Read საპატრიარქო ფსალმუნები 76 Bible Online

ფსალმუნები 76 - საპატრიარქო bible

ფსალმუნები 76

¹გუნდისcლოტბარს. იედუთუნის შესახებ. ასაფის ფსალმუნი. ჩემი ხმა ღმერთის მიმართ და მე შევღაღადებ. ჩემი ხმა ღმერთის მიმართ და ის მომისმენს.

²ჩემი გაჭირვების დღეს უფალს ვეძიებ, ჩემი ხელი ღამღამობით გაწვდილია და არ ივანებს, უარს ამბობს ნუგეშისცემაზე ჩემი სული.

³გავიხსენებ ღმერთს და ვთრთი, ვისაუბრებ და უძლურდება ჩემი სული. სელა.

⁴თვალი არ დამახუჭინე; შევძრწუნდი და ვეღარ ვლაპარაკობ.

⁵ვიგონებდით ადრინდელ დღეებს, გარდასულ წლებს.

⁶გავიხსენებ ჩემს გალობას ღამღამობით, ჩემს გულთან ვისაუბრებ და განიცდის სული ჩემი.

⁷ნუთუ საუკუნოდ მიმატოვებს უფალი და აღარასოდეს მოისურვებს?

⁸ნუთუ სამუდამოდ გაქრა მისი წყალობა, დამთავრდა მისი სიტყვა თაობიდან თაობამდე?

⁹ნუთუ დაივიწყა შებრალება ღმერთმა? ნუთუ რისხვით უარყო სიბრალული? სელა.

¹⁰და ვთქვი: აი, ჩემი უბედურება - შეცვლა უზენაესის მარჯვენისა.

¹¹გავიხსენებ უფლის საქმეებს, რადგანაც მახსოვს შენი ძველი სასწაულები.

¹²ჩავუკვირდები ყველა შენს ნამოქმედარს და შენს საქმეებზე ვისაუბრებ.

¹³ღმერთო! წმიდაა შენი გზა. რომელი ღმერთია ჩვენი ღმერთივით დიდი?

¹⁴შენა ხარ ღმერთი, სასწაულის მოქმედი; შენ გამოავლინე ხალხთა შორის ძლიერება შენი.

¹⁵შენი მკლავით დაიხსენი შენი ერი - ძენი იაკობისა და იოსებისა. სელა.

¹⁶გიხილეს წყლებმა, ღმერთო, გიხილეს წყლებმა - შეშინდნენ, უფსკრულნიც კი შეძრწუნდნენ.

¹⁷გადმოღვარეს წყლები ღრუბლებმა, ხმა გამოსცეს ცებმა, შენი ისრებიც მიმოფრენდნენ.

¹⁸შენი გრგვინვის ხმა ცის თაღზე - გაანათეს ელვებმა სამყარო, შეძრწუნდა და შეირყა დედამიწა.

¹⁹ზღვაშია შენი გზა და შენი ბილიკი - დიდ მდინარეებში, და შენი კვალი არ არის ცნობილი.

²⁰უძღოდი, ვითარცა ცხვარს, შენს ხალხს მოსეს და აარონის ხელით.