Read საპატრიარქო ფსალმუნები 47 Bible Online

ფსალმუნები 47 - საპატრიარქო bible

ფსალმუნები 47

¹ფსალმუნი, საგალობელი კორახის ძეთა. დიდია უფალი და ქებულია მეტად ჩვენი ღმერთის ქალაქში, წმიდა მთაზე.

²ლამაზი მაღლობი, სიხარული მთელი ქვეყნიერებისა მთა სიონი; ჩრდილოეთ მხარეს ქალაქია დიდი მეფისა.

³ღმერთი თავის სადგომში ცნობილია, ვითარცა სიმაგრე.

⁴რადგან აგერ შეიკრიბნენ მეფენი და განვლეს ერთად.

⁵ნახეს მათ და განცვიფრდნენ, შეძრწუნდნენ და გაეჩქარნენ.

⁶ძრწოლამ შეიპყრო ისინი, იკლაკნებიან მშობიარესავით.

⁷აღმოსავლეთის ქარით შემუსრე ხომალდნი თარშიშისანი.

⁸როგორც ვისმინეთ, ისე ვიხილეთ ძალთა უფლის ქალაქში, ჩვენი ღმერთის ქალაქში; ღმერთი დააფუძნებს მას უკუნისამდე. სელა.

⁹ვფიქრობდი, ღმერთო, შენს წყალობაზე შენი ტაძრის შუაგულში.

¹⁰ვითარცა სახელი შენი, ღმერთო, შენი დიდებაც დედამიწის კიდით-კიდემდეა; სიმართლით სავსეა შენი მარჯვენა.

¹¹დაე, იხაროს სიონის მთამ, იმხიარულონ იუდაელმა ქალწულებმა შენი სამართლის გამო;

¹²ყოველი მხრიდან მიადექით და გარს შემოუარეთ სიონს; დათვალეთ მისი კოშკები.

¹³გული დაუდეთ მის სიმაგრეებს; დაიარეთ მისი დარბაზები, რათა უამბოთ მომავალ თაობას.

¹⁴რადგან ის არის ღმერთი, ჩვენი ღმერთი უკუნითი უკუნისამდე; ის წაგვიძღვება ჩვენ სამარის კარამდე.