Read საპატრიარქო ფსალმუნები 138 Bible Online

ფსალმუნები 138 - საპატრიარქო bible

ფსალმუნები 138

¹გუნდისლოტბარისათვის. დავითისფსალმუნი. უფალო, გამომცადე და შემიცანი.

²შენთვის ცნობილია, როდის ვჯდები და ვდგები; გაგებული გაქვს ჩემი ზრახვანი შორიდან.

³ჩემი სიარული და ჩემი წოლა განსაზღვრე შენ და ყველა ჩემი გზა გამოიკვლიე.

⁴თუნდაც ჯერ არ იყოს სიტყვა ჩემს ენაზე, შენ უკვე იცი, უფალო, სრულად.

⁵უკნიდან და წინიდან გარემომიცავი და დადე ჩემზე ხელი შენი.

⁶უჩვეულოა ჩემთვის გასაგებად; აღზევებულია, ვერ შევწვდები მას.

⁷საით, წავუვალ შენს სულს და შენს სახეს სად გავექცევი?

⁸ზეცაში რომ ავიდე, შენ იქა ხარ, ქვესკნელში ჩავიდე და - იქაც ხარ!

⁹ავწიო ფრთენი განთიადისა, დავსახლდე ზღვის კიდეზე,

¹⁰იქაც შენი ხელი წამიძღვება და შემივრდომებს მარჯვენა შენი.

¹¹და ვიტყვი: იქნებ ბნელმა დამფაროს და ღამე იქმნას სინათლედ ჩემთვის.

¹²სიბნელეც ვერ დაბინდავს შენგან და ღამე დღესავით გაანათებს; რა სიბნელე და რა სინათლე.

¹³რადგან შენ გამართე თირკმელნი ჩემნი, გამომძერწე დედაჩემის საშოში.

¹⁴გადიდებ, რადგან საოცრებით ვარ შენივთული; საკვირველია საქმენი შენნი და ჩემმა სულმა იცის ეს სავსებით.

¹⁵არ დაფარულა ჩემი ძვლები შენგან, როცა ჩავისახე იდუმალებაში, შევნივთდი ქვესკნელში.

¹⁶ჩემი ჩანასახი იხილა შენმა თვალებმა და შენს წიგნში ჩაწერილია დღენი მომავალი ჩასახვისა, როცა ჯერ არ არის არც ერთი მათგანი.

¹⁷ხოლო ჩემთვის რაოდენ მრავლისმთქმელია ზრახვანი შენნი, ღმერთო, რაოდენ დიდია რიცხვი მათი.

¹⁸დავთვალო, ქვიშაზე უმრავლესია; გავიღვიძო და, ისევ შენთან ვარ.

¹⁹ნეტამც მოსრავდე, ღმერთო, ბოროტს, სისხლისმსმელნო, განვედით ჩემგან!

²⁰რომ გელაპარაკებიან მზაკვრულად, ამაოდ იზრახვიან შენი მტრები.

²¹ნუთუ არ მოვიძულო, უფალო, შენი მოძულენი, და შენს მოწინააღმდეგეებს არ ვედაო?

²²სრული სიძულვილით მოვიძულე ისინი, მტრებად შევრაცხე.

²³გამომცადე, უფალო, და შეიცან გული ჩემი; შემამოწმე და შეიცან აზრები ჩემი.

²⁴ნახე, სახიფათო გზაზე ხომ არ ვდგავარ, და წამიძეღი მარადიულ გზაზე.