Read საპატრიარქო ფსალმუნები 33 Bible Online

ფსალმუნები 33 - საპატრიარქო bible

ფსალმუნები 33

¹დავითისა,როცა სიგიჟე მოიგონა აბიმელექის წინაშე და განიდევნა და წავიდა. განვადიდებ უფალს ყოველჟამს, მარადისია მისი ქება ჩემს ბაგეებზე.

²უფლით იქადის ჩიმი სული; მოისმენენ თავმდაბლები და გაიხარებენ.

³ადიდეთ უფალი ჩემთან ერთად და განვადიდოთ მისი სახელი ერთობლივად.

⁴მე მოვიძიე უფალი და მიპასუხა და გამომიხსნა ყველა ჩემი განსაცდელისგან.

⁵მისი შემყურენი განათებულან და მათი პირი არ შერცხვენილა.

⁶აგერ გლახაკმა მოუხმო და უფალმა მოისმინა და ყველა გასაჭირისაგან იხსნა.

⁷დაიბანაკებს ანგელოზი უფლისა მის მოშიშთა ირგვლივ და გადაარჩენს მათ.

⁸განიცადეთ და ნახეთ, რომ კარგია უფალი; ნეტარება იმ კაცს, ვინც მასზეა მინდობილი.

⁹მოიშიშეთ უფლისა, წმიდანო, მისნო, რადგან არა აქვთ შეჭირვება მოშიშებს მისას.

¹⁰ძლიერნი ღატაკდებიან და დაიმშევიან, ხოლო უფლის მაძიებლებს არავითარი სიკეთე არ მოაკლდებათ.

¹¹მოდით, შვილებო, მომისმინეთ: უფლის მოშიშებას გასწავლით თქვენ.

¹²ვინ არის კაცი, რომელსაც სურს სიცოცხლე, უყვარს დღეგრძელობა სიკეთის სანახავად?

¹³შეიკავე შენი ენა სიბოროტისგან და ბაგენი შენნი - ცბიერი სიტყვებისაგან.

¹⁴ერიდე ბააროტებას და ჰქმენ კეთილი; ეძიე მშვიდობა და მიჰყევი მას.

¹⁵უფლის თვალები მიპყრობილია წმიდანებისაკენ და მისი ყურები - მათი ლოცვისაკენ.

¹⁶პირი უფლისა - ბოროტმოქმედთა წინააღმდეგ, რათა წარხოცოს დედამიწიდან მათი სახსენებელი.

¹⁷მოუხმობენ და უსმენს უფალი და იხსნის ყველა გასაჭირისგან.

¹⁸ახლოა უფალი გულმოდრეკილებთან და სულით მორჩილებს იხსნის.

¹⁹მრავალი სიავე ხვდება მართალს და ყველაფრისგან იხსნის უფალი.

²⁰ის იცავს მის ყოველ ძვალს, მათგან ერთიც არ შეიმუსრება.

²¹მოკლავს ცოდვილს ბოროტება, ხოლო მართლის მოძულენი პასუხს აგებენ.

²²იხსნის უფალი თავის მორჩილთა სულს და პასუხს არ აგებენ, ვინც მასზეა მინდობილი.