Read საპატრიარქო იგავნი სოლომონისა 18 Bible Online

იგავნი სოლომონისა 18 - საპატრიარქო bible

იგავნი სოლომონისა 18

¹თავკერძა კაცი თავის გულისთქმას არის აყოლილი და ყოველგვარი სიბრძნის წინააღმდეგ ჯანყდება.

²ბრიყვი ცოდნას არ ესწრაფის, საკუთარი ფიქრის გამხელა სურს.

³ბოროტეულს სიძულვილი მოყვება, ლანძღვა-გინებას კი - სირცხვილი.

⁴კაცის ბაგის სიტყვები ღრმა წყალია, სიბრძნის სათავე კი - მოჩუხჩუხე ნაკადული.

⁵არ არის კარგი მიკერძოება ბოროტეულის მიმართ მართლის გასამტყუნებლად სამსჯავროზე.

⁶ბრიყვს დავაში ითრევს მისი ბაგეები და მისი პირი აყალ-მაყალს იწვევს.

⁷ბრიყვის პირი მისი დამღუპველია, მისი ბაგენი მისივე მახეა.

⁸ცილისმწამებლის სიტყვები ნუგბარი საჭმელივითაა და მუცლის შუაგულამდე აღწევს.

⁹საქმეში არხეინი მფლანგველის ძმაა.

¹⁰უფლის სახელი მტკიცე გოდოლია; მართალი შეაფარებს თავს და გადარჩება.

¹¹მდიდრის დოვლათი მისი ციხე-ქალაქია და მალი კედელივით იფარავს მას.

¹²შემუსვრა მოსდევს დიდგულობას და დიდებას წინ უძღვის მორჩილება.

¹³მოუსმენრად პასუხის გაცემა სიბრიყვეა და სირცხვილი.

¹⁴კაცის სული კურნავს სნეულებას; სულის მწუხარებას კი ვინ დაითმენს?

¹⁵გონიერის ჭკუა ცოდნას იძენს და ბრძენთა ყური ცოდნას ეძიებს.

¹⁶ძღვენი კაცს გზას უფართოებს და დიდკაცთა წინაშე მიჰყავს.

¹⁷პირველი მართალია დავაში, ვიდრე მისი მოსარჩლე მოვიდოდეს და გაჩხრეკდეს მას.

¹⁸კენჭისყრა ბოლოს უღებს დავას და ძლიერთა შობის აჩენს სამართალს.

¹⁹განდგომილი ძმა ციხე-სიმაგრეზე უფრო მეტად მიუდგომელია და უთანხმოებანი კოშკის ურდულს ჰგავს.

²⁰კაცი თავისი პირის ნაყოფით ივსებს სტომაქს; საკუთარი ბაგეების მოსავლით ძღება.

²¹სიკვდილ-სიცოცხლე ენის ხელშია და მისი მოყვარულნი მის ნაყოფს იგემებენ.

²²ვინც ცოლი ჰპოვა, სიკეთე ჰპოვა და უფლისგან წყალობა მიიღო.

²³ღარიბ-ღატაკი ვედრებით ლაპარაკობს, მდიდარი კი უკმეხად პასუხობს.

²⁴ბევრი მეგობრის ყოლა დამღუპველია, ზოგი მეგობარი კი ძმაზე მოყვარულია.