Read საპატრიარქო იგავნი სოლომონისა 2 Bible Online

იგავნი სოლომონისა 2 - საპატრიარქო bible

იგავნი სოლომონისა 2

¹შვილო, რომ მიიღებდე ჩემს სიტყვებს და ჩემს მცნებებს დაიცავდე,

²ყური რომ გქონდეს სიბრძნისაკენ მიპყრობილი და გული გონიერებისკენ გეწეოდეს,

³რომ მოუწოდებდე ჭკუას და გონებას გააღვიძებდე.

⁴რომ ვერცხლივით მისი შოვნის წადილი გქონდეს და განძივით დაუწყებდე ძებნას.

⁵მაშინ შეიგნებ უფლის შიშს და მოიპოვებ ღვთისმშემეცნებას.

⁶რადგან უფალი იძლევა სიბრძნეს და მის ბაგეთაგან არის ცოდნა და შეგნება,

⁷მასთან არის მართალთა შეწევნა, ის არის ფარი უმწიკვლოთათვის,

⁸იცავს სამართლის გზებს და მადლიანთა სავალს იფარავს.

⁹მაშინ მიხვდები, რა არის სთმართლე, სამართალი და სამართლიანობა - ყოველი კეთილი საქმე.

¹⁰თუ სიბრძნე შევიდა შენს გულში და ცოდნა ეტკბო შენს სულს,

¹¹გონიერება დაგიფარავს და შეგნება დაგიცავს,

¹²რომ გიხსნას ბოროტების გზიდან, თვალთმაქცი კაცისაგან,

¹³სწორი გზის დამტოვებელთაგან, ბნელი გზით მოარულთაგან,

¹⁴ბოროტი საქმით მოხარულთაგან, რომლებიც ბოროტი თვალთმაქცობით ხარობენ,

¹⁵რომელთა სავალი მრუდია და საქციელი უკუღმართია,

¹⁶რომ გიხსნას უცხო ქალისაგან, უცხოთესლისგან, მისი ლაქარდიანი ენისაგან,

¹⁷რომელმაც სიყრმის მეგობარი მიატოვა და ღვთის აღთქმა დაივიწყა,

¹⁸რადგან მისი სახლის წიაღ სიკვდილია, მისი ნაბიჯები აჩრდილებისკენ არის მიმართული.

¹⁹იქ შემსვლელთაგან უკან ვერავინ ბრუნდება, სიცოცხლის გზებს კვლავ ვეღარ დაადგება.

²⁰რომ დადიოდე კეთილი გზით და მართალთა ბილიკებს არ გადაუხვიო,

²¹რადგან ალალმართლები უნდა გამკვიდრდნენ ქვეყნად და უმწიკვლონი უნდა გადარჩნენ.

²²ურჯულოები ქვეყნიდან მოიკვეთებიან და მზაკვარნი აღმოიფხვრებიან მისგან.