Read საპატრიარქო ფსალმუნები 79 Bible Online

ფსალმუნები 79 - საპატრიარქო bible

ფსალმუნები 79

¹გუნდის ლოტბარს, შოშანიმ - ედუთის საკრავზე, ასაფის ფსალმუნი. მწყემსო ისრაელისა, ყური მოგვაპყარ; წინ რომ უძღოდი, ვითარცა ცხვარს, იოსებს, ქერუბიმებზე ამხედრებული, გამოგვეცხადე.

²ეფრემის, ბენიამინისა და მენაშეს წინაშე წამომართე შენი სიძლიერე და მოდი ჩვენს სახსნელად.

³ღმერთო! მოგვაქციე ჩვენ; გაბრწყინდეს სახე შენი და დავიხსნებით.

⁴უფალო, ღმერთო ძალთაო, როდემდე იქნები განრისხებული შენი ხალხის ლოცვაზე?

⁵აჭმევ მათ ცრემლიან პურს და ასმევ ცრემლებს სამმაგად.

⁶დაგვსვი საშუღლოდ ჩვენს მეზობლებში და ჩვენი მტრები აბუჩად გვიგდებენ.

⁷უფალო, ღმერთო ძალთაო, მოგვაქციე ჩვენ, გაბრწყინდეს შენი სახე და დავიხსნებით.

⁸ეგვიპტიდან გადმოიტანე ვაზი, განდევნე ხალხები და დარგე ის.

⁹გაწმიდე მის წინ ადგილი, გაადგმევინე ფესვები და მან აავსო ქვეყანა.

¹⁰მთები დაფარა მისმა ჩრდილმა და მისმა ტოტებმა - ნაძვი ღმერთისა.

¹¹ტოტები გაიტანა ზღვამდე და მდინარემდე - ყლორტები თვისი.

¹²რატომ დაანგრიე ზღუდენი მისნი და ყოველი გზად გამვლელი ძარცვავს მას?

¹³ანადგურებს მას ტყიური ტახი და ველის ნადირები ძოვენ მას.

¹⁴ღმერთო ძალთაო! მობრუნდი, გადმოგვხედე ციდან და იხილე, და მოხედე ამ ვაზს.

¹⁵გაამაგრე ის, რაც დარგო შენმა მარჯვენამ, და ყლორტები, შენთვის რომ გააძლიერე.

¹⁶დამწვარია ცეცხლით, აკაფულია; შენი სახის რისხვით დაიღუპებიან.

¹⁷იყოს შენი ხელი შენი მარჯვენის კაცზე, ადამის ძეზე, შენთვის რომ გააძლიერე.

¹⁸და არ უკუვდგებით შენგან, გვაცოცხლე და შენს სახელს მოვუხმობთ.

¹⁹უფალო, ღმერთო ძალთაო, მოგვაქციე ჩვენ; გაბრწყინდეს შენი სახე და დავიხსნებით.