Read საპატრიარქო იგავნი სოლომონისა 21 Bible Online

იგავნი სოლომონისა 21 - საპატრიარქო bible

იგავნი სოლომონისა 21

¹მეფის გული წყლის ნაკადულებია უფლის ხელში: საითაც ინებებს, იქით მიუშვებს.

²კაცის თვალში სწორია ყველა მისი გზა, ხოლო გულებს უფალი წონის.

³სიმართლის და სამართლის ქმნა მსხვერპლზე უფრო სასურველია უფლისათვის.

⁴ქედმაღლობა და დიდგულობა - ბოროტეულთა ლამპარი - ცოდვაა.

⁵მუყაითის ზრახვები სიუხვეს აჩენს, ხოლო მოჩქარისა - სიდუხჭირეს.

⁶სიცრუით მოხვეჭილი განძი წარმავალი ორთქლია და სიკვდილის ხაფანგი.

⁷ბოროტეულთ მათივე ძალადობა წალეკავს, რადგან მათ არ სურთ სამართლის ქმნა.

⁸ცრუ კაცის გზა უკუღმართია, ხოლო სუფთა კაცი წრფელად იქცევა.

⁹სხვენის კუნჭულში ცხოვრება სჯობია ანჩხლ დედაკაცთან ერთ ჭერქვეშ ყოფნას.

¹⁰ბოროტეულის სულს ავი სწადია; წყალობას ვერ ჰპოვებს მის თვალში მისი მახლობელი.

¹¹ზნეწამხდარის დასჯით ბრიყვი დაბრძმენდება, ბრძენი შეგონებით ცოდნას იხვეჭს.

¹²ბოროტეულის სახლის მზირველი მართალი ბოროტეულთ გააუბედურებს.

¹³ვინც ღატაკთა კვნესის წამყრუებელია თავადაც იყვირებს, მაგრამ არ იქნება შეწყნარებული.

¹⁴ფარული ძღვენი წყრომას აცხრობს და უბეში ქრთამი - ძლიერ მრისხანებას.

¹⁵სამართლის ქმნა მართლისათვის სიხარულია, ბოროტმოქმედთათვის - შიში.

¹⁶გონიერების გზა-კვალს აცდენილი კაცი სულთა კრებულში თუ მოისვენებს.

¹⁷ლხინის მოყვარული კაცი გაღატაკდება; ღვინისა და ნელსაცხებლის მოყვარული ვერ გამდიდრდება.

¹⁸მართლის გამოსასყიდი ბოროტეული იქნება, გულწრფელთა კი - მზაკვარი.

¹⁹უბედურ ქვეყანაში ცხოვრება სჯობია ანჩხლ და ბრაზიან ცოლთან ყოფნას.

²⁰ძვირფასი განძი და ნელსაცხებელია ბრძენის სამყოფელში, ბრიყვი კაცი კი აჩანაგებს მათ.

²¹სიმართლისა და მადლის მიმდევარი სიცოცხლეს, სიმართლეს და დიდებას ჰპოვებს.

²²დევ-გმირთა ქალაქზე აღდგება ბრძენკაცი და დაამხობს საიმედო სიმაგრეს.

²³საკუთარი პირისა და ენის დამცველი თავს გაჭირვებისგან იცავს.

²⁴ამპარტავანი, მედიდური, ზნეწამხდარი მისი სახელია, ვინც მედიდური მძვინვარებით იქცევა.

²⁵ზარმაცს შიმშილი მოკლავს, რადგან მის ხელებს არა სურთ შრომა.

²⁶იგი სულ მუდამ გაჭირვებაშია, ხოლო მართალი ხელგაშლილად გასცემს.

²⁷ბოროტეულთა მსხვერპლი სიბილწეა, მით უფრო, როცა მზაკვრობით სწირავენ.

²⁸ცრუმოწმე დაიღუპება. თავისი ყურით გამგონე კაცი კი მუდამ ილაპარაკებს.

²⁹ბოროტეული კაცი ამპარტავნულ სახეს იღებს, წრფელმა კი იცის თავისი გზა.

³⁰არ არსებობს სიბრძნე, არ არსებობს ცოდნა, არ არსებობს რჩევა უფლის პირისპირ.

³¹ცხენი გამზადებულია ბრძოლის დღისათვის, მაგრამ შველა უფლისგან არის.