Read საპატრიარქო ფსალმუნები 91 Bible Online

ფსალმუნები 91 - საპატრიარქო bible

ფსალმუნები 91

¹ფსალმუნი. გალობა შაბათის დღისათვის. კარგია ვადიდოთ უფალი და გუგალობოთ შენს სახელს, უზენაესო!

²გაუწყოთ დილდილობით შენი წყალობა და ჭეშმარიტება შენი ღამღამობით.

³ათსიმიანზე და ჩანგზე, გალობით - ქნარზე.

⁴რაკი გამამხიარულე, უფალო, შენი ნამოქმედარით, შენთა ხელთა ნასაქმარს ვუგალობებ.

⁵რაოდენ დიდია შენი საქმეები, უფალო, ფრიად ღრმაა შენი ზრახვები.

⁶უგუნური კაცი ვერ შეიცნობს და უმეცარი ვერ გაიგებს ამას,

⁷როცა ბოროტნი აყვავდებიან ბალახივით და აღორძინდება ყველა - მოქმედი სიმრუდისა, რომ დაიღუპონ საუკუნოდ.

⁸ხოლო შენ მაღალი ხარ მარადჟამს, უფალო!

⁹რადგანაც, აგერ, შენი მტრები, უფალო, რადგანაც, აგერ, შენი მტრები იღუპებიან, განიბნევიან ყველანი - სიმრუდის მოქმედნი.

¹⁰მოამაღლებ რქას ჩემსას მარტორქის რქისებრ, ცხებული ვარ ხასხასა ზეთით.

¹¹უჭვრეტს ჩემი თვალი ჩემს მტრებს, ჩემს წინააღმდეგ აღმდგარ ბოროტმოქმედებზე გაიგონებენ ჩემი ყურები.

¹²წმიდანი ფინიკივით გაიფურჩქნება, ლიბანის კედარივით წამოიმართება.

¹³უფლის სახლში დარგულნი, ჩვენი ღმერთის ეზოებში აყვავდებიან;

¹⁴სიბერეშიც გამოიღებენ ნაყოფს - წვნიანსა და ხასხასას.

¹⁵რათა განვაცხადო, რომ მართალია უფალი, ჩემი საყრდენი, და არ არის მასში უსამართლობა.