Read საპატრიარქო იგავნი სოლომონისა 23 Bible Online

იგავნი სოლომონისა 23 - საპატრიარქო bible

იგავნი სოლომონისა 23

¹დიდკაცთან პურის საჭმელად რომ დაჯდები, დაკვირვებით იყავი:

²ყელზე დანა მიიბჯინე, თუ მსუნაგი ხარ.

³ნუ ინდომებ მის ნუგბარ საჭმელებს, მაცთური პურია იგი.

⁴გამდიდრებაზე ნუ იზრუნებ, თავიდან მოიშორე ფიქრი.

⁵თვალებს მიაპყრობ და გამქრალია, რადგან ფრთებს შეისხამს და არწივივით ზეცას გაფრინდება.

⁶ავთვალი კაცის პური არ იგემო და მისი ნუგბარი საჭმელები არ ინდომო.

⁷რადგან როგორც იქცევა, ისე არ ფიქრობს; ჭამე და სვიო, გეუბნება, მაგრამ შენთან არ არის მისი გული.

⁸შეჭმულ ლუკმას უკან ამოანთხევ და მადლობის სიტყვებს ფუჭად დახარჯავ.

⁹ბრიყვს ყურში ნურაფერს ეტყვი, რადგან მას სძულს შენი გონივრული სიტყვები.

¹⁰ნუ შეცვლი ძველ მიჯნას და ობლების ყანაში ნუ შეხვალ;

¹¹რადგან ძლიერია მათი მფარველი, ის დაიცავს მათ საქმეს შენს წინააღმდეგ.

¹²გული მიაქციე შეგონებას და ყური - ცოდნის სიტყვებს.

¹³ყმაწვილის დასჯა ნუ დაგენანება: ჯოხითაც რომ სცემო, არ მოკვდება.

¹⁴ჯოხით სცემე და მის სულს შავეთისგან იხსნი.

¹⁵შვილო, თუ შენი გული ბრძენი იქნება, ჩემი გულიც გაიხარებს.

¹⁶ჩემს შიგანს სიხარული მოიცავს, როდესაც შენი ბაგეები სიმართლეს ილაპარაკებენ.

¹⁷შენს გულს ცოდვილებისა ნუ შეშურდება, არამედ ყოველდღე უფლის შიშში იყოს.

¹⁸რადგან მომავალი არსებობს და შენი იმედი არ წარიკვეთება.

¹⁹მისმინე, შვილო, და ბრძენი იყავი; და გზაზე დააყენე შენი გული.

²⁰ნუ იქნები ღვინის მსმელებსა და ხორცის მთქვლეფავებს შორის;

²¹რადგან ლოთი და მთქვლეფავი გაღარიბდება, ხოლო თვლემა ძონძებით შემოსავს კაცს.

²²გაუგონე შენს მშობელ მამას და დედას, მოხუცებულს, ნუ მოიძულებ.

²³ჭეშმარიტება შეიძინე და სიბრძნეს, შეგონებასა და გონიერებას ნუ გაჰყიდი.

²⁴მართლის მამა მოილხენს და ბრძენის მშობელი მისით გაიხარებს.

²⁵გაიხარებს შენი დედ-მამა, შენი მშობლები მოილხენენ.

²⁶შვილო, მე მომეცი შენი გული და შენმა თვალებმა ჩემს გზაზე იყურონ.

²⁷მეძავი ქალი ღრმა ორმოა და ვიწრო ჭაა უცხო დედაკაცი.

²⁸ყაჩაღივით არის ჩასაფრებული და ხალხში ორგულებას ამრავლებს.

²⁹ვინ ოხრავს? ვინ კვნესის? ვინ დაობს? ვინ ჩივის? ვისა აქვს უმიზეზოდ ჭრილობები? ვისა აქვს ჩაწითლებული თვალები?

³⁰ვინც ღვინოს გვიანამდე უზის, ვინც განზავებული ღვინის საძებნად დადის.

³¹ნუ დახარბდები ღვინის სიწითლეზე, ფიალაში რომ ნაპერწკლებს ისვრის და მორაკრაკებს;

³²ბოლოს გველივით კბენს და ასპიტივით გესლავს;

³³შენს თვალებს უცნაურობანი მოელანდება და შენი გული უკუღმართად ოლაპარაკებს.

³⁴შუაგულ ზღვაში მძინარესავით იქნები, ანძის წვერზე მძინარესავით.

³⁵იტყვი, მცემდნენ და არ მტკიოდაო, მირტყამდნენ და ვერ ვიგებდიო; გამოვიღვიძებ და ისევ ძებნას დავუწყებო.