვაზე ვარ დაიმედებული.

¹¹⁵შორს ჩემგან, ბოროტნო, და მე დავიცავ მცნებებს ჩემი ღმერთისას.

¹¹⁶შემეწიე შენი სიტყვისამებრ და ვიცოცხლო, და ნუ გამიწბილებ ჩემს იმედს.

¹¹⁷შემეწიე და გადავრჩე, და ჩავწვდვბი შენს წესდებებს ყოველთვის.

¹¹⁸მოსრე ყოველი, ვინც განუდგა შენს წესებს, რადგან სიცრუეა მათი ხრიკები.

¹¹⁹როგორც ნაყარ-ნუყარი, მოსპე ყოველი ბოროტი ქვეყანაზე, ამიტომ შევიყვარე, მცნებანი შენნი.

¹²⁰თრთის შენი შიშით სხეული ჩემი და მეშინია შენი განკითხვების.

¹²¹ვქმენ სამართალი და სიმართლე. ნუ შემატოვებ მჩაგვრელებს ჩემსას.

¹²²გამოესარჩლე შენს მორჩილს სასიკეთოდ, რომ დამჩაგრონ ამპარტავნებმა.

¹²³დადნენ თვალნი ჩემნი შენი შეწევნისა და შენი სიმართლის სიტყვის მოლოდინში.

¹²⁴მოიმოქმედე შენი მორჩილისთვის შენი წყალობისამებრ და წესები შენი მასწავლე.

¹²⁵მორჩილი ვარ შენი; გონიერ-მყავ, რათა შევიმეცნო მცნებანი შენნი.

¹²⁶ჟამია უფლის მოქმედებისა - მოშალეს რჯული შენი.

¹²⁷ამიტომ მიყვარს მცნებანი შენნი ოქროზე და ბაჯაღლოზე მეტად.

¹²⁸ამიტომ ყველა შენი ბრძანება უკლებლივ სწორად მიმაჩნია; მძულს ყოველი გზა სიცრუისა.

¹²⁹საოცარია მცნებანი შენნი; ამიტომ ინახავს მათ სული ჩემი.

¹³⁰საწყისი შენი სიტყვებისა ანათებს, შთააგონებს გულუბრყვილოებს.

¹³¹პირი გავხსენი და ამოვისუნთქე, რადგან მომენატრა მცნებანი შენნი.

¹³²მომხედე და შემიწყალე, როგორც შეეფერება შენი სახელის მოყვარულთ.

¹³³ჩემი ნაბიჯები წარმართე შენი სიტყვით და ნუ გააბატონებ ჩემზე ნურავითარ ბოროტს.

¹³⁴გადამარჩინე ადამიანის ჩაგვრისაგან, და დავიცავ შენს ბრძანებებს.

¹³⁵შენი სახე მოაშუქე შენს მორჩილს და მასწავლე წესები შენი.

¹³⁶წყლის ნაკადები გადმომდის თვალთაგან, რადგან არ იცავენ შენს რჯულს.

¹³⁷მართალი ხარ შენ, უფალო, და სწორია სამართალი შენი.

¹³⁸ბრძანე სიმართლით მცნებანი შენნი და ჭეშმარიტია მეტად.

¹³⁹დამღრღნა ეჭვმა, რადგან დაივიწყეს შენი სიტყვები ჩემმა მტრებმა.

¹⁴⁰ხალასია შენი ნათქვამი ფრიად და შენს მორჩილს უყვარს იგი.

¹⁴¹მცირე ვარ და მოძულებული; შენს ბრძანებებს არ ვივიწყებ.

¹⁴²სიმართლე შენი მარადიული სიმართლეა და შენი რჯული ჭეშმარიტია.

¹⁴³განსაცდელი და გაჭირვება წამომეწია; შენი მცნებანი სიხარულია ჩემთვის.

¹⁴⁴სიმართლეა შენი მცნებანი მარადის; შთამაგონე და ვიცოცხლებ.

¹⁴⁵მოგიხმობ მთელი გულით; მიპასუხე, უფალო! შენს წესებს დავიცავ.

¹⁴⁶შენ მოგიხმობ, გადამარჩინე, და დავიცავ შენს მცნებებს.

