Read საპატრიარქო ფსალმუნები 90 Bible Online

ფსალმუნები 90 - საპატრიარქო bible

ფსალმუნები 90

¹უზენაესის საფარქვეშ დამკვიდრებული ყოვლისშემძლის ჩრდილქვეშ ისვენებს.

²ვეტყვი უფალს: ჩემი მფარველი და სიმაგრეა ჩემი ღმერთი, რომელსაც ვესავ.

³რადგან ის დაგიხსნის მონადირის ხაფანგიდან, მომსრავი ჭირისაგან.

⁴თავის ფრთებს გადაგაფარებს და მის კალთებქვეშ შეაფარებ თავს; ფარი და ბურჯია მისი ჭეშმარიტება.

⁵ნუ შეგაშინებს საშინელება ღამისა, ისარი დღისით გაფრენილი.

⁶შავი ჭირი - ბნელში მოარული, სენი - შუადღის მძარცველი.

⁷დაეცემა შენს გვერდით ათასი და ათი ათასი შენს მარჯვნივ, შენ კი არ მოგეკარება.

⁸ოღონდ შენი თვალებით შეხედე და დაინახავ მისაგებელს ბოროტეულთა.

⁹რადგან, ღმერთო, შენ ხარ ჩემი თავშესაფარი, შენს საცხოვრისად აირჩიე უზენაესი.

¹⁰არ შეგემთხვევა სიავე და წყლული ვერ მიეკარება შენს კარავს.

¹¹რადგან თავის ანგელოზებს უბრძანა შენზე - დაგიცვან ყველა შენს გზაზე.

¹²ხელში აყვანილს გატარებენ, რომ ფეხი არ წამოჰკრა ქვაზე.

¹³ლომსა და უნასს ფეხს დაადგამ, ლომის ბოკვერს და ურჩხულს გაქელავ.

¹⁴რაკი მისურვა, გადავარჩენ მას, დავიფარავ მას, რადგან იცნო ჩემი სახელი.

¹⁵მომიხმობს მე და ვუპასუხებ, მასთან ვარ გასაჭირში; გამოვიხსნი და ვასახელებ.

¹⁶დღეთა ხანგრძლივობით გავაძღებ და შემწეობას მოვუვლენ ჩემსას.