Read საპატრიარქო ფსალმუნები 32 Bible Online

ფსალმუნები 32 - საპატრიარქო bible

ფსალმუნები 32

¹იხარეთ, მართალნო, უფალში; გულწრფელებს შეშვენით შექება.

²ადიდეთ უფალი ქნარით, ათსიმიანი ებნით უგალობეთ მას.

³უგალობეთ მას გალობა ახალი, უკეთ ააწყეთ ჰანგი მოძახილით.

⁴რადგან სწორია სიტყვა უფლისა და ყოველი საქმე მისი ჭეშმარიტია.

⁵უყვარს სიმართლე და სამართალი; უფლის წყალობით სავსეა ქვეყანა.

⁶უფლის სიტყვით შეიქმნა ზეცა და მისი ბაგეების ქარით - მთელი მისი საკრებულო.

⁷შეკრიბა, ვითარცა ტიკში, წყლები ზღვისანი, საცავებში მოათავსა უფსკრულები.

⁸ეშინოდეს უფლისა მთელ დედამიწას, თრთოდეს მისგან ყველა მკვიდრი სამყაროისა.

⁹რადგან მან თქვა და - შეიქმნა, მან ბრძანა და - არსებობს.

¹⁰უფალი ჩაშლის ხალხების აზრებს, გააცამტვერებს ხალხების ზრახვებს.

¹¹აზრი უფლისა იარსებებს მარადიულად და თაობიდან თაობამდე - ზრახვანი მისნი.

¹²ნეტარ არს ხალხი, რომლისთვისაც უფალია ღმერთი, ხალხი - მისდა სამემკვიდრეოდ ამორჩეული.

¹³ზეციდან იმზირება უფალი, ხედავს ყველა ადამიანს.

¹⁴თავისი საბრძანისიდან უთვალთვალებს ქვეყნის ყველა მკვიდრს.

¹⁵მან შეჰქმნა გული თითოეულისა, და სწვდება ყველა მათ საქმეს.

¹⁶მეფეს ვერ უშველის ჯარის სიმრავლე, გმირს ვერ იხსნის დიდი ძალა.

¹⁷უიმედოა ცხენი შველისათვის და თავისი ჯარების სიმრავლე ვერ იხსნის.

¹⁸აი, თვალი უფლისა მის მოშიშთა თავზე, ვინც მის წყალობას ელის;

¹⁹რომ იხსნას მათი სული სიკვდილისაგან და ასაზრდოოს შიმშილობის დროს.

²⁰ჩვენი სული მომლოდინეა უფლისა, ის არის დამხმარე და მფარველი ჩვენი.

²¹რადგან მისით ხარობს ჩვენი გული, რადგან ვესასოებით მის წმიდა სახელს.

²²იყოს ჩვენდამი, უფალო, შენი წყალობა, რადგანაც შენზე ვამყარებთ იმედს.