¹⁴⁷ავდგები გარიჟრაჟამდე და ვიღაღადებ, შენს სიტყვაზე ვარ დაიმედებული.

¹⁴⁸ჩემმა თვალებმა დაასწრეს განთიადს, რათა ვილაპარაკო შენს ნათქვამზე.

¹⁴⁹ჩემა ხმა ისმინე შენი წყალობისამებრ; უფალო, შენი სამართლის მიხედვით მაცოცხლე.

¹⁵⁰მომიახლოვდნენ მდევარნი გარყვნილებისა; შენს რჯულს დაშორდნენ.

¹⁵¹ახლოს ხარ, უფალო, და ყოველი მცნება შენი ჭეშმარიტებაა.

¹⁵²ადრიდანვე შევიტყვე შენთა მცნებათა შესახებ, რომ სამარადჟამოდ დააფუძნე ისინი.

¹⁵³იხილე ტანჯვა ჩემი და გადამარჩინე, რადგან შენი რჯული არ დავივიწყე.

¹⁵⁴გამომესარჩლე და დამიხსენი, შენი ნათქვამისამებრ მაცოცხლე.

¹⁵⁵შორს არის ბოროტთაგან შველა, რადგან შენს წესებს არ ეძიებენ.

¹⁵⁶წყალობანი შენნი უხვია, უფალო, შენი სიმართლის მიხედვით მაცოცხლე.

¹⁵⁷ბევრია ჩემი მდევარი და შემავიწროებელი; შენი მცნებებისათვის არ გადამიხვევია.

¹⁵⁸ვიხილე ორგულნი და შევედავე, რადგან შენს ნათქვამს არ იცავენ.

¹⁵⁹ნახე, რარიგ შევიყვარე შენი ბრძანებანი, უფალო; შენი წყალობისამებრ მაცოცხლე.

¹⁶⁰საწყისი შენი სიტყვისა ჭეშმარიტებაა, და საუკუნოა ყოველი მართალი შენი სამართალი.

¹⁶¹მთავარნი მდევნიან უმიზეზოდ და შენი სიტყვებისაგან დაშინებულია გული ჩემი.

¹⁶²ვხარობ შენი ნათქვამით, ვითარცა მპოვნელი უხვი ნადავლისა.

¹⁶³სიცრუე მძულს და მძაგს; შენი რჯული მიყვარს.

¹⁶⁴დღეში შვიდგზის გაქებ შენრ სიმართლის სამართალთათვის.

¹⁶⁵დიდია მშვიდობა შენი რჯულის მოყვარულთა, და არ არსებობს მათთვის დაბრკოლება.

¹⁶⁶იმედი მქონდა შენი შეწევნისა, უფალო, და შენს მცნებებს ვასრულებდი.

¹⁶⁷იცავდა ჩემი სული შენს მცნებებს და მე ისინი მიყვარს ძალიან.

¹⁶⁸ვიცავდი შენს ბრძანებებს და მცნებებს, რადგან ყველა ჩემი გზა შენს წინაშეა.

¹⁶⁹მოახლოვდეს ჩემი ღაღადი შენს წინაშე, უფალო, და შენი სიტყვებისამებრ შთამაგონე.

¹⁷⁰მოვიდეს ჩემი ვედრება შენს წინაშე, რადგან მასწავლე წესები შენი.

¹⁷¹წარმოთქვამენ ჩემი ბაგენი ქებას, რადგან მასწავლე წესები შენი.

¹⁷²იტყვის ჩემი ენა შენს ნათქვამს, რადგან ყველა შენი მცნება სიმართლეა.

¹⁷³იყოს შენი ხელი ჩემდა შემწედ, რადგან შენი ბრძანებანი ამოვირჩიე.

¹⁷⁴ვნატრობდი შენს შველას, უფალო, და შენი რჯული სასიამოვნოა ჩემთვის.

¹⁷⁵იცოცხლოს ჩემმა სულმა და გაქოს შენ, და შენი სამართალი შემეწიოს.

¹⁷⁶დავიბენი, ვითარცა ცხვარი დაკარგული; მოძებნე შენი მორჩილი, რადგან მცნებანი შენნი არ დავივიწყე.

Read საპატრიარქო ფსალმუნები 118 Bible Online

ფსალმუნები 118 - საპატრიარქო bible

ფსალმუნები 